Ezekieli 11
11
1Kandi Roho ya ng'inga igulu, na ya ndeta kuduka mu kiribwa kyevugwe kyenyumba ya Yahova, ki henza ku luvega lwevugwe: henza, va li ho ha kiliango kyekiribwa avasatsa makumi gaviri na vatano; na hagati havo nda lola Jaazania mwana wa Azuri, na Pelatia mwana wa Benaia, avanene vavandu. 2Na ya mbolera, Ive mwana womundu, yavo navandu ava saavira budamano, ava haananga makuva madamano mu lidala yili; 3ava volanga, Inyinga yelyombaka tsinyumba si i veye ahimbi mba: lidala yili li veye inyingu yokudeka, na kwinye ku veye inyama. 4Kigira yaga u profete kuvo, u profete, Ive mwana womundu.
5Na Roho wa Yahova ya gwa ku inze, na a mbolera, U vole, Yahova a volanga ndi: Ni ndiyo mwa vola, Mwinye avenyumba ya Israeli; kigira inze mmanya vindu vingira mu myoyo gyenyu. 6Mwinye mu medi avii twa venyu mu lidala yili, na mwizulitsi tsinzira tsyalyo aviitwa. 7Kigira yaga, Mwami Nyasaye a vola: Aviitwa venyu ava mwa vika hasi hagati halyo, yavo va veye inyama, nelidala yili li veye inyingu yokudeka; navutswa mwinye mu la letwa kyova kutwula hagati halyo. 8Mu tiye kivavi; na nda leta ku mwinye kivavi, Mwami Nyasaye a vola. 9Nda mu leta kyova mu twule hagati halyo, na nda mu vika mmakono gavageni, na nda kola likalaga hagati henyu. 10Mu la gwa ku kivavi; na nda mu kalagira mu tsinzako tsya Israeli; na mu la manya mbeye Yahova. 11Lidala yili si li la va inyingu yenyu mba, kandi mwinye si mu la va inyama hagati halyo mba; nda ku kalagira mu tsinzako tsya Israeli, 12na mu la manya inze mbeye Yahova: kigira si mwa genda mu malago gange mba, kandi si mwa gumira likalaga lyange, navutswa mwa londa miima gyetsihiri tsya :nu kumbiridza.
13Na ga duka, lwa nda profeta, Pelatia mwana wa Benaia ya kudza. Hene yaho nda gwa hasi mammama, na nda hanzuka nomwoyo munene, ni mbola, O, Mwami Nyasaye u la heridza ligali litigala lya Israeli?
14Na likuva lya Yahova lya duka ku inze, kuvola, 15Ive mwana womundu, vamwavo vovo, avamwavo vovo veligali, avandu va viko vovo, na vosi venyumba ya Israeli, yavo vosi, nivo yava ava menyi Yerusalemi va va voleye, Mwelehe ihale ku Yahova; kivala yiki kwinye kwa hebwa kuva miyandu gyetu. 16Kigira yaga ive u vole, Mwami Nyasaye a vola ndi: Kali ni nda va twulidza ihale mu tsihiri, na kali ni nda va salannya mu vivala vindi, navutswa kandi nda va kuvo, hatakatifu inyinga inkekeke mu vivala vya va duka mu. 17Kunangwa, u vole, Mwami Nyasaye a vola ndi: Nda mu vungidza mu twule mu avandu, nda mu vugannya halala mu twule mu vivala vya mwa salannywa mu, na nda mu ha kivala yiki kya Israeli. 18Na va la duka hano, na va la twulidza vindu vyalyo vyosi vyekivihiri, nekivihiri kyalyokyosi kutwula ha zana. 19Na nda va ha mwoyo mulala, na nda vika roho muhya mu mwinye; na nda twulidza mwoyo gwamagina mu mibiri gyavo, na nda va ha mwoyo gwenyama; 20va duke kugenda mu malago gange, nokugumira miima gyange nokugyikola: na va la va avandu vange, na inze nda va Nyasaye wavo 21Navutswa ku makuva ga yavo avemyoyo gyavo gyi londanga mwoyo gwevindu vyavo vyokuvihiriridza nekivihiri kvavo, nda leta inzira yavo ku mitwe gyavo, Yahova Nyasaye a vola.
22Hene yaho vakerubi va ginga tsimbaha tsyavo, netsingida tsya li ahimbi kuvo; nobukumi bwa Nyasaye wa Israeli bwa li igulu wavo. 23Nobukumi bwa Yahova bwa nina igulu kutwula hagati helidala, na bwa singira ku kigulu kyoluvega lwevugwe welidala. 24Na Roho ya ng'inga igulu, nokumbila mu malola mu Kalidei, netsingulu tsya Roho wa Nyasaye, kuduka ku yava avelyadikidzwa. Kunangwa malola ga ndalola ga twula ku inze. 25Hene yaho nda volera avelyadikidzwa makuva gevindu vyosi vya Yahova ya mmannya.
Currently Selected:
Ezekieli 11: MBE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1967
