Ezekieli 8
8
1Na ga duka mu muhiga gwegyitano nomulala, ku mweli, gwegyitano nomulala, ku lidiku lya gatano lyomweli, lwa nda li ni nzikaye mu inyumba yange, navakulundu va Yuda vikala imbiri wange, mukono gwa Yahova Nyasaye gwa gwa ku inze ha zana. 2Ma nda lola, henza, lifwanana lyomundu; liloleka lyalyo lya li kuli muliru, kutwula ku iiloleka lyekikenge kikye noku luvega lye isi, gwa li muliru; nokutwula ku kikenge kikye ku luvega lwegulu, kuli liloleka lyobung'ering'anu, kuli ubwakanyu bwekivya. 3Naye ya nyira lifwana lyomukono, nokugumira inze ku luyove lulala lwelisu lyoku mutwe gwange; na Roho ya ng'inga hagati helirova neligulu, na ya mbilira mu malola ga Nyasaye kuduka Yerusa lemi; kuduka ku muliangu gwekiribwa kyomugidzi gwomugati gu henza ku luvega lwa kasikasini; ha zana ya li ho intebe yekifwananyi kyelikendeka, ki vukidzanga likendeka. 4Na, henza, ubukumi bwa Nyasaye wa Israeli bwa li ha zana, kuli malola ga nda lola mu kereremu.
5Nonoho ya mbolera, Ive mwana womundu, ginga tsimoni tsitsyo kalunu ku luvega lwa kasikasini. Ma nda ginga tsimoni tsyange ku luvega lwa kasikasini, na henza, ku luvega lwa kasikasini lwekiribwa kyobwali, kifwananyi kyelikendeka kya li ho mu bwingiriru. 6Na ya mbolera, Ive mwana womundu, u lola yaga aga va kolanga? Nago ga veye kivihiri kinene kyenyumba ya Israeli i kolanga hano, inze nduke kutsia ihale na hatakatifu hange? Navutswa ive u la lola kandi kivihiri kindi kinene.
7Na ya ndeta kuduka mu kiliango kyomugidzi; na lwa nda lola, henza, ha veye nobuhuduke mu lidigi. 8Ma ya mbolera, Ive mwana womundu, hudula kalunu mu lidigi: na lwa nda li ni mbudula mu lidigi nda lola kiliango. 9Na ya mboiera, Wingire mugati, u lole kivihiri kidamano kya va kolanga hano. 10Ma ndingira ni nki lola; henza, tsing'ano tsyosi tsyevimolanga, na tsyetsinyama tsyokuvihiriridza, na vifwananyi vyosi vyenyumba ya Israeli, vya kupwa ku lidigi hosi. 11Na imbiri wavyo avasatsa makumi gatano na gaviri avakulundu avenyumba ya Israeli, va singira; na hagati havo Jaazania mwana wa Shafan ya singira, sa mulala yali nekituva mmukono gwigwe; na malusu gomwoki gwevimuli ga nina igulu. 12Nonoho ya mbolera, Ive mwana womundu, u lola yaga aga vakulundu venyumba ya Israeli va kolanga mu kisundi, sa mulala mu vigodola vivye vyevifwananyi? Kigira va vola, Yahova si a ku lolanga mba; Yahova wa leka kivala yiki. 13Ya mbolera kandi, Ive u la lola kandi kivihiri kindi kinene kya va kolanga.
14Ma ya ndeta kuduka ha kiliango kyekiribwa kyenyumba ya Yahova, kyoluvega lwa kasikasini; henza, avakali va li nevikaye ni va liriranga Tamuzu. 15Ma ya mbolera, U loli yaga, Ive mwana womundu? U la lola kandi kivihiri kindi kinene kuvita yiki.
16Na ya mbila mu mugidzi gwomugati gwenyumba ya Yahova, henza, va li ha kiliango kyelitempeli lya Yahova, hagati holusimbu nobwali, avandu makumi gaviri na vatano va veye ho, nemigongo gyavo gya henza ku litempeli lya Yahova, nommoni mwavo mwa henza ivugwe; na va sigamiranga liuva ku luvega lwevugwe. 17Hene yaho ya mbolera, U loli yaga, Ive mwana womundu? U lolanga ndi, ki veye kyangu ku inyumba ya Yuda kukola kivihiri yiki kya va kolanga hano? Kigira va mali kwizulitsa kirage ku kivala, na va girunkani kandi va duke kuvihiriridza inze: na henza va vika lusya ku amolo gavo. 18Kigira yaga inze kandi nda kola mu butima bwange; imoni yange si i la leka, kandi si nda va netsimbabasi mba; kali ni va hanzuka mu matu gange, si nda va hulira mba.
Currently Selected:
Ezekieli 8: MBE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1967
