Ezekieli 18
18
1Likuva lya Yahova lya duka ku inze kandi, kuvola, 2Kigira ki mwinye mwa tumekira ulugano yilo ku makuva gekivala kya Israeli, kuvola, Avadada va lia ma zabibu malulu, na amino gavana vavo ga kudza? 3Kuli inze mbeye mwoyo, Mwami Nyasaye a vola, si mu la va nobwiyangu kandi kutumekira lugano yilu mu Israeli. 4Henza myoyo gya vosi ni gyange; kuli mwoyo gwa ise gu veye gwange ni ndiyo mwoyo gwomwana wewe gu veye gwange: mwoyo gwomundu gu kolanga ubwoni gu la kudza.
5Navutswa mundu na a va na a veye mulungi, nokukola aga dukana nobulungi, 6na ya vula kulia vyokulia ku vigulu, kinga kuginga tsimoni tsitsye kuhenza vifwananyi vyenyumba ya Israeli, kandi ya vula kwononnya mukali womutende, kandi ya vula kwesunda ku mukali ku inyinga yeye yokutsia mmweli, 7kandi ya vula kudambidza mundu kali mulala, navutswa yiranyira weligovi lilye kihambiriru kikye kandi ya vula kunuula umundu kali mulala nekirage, ya ha avenzala vyokulia vivye, nokuvika ava li kyahonyo tsingubo; 8ya vula kuhaana ifetha kunyola vyambeti, kandi ya vula kuvugula vya medeka, ya twulidza mukono gwigwe ku budamano, na a kola li kalaga lilungi hagati homundu no mundu, 9na ya genda mu malago gange, nokugumira likalaga lyange, a duke kukola ageligali, uyu a veye mulungi, ligali a la hindira, Mwami Nyasaye a vola.
10Mundu uyu ni yivula mwana muyai mwivi, wokutahidza masahi, nokukola kilala ku vindu yivi, 11na a vula kukola kilala ku yivi vi mu dukiranga, navutswa kali wa mala kulia vyokulia ku vigulu, nokwononnya mukali womutende, 12noku dambidza avadaka navadambi, nokunuula avandu nekirage, wa vula kwirannya kihambiriru, wa ginga tsimoni tsitsye kuhenza vifwananyi, wa tumekira kivihiri, 13wa haana ifetha kunyola vyambeti, wa vugula vya medeka; mundu uyu a la hindira? Si a la hindira mba; u mali kukola kivihiri yiki kyosi; ligali a la kudza; amasahi gege ga la va kuye.
14Kandi, henza, uyu ni yivula mwana muyai, u lolanga ubwoni bwosi bwa dada wewe ya kola, naye na a tia, na a vula kukola kuli ga zana; 15na a vula kulia vyokulia ku vigulu kandi na a vula kuginga tsimoni tsitsye kuhenza vifwananyi vyenyumba ya Israeli, kandi na a vula kwo nonnya mukali womutende, 16kandi na a vula kudambidza mundu kali mulala, kandi na a vula kuvugula kindu kuva kihambiriru, kandi na a vula kunuula mundu nekirage navutswa ya ha avenzala vyokulia nokuvika avekyahonyo ingubo; 17wa twulidza mukono gwigwe gu vula kuva ku mudaka, wa vula kuvugula vyambeti kinga vyamedeka, na ya kola likalaga lyange, nokugenda mu malago gange; uyu a la vula kukudza kigira ubudamano bwa dada wewe ligali uyu a la hindira. 18Ku makuva ga dada wewe, kigira ya dambidza avandu nobululu, nokunuula amwavo wewe nekirage, nokukola aga ta li malahi hagati ha avandu veve, henza, uyu a la kudzira mu bwoni bwibwe.
19Na mwinye mu vola, Kigira ki mwana uyu a vula kuginga ubudamano bwa dada wewe? Mwana uyu u li kola aga dukana nobulungi, nokugumira amalago gange gosi, nokugakola, ligali a la hindira. 20Mwoyo gwomundu gu kolanga ubwoni gu la kudza: umwana a la vula kuginga ubudamano bwa dada wewe, kandi dada a la vula kuginga ubudamano bwomwana wewe; ubulungi bwibwe bu la va ku uyu wobulungi, nobudamano bwibwe bu la va ku uyu wobudamano.
21Navutswa mudamano ni yeganira nokuleka ubwoni bwibwe bwosi bwa ya kola, nokugumira amalago gange gosi, nokukola aga dukana nobulungi, ligali uyu a la hindira, a la vula kukudza. 22Lihyola kali lilala ku gosi ga ya kola si li lidzulitswa kuye: mu bulungi bwibwe bwa ya kola a la hindira mubwo. 23Inze nyanza likudza lyomudamano? Mwami Nyasaye a vola; si nyanza bwa ka va ubulahi yirane nokuleka inzira yeye, nokuhindira? 24Navutswa wobulungi lwa a leka ubulungi bwibwe, nokukola ubudamano, nokukola kuli kivihiri kyosi kyomudamano a kolanga, uyu a la hindira? Mu vikolwa vivye vyobulungi vya ya kola vi la vula kwidzulitswa kali kilala kuvyo: mu lihyola lilye lya ya hyola, nomu bwoni bwibwe bwa ya kola, a la kudzira mu.
25Navutswa mwinye mu vola, Inzira ya Yahova si i veye inungi mba. Hulira kalunu, O inyumba ya Israeli: Inzira yange si i veye inungi? Tsinzira tsyenyu si tsi veye tsinkyamu? 26Mulungi lwa a girunkana nokuleka ubulungi bwibwe, nokukola budamano, na a kudzira mubwo; a la kudzira mu budamano bwa ya kola. 27Kandi, mudamano lwa a girunkana nokuleka ubudamano bwibwe bwa ya kola, na a kola aga dukana no bulungi, a honnya mwoyo gwigwe a la hindira. 28Kigira ya henza nokuleka amahyolo gege ga ya kola nokwirana, ligali uyu a la hindira, a la vula kukudza. 29Navutswa inyumba ya Israeli va volanga, Inzira ya Yahova si i veye inungi mba. O inyumba ya Israeli, tsinzira tsyange si tsi veye tsinungi? Tsinzira tsyenyu si tsi veye tsinkyamu? 30Kunangwa kigira yaga, nda kalagira mwinye, O inyumba ya Israeli, sa mulala kuli tsinzira tsitsye, Mwami Nyasaye a vola. Mwirane, mu girunkane nokuleka amahyolo genyu gosi; na ndiyo ubwoneku bu la vula kuva ku mwinye. 31Mu te amahyolo ge nyu gosi, aga mwa hyola mugo; mwelombere myoyo mihya na roho muhya: kigira ki mu la kudza, O inyumba ya Israeli? 32Kigira si mbeye nelisangala mu likudza lya uyu u kudzanga, Mwami Nyasaye a vola: kunangwa mu girunkane mwirane, mu hindire.
Currently Selected:
Ezekieli 18: MBE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1967
