Ezekieli 10
10
1Hene yaho nda lola, henza, mu bwerefu bwa li igulu womutwe gwa vakerubi ha loleka igulu wavo kindu kuli ligina lya isafiro, na liloleka lyalyo lya li kuli intebe yobwami. 2Na ya volera mundu wivika ingubo yekatani, na a mu volera, Wingire hagati hetsingida tsyokuserengeta, isi wa vakerubi, wizulitse ku tsimpi tsitsyo tsyombi amanda gomuliru gu veye hagati ha vakerubi, u ga sigisi ku lidala. Naye yingira ha zana imbiri wetsimoni tsyange. 3Ma vakerubi va li ni va singiye ku luvega lwomukono mulungi lwenyumba mundu uyu lwa yingira; na lilesi lizula mugidzi gwomugati. 4Ubukumi bwa Yahova bwa nina igulu kutwula ku mukerubi, na bwa singira ku mukingi gwenyumba; nenyumba yizula lilesi, nomugidzi gwizula ubung'ering'anu bwobukumi bwa Yahova. 5Nomwoyo gwetsimbaha tsya vakerubi gwa hulirwa kuduka mu mugidzi gwekyova, kuli mwoyo gwa Nyasaye Wanyala Vyosi lwa a volanga. 6Na ga duka, lwa ya laga mundu wivika ingubo yekatani, nokumuvolera, Vugula muliru hagati hetsingida tsyokuserengeta, hagati ha vakerubi, hene yaho yingira, na ya singira himbi nengida indala. 7Mukerubi ya nyira mukono gwigwe kutwula hagati ha vakerubi, na ya vugula ku muliru zana, na a gu vika mu makono ga uyu wivika ingubo yekatani, naye ya gu vugula na a tsia kyova. 8Na ha loleka mu vakerubi lifwanana lyomukono gwomundu isi wetsimbaha tsyavo.
9Na nda lola, henza, tsingida tsine tsya li himbi navakerubi, ingida indala himbi nomukerubi mulala, na ingida yindi himbi nomukerubi wundi: neliloleka lyetsingida zana lya li kuli ligina lyeberulo. 10Na mu liloleka lyatsyo, yitsyo tsine tsya li nelifwana lilala, kuli tsya li ingida indala mugati mwengida. 11Na lwa tsya genda, tsya tsitsanga imbiri ku tsimbega tsyavo tsine: si tsya girunkana lwa tsya tsitsanga imbiri navutswa ho mutwe gwa henzanga tsya londa ha zana; si tsya girunkana mba lwa tsya tsitsanga imbiri. 12Mibiri gyavo gyosi, nemigongo gyavo namakono gavo, netsimbaha tsyavo netsingida, vizula tsimoni tsimbega tsyosi, kali tsingida tsya yavo vane va li natsyo. 13Ku makuva getsingida, tsya langwa tsingida tsyokuserengeta, na inze nda hulira. 14Sa mulala ya li nommoni hali kane: mmoni mwokutanga mwa li mmoni mwomukerubi, nommoni mwa kaviri mwa li mmoni mwomundu, nommoni mwa kavaka mwa li mmoni mweking'ang'a, nommoni mwa kane mwa li mmoni mweindidzu.
15Na yavo vakerubi va nina igulu: henza, yivi vi veye vilombe vi veye mwoyo vya nda lola himbi nomugera gwa Kebari. 16Na lwa vakerubi va genda, tsingida tsya genda himbi kuvo; na lwa vakerubi va ginga tsimbaha tsyavo kunina kutwula ku lirova, tsingida kandi si tsya girunkana kutwula kuvo. 17Lwa va singira, natsyo tsya singira; lwa va nina igulu, natsyo tsya nina igulu halala navo: kigira roho gwevilombe vi veye mwoyo gwa li mutsyo. 18Na ubukumi bwa Yahova bwa twula ha mukingi gwenyumba, na bwa singira ku vakerubi. 19Na vakerubi va nyira tsimbaha tsyavo, na va nina igulu kutwula ku lirova imbiri wetsimoni tsyange, lwa va twula kutsia kyova, tsingida kandi tsya li himbi navo: na va singira mu kiribwa ku luvega lwevugwe lwenyumba ya Yahova; nobukumi bwa Nyasaye wa Israeli bwa li igulu wavo.
20Henza, yiki ni kilombe ki veye mwoyo kya nda lola isi wa Nyasaye wa Israeli himbi nomugera gwa Kebari: na nda manya yava va veye avakerubi. 21Sa mulala ya li nommoni hali kane, na sa mulala ya li netsimbaha tsine; nelifwana lyamakono gomundu lya li isi wetsimbaha tsyavo. 22Na ku makuva gelifwana lyommoni mwavo, lya li lifwana lyommoni zana mwa nda lola himbi nonugera gwa Kebari, liloleka lyavo na avene; va genda sa mulala buiungi imbiri wewe.
Currently Selected:
Ezekieli 10: MBE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1967
