Esther 9
9
1Kunangwa mu mweli gwa likumi na gyiviri, gu veye mweli gwa Adari, ku lidiku lyelikumi na gavaka gagwo, lwa lilaga lyomwami na munwa gwigwe gwesunda himbi kukolwa, ku lidiku lya vasigu va Vayuda va suuvira kwameha kuvo (navutswa ga girunkannywa na Avayuda vameha ku yavo ava va dunyira), 2Avayuda vevungidza avene mmadala gavo mu tsiprovinse tsyosi tsyomwami Ahasueru, kugu mira yavo avenya kuvadambidza: na si ha li nomundu wa nyala kuva guuta; kigira litihidza lyavo lya gwa ku avandu vosi. 3Na avanene vosi vetsiprovinse, navanyampara, na ava govona, na vosi ava tumekira mwami, va konya Avayuda; kigira litihidza lya Mordekai lya va gwira. 4Kigira Mordekai ya li munene mu inyumba yomwami, na makuva geli dzominywa lilye ga landa mu tsi provinse tsyosi; kigira mundu uyu Mordekai ya; dasa kugwa munene kuvita. 5Na Vayuda va kuya avasigu vavo vosi neliduya lyekivavi, kandi neliita nelidividza, na va kolera yava ava va dunyira kuli venya. 6Kandi mu Shushan inyumba yomwami Avayuda viita nokudividza avandu tsimia tsitano. 7Na Pari shandatha, na Dalifon, na Asipatha, 8na Poratha, na Adalia, na Aridatha, 9na Parmashata, na Arisai, na Aridai, na Vaizatha, 10yava nivo avana avayai likumi va Haman mwana wa Hamedatha, musigu wa Vayuda, va viita; navutswa si va hila mukono gwavo ku vilanye vyavo.
11Ku lidiku yilyo livalidzwa lya vandu aviitwa mu Shushan inyumba yomwami lya letwa imbiri womwami. 12Na mwami ya volera Esther mukali womwami, Avayuda viiti nokudividza avandu tsimia tsitano mu Shushan inyumba yomwami, kandi avayai likumi va Haman; kunangwa va koli ki mu tsiprovinse tsyosi tsyomwami tsya tigala Kalunu wenya ki? Na u la hebwa: na liteva lilyo lindi li veye ki? Na li la kolwa. 13Ma Esther ya vola, Mwami na a va na a yanza, Avayuda va hebwe munwa mu Shushan va kole muga mba kandi kuli munwa gwa lero, navayai likumi va Haman va sungwe ku musala gwokusunga. 14Na mwami ya haana munwa ga kolwe ndiyo: na munwa gwa twula mu Shushan; na va sunga avayai likumi va Haman. 15Na Avayuda ava li mu Shushan vevungidza avene kandi ku lidiku lyelikumi na gane gomweli gwa Adari, na viita avandu tsimia tsivaka mu Shushan; navutswa si va hila mukono gwavo ku vilanye mba. 16Na Avayuda avandi ava li mu tsiprovinse tsyomwami vevungidza avene halala, na va singirira liva mwoyo lyavo, ni va nyola lisosa ku vasigu vavo, na viita yavo ava va dunyira avandu tsielfu makumi gatano na gaviri na tsitano; navutswa si va hila mukono gwavo ku vilanye.
17Inkuva yiyi ya kolwa ku lidiku lyelikumi na gavaka lyomweli gwa Adari; na ku lidiku lyelikumi na gane va sosa, na va lomba lidiku zana li ve lidiku lyelilia na lyelisangala. 18Navutswa Avayuda ava li mu Shushan vevungidza avene ku lidiku lyelikumi na gavaka, na kandi lyelikumi na gane; na ku lidiku lyelikumi na gatano va sosa, na va li lomba li ve lidiku lyelilia na lyelisangala. 19Kunangwa Avayuda ava li mu tudala na ava menya mu madala ga ta li netsingaga, va kola lidiku lyelikumi na gane lyomweli gwa Adari kuva lidiku lyobusangali na lyelilia, na lidiku lilahi, na lyokuhaanirana vihaanwa mundu sa mulala nowakye. 20Kandi Mordekai ya ng'oda vindu yivi, na a hila tsibaruwa ku Avayuda vosi mu tsiprovinse tsyosi tsyomwami Ahasueru, tsya li himbi na tsya li hale, 21kuvalaga va linde lidiku lyelikumi na gane lyo mweli gwa Adari, na lidiku lyelikumi na gatano lyomweli zana, ku muhiga no muhiga, 22kigira ga veye ma diku ga Vayuda va nyolera lisosa kuvasigu vavo, nomweli gwa girunka nywa kuvo kuleka buvereri kuva nobusangali, nokuleka lisyoma kuva lidiku lilahi; va lombe madiku yago ga ve madiku gelilia na gokusangala, nokuhaanirana vihaanwa sa mulala nowakye, nokuha avadaka vihaanwa. 23Na Vayuda va bugirira kukola kuli va tangi, na kuli Mordekai ya va ng'odera; 24kigira Haman mwana wa Hamedatha, Muagagi, musigu wa Vayuda vosi, ya li na a lombi makuva ku Vayuda kuvononya, naye ya li na a koli Puru, li veye kuvola kura kuvaheridza, nokuvononya; 25na vutswa lwa inkuva yiyi ya duka imbiri womwami ya haana munwa mu tsibaruwa tsiganagani tsindamano, tsya ya ganagana ku Vayuda, tsi galuke ku mutwe gwigwe, na uyu navana veve va sungwa ku kisunga.
26Kigira yaga va gulika madiku yago Purim, lieta li twula ku Puru. Kunangwa kigira makuva gosi geba ruwa yiyi, na makuva gevindu yivyo vya va loli mu inkuva yiyi, na inkuva ya duka kuvo, 27Avayuda va singeridza lilaga, na venyolera, navana vavo, na vosi ava hambana navo, ga vule kugota, kuvola va la gumira madiku yaga gaviri kuli mang'oda gago, na kuli inyinga yago, ya ga singeridzwa mihiga gyosi; 28kandi madiku yaga gidzulitswe nokulindwa mu visukululwi vyosi nomu viko vosi, nomu tsiprovinse tsyosi, na mu madala gosi; na madiku yaga ga Purim ga vule kugotidzwa hagati ha Vayuda, kandi lidzulitsa lyago li ta gota mu visukululwi vyavo mba. 29Kunangwa Esther mukali wo mwami, mwana wa Abihaili, na Mordekai Muyuda, va ng'oda netsi ngulu tsyosi kusingeridza ibaruwa ya kaviri ya Purim. 30Na ya tuma tsibaruwa ku Vayuda vosi, ku tsi provinse mia na makumi gaviri na tsitano na tsiviri tsyobwami bwa Ahasueru, na makuva gemirembe na ageligali, 31kusingeridza madiku yaga ga Purim ku tsinyinga tsyago kuli Mordekai Muyuda na Esther mukali womwami va va laga, na kuli avene vesingeridzira noku visukululwi vyavo, mu inkuva yelihonga lilia, na lilira lyavo. 32Na lilaga lya Esther lya singeridza makuva ga Purim; na ga ng'odwa mu kitabu.
©Bible Society of Kenya, 1967