Esther 8
8
1Ku lidiku yilyo mwami Ahasueru ya ha Esther mukali womwami, invumba ya Haman, musigu wa Vayuda. Na Mordekai ya duka imbiri womwami; kigira Esther ya vuula aga ya li kuye. 2Kandi mwami ya twulidza imingiri yeye, ya ya vugula ku Haman, na ya ha Mordekai. Na Esther ya nenehidza Mordekai ku inyumba ya Haman.
3Na Esther ya vola kandi imbiri womwami, na a gwa ha virenge vivye, na a mu goonya na maliga kutwulidza ubudamano bwa Haman Muagagi, na inkuva yeye ya ya kola ku Vayuda. 4Kunangwa mwami ya sona Esther nempimbo yethahabu yobwami, na Esther ya vuka na a singira imbiri womwami. 5Na ya vola, Nu u va nu u yanza inze, mwami, kandi ni mba ni nyoye livererwa imbiri wewe, na likuva yili ni li va ni li veye lilahi imbiri wewe, na inze ni mba ni nya nzeki imbiri wetsimoni tsitsye, ga ng'odwe kugirunkanya tsibaruwa tsya Haman, mwana wa Hamedatha Mua gagi, ya ng'odera kudividza Avayuda ava veye mu tsiprovinse tsyosi tsyomwami: 6kigira nyala ndi kwekudzira kulola ubudamano bu la duka ku avandu vange? Kinga nyala ndi kwekudzira kulola lidividzwa lya avandu vange? 7Kunangwa mwami Ahasueru ya volera Esther mukali womwami na Mordekai Mu yuda, na a vola, Henza, inze mmali kuha Esther inyumba ya Haman naye mwene va mali kumusunga ku musala, kigira ya hila mukono gwigwe ku Avayuda. 8Kandi mu ng'odere Avayuda, kuli mu yanza kung'oda mu lieta lyomwami, kandi mu vike ku muhuri gwemingiri yomwami; kigira mang'oda aga ng'odwa mu lieta lyomwami, nokuvikwa muhuri gwemingiri yomwami, si ha li nomu ndu u nyala kugirunkanya.
9Kunangwa avang'odi vomwami va langwa inyinga zana, mweli gwegyivaka, gu langwa mweli gwa Sivan, ku lidiku lya makumi gaviri na gavaka; na ga ng'odwa ku Vayuda kuli gosi aga Mordekai ya laga, noku vanyampara, noku vagovona, noku vanene vetsiprovinse bi veye ho kutwula India kuduka Ethiopia, tsiprovinse mia na makumi gaviri na tsitano na tsiviri, ku tsiprovinse sa indala ya ng'oderwa kuli ling'oda lyayo, noku avandu vosi va ng'oderwa kuli ululimi lwavo, noku Vayuda va ng'oderwa kuli ling'oda lyavo, na kuli ululimi lwavo.
10Na ya ng'oda mu lieta lyomwami Ahasueru, na ya vika muhuri gwemingiri yomwami, na ya hila tsibaruwa netsiposti tsyavo kunina ku tsiparasi, navandi avokunina ku tsyetsimbiru tsya tumekirwa mbutumiki bwomwami na tsivulwa ku tsinyama tsyomwami. 11Mu tsibaruwa zana, mwami ya ha Avayuda ava li mu madala gosi, munwa kuvugana halala, nokusingirira livamwoyo lyavo, nokwononnya, nokwii ta, nokudividza, tsingulu tsyosi tsya vandu naveprovinse avenya kuva twulira, navana vavo, na avakali vavo, nokuvugula ubutugi bwavo kuva vilanye, 12ku lidiku lilala, mu tsiprovinse tsyosi tsyomwami Ahasueru, lidiku li veye lyelikumi na gavaka lyomweli gwelikumi na gyiviri, gu langwa mweli gwa Adari. 13Na ling'oda lya li kuhilwa kuva lilaga mu tsiprovinse tsyosi sendala lya li kulandidzwa ku vandu vosi, kuvola, Avayuda vetegeke ku lidiku yilyo, kwevanzira kisalya ku vasigu vavo. 14Kunangwa avetsiposti ava nina ku tsinyama tsyetsimbiru tsya tumekirwa mu butumiki bwomwami va twula, va didikanywa nokutsuvwa na lilaga lyomwami; na lilaga lya twula mu Shushan inyumba yo mwami.
15Kandi Mordekai ya twula imbiri womwami, ni yevika tsingubo tsyo bwami tsyeblue na tsindavu, kandi netaji inene yethahabu ku mutwe gwigwe, kandi nengubo yeye yegulu yekatani indahi ya kiforosadi: na lidala lya Shushan lya hanzuka noku sangala. 16Na Avayuda va li nobulavu, nobusangali, nobuyanzi nokwidzominywa. 17Na mu tsiprovinse tsyosi sendala, na mmadala gosi sa lilala, na hosi ha lilaga lyomwami lya duka, Avayuda va li nobuyanzi nobusangali, nelilia neli diku lilahi. Na vanyingi ku vandu vekivala va gwa Avayuda; kigira litihidza lya Avayuda lya va gwira.
©Bible Society of Kenya, 1967