Vafeso 5
5
1Kigira yaga mu ve avegi ku Nyasaye, kuli avana va yanzangwa; 2kandi mu gende mu buyanzi, kuli Kristo kandi ya mu yanza, na a haana livamwoyo lilye kigira kwinye, kihaanwa nesadaka ya Nyasaye i veye mwayu gwelifunya lilahi.
3Navutswa kutsia mbakana, nobudamano bwosi, kinga likayirwa, vi ta talwa mu mwinye mba, kuli aga dukira avatakatifu; 4kandi kifwabwi, kinga kuvola vya vutswa, kinga kukupa tsimbaka tsindamano, vi ta li vilahi: navutswa nubulahi kusantidza. 5Kigira mu manya ligali yaga, muheyi, kinga mudamano, kinga mukayirwi, u veye wemisambwa, si a veye nemiyandu kali mulala mu bwami bwa Kristo na Nyasaye. 6Mu ta leka mundu kali mulala a mu gade namakuva ga vutswa: kigira kyamakuva yaga ubutima bwa Nyasaye bu dukanga ku vana vobutingu. 7Kunangwa mu ta va avasangi halala navo; 8kigira kale mwa li kisundi, navutswa kalunu mu veye ubulavu mu Mwami; mu gende kuli avana vobulavu 9(kigira likuyu lyobulavu li veye mu bulahi bwosi nomu bulungi nomu ageligali), 10mu lungikidza ndiyo ki yanzekanga ku Mwami. 11Kandi mu ta va nelisanga nemiyinzi gyekisundi gyi tivanga, navutswa nubulahi mu gyi kyaye; 12kigira vindu vya va kola makiriri vi veye tsisoni kali kuvola. 13Navutswa vindu vyosi lwa vyambakanwa vi lang'aminyangwa nobulavu: kigira ku vyosi ki lang'aminyeywi ki veye ubulavu. 14Kigira yaga a vola, Vuka, ive u gonanga, simuguka u twule mu vakudzu, na Kristo a la ku letera ubulavu.
15Kigira yaga mu henze bulahi kuli mu genda, mu ta genda kuli ava ta li nobugeeri navutswa kuli avobugeeri; 16mwegulire ubwiyangu, kigira tsinyinga tsi veye tsindamano. 17Kigira yaga mu ta va avasiru, navutswa mu manye ubulaliri bwo Mwami. 18Kandi mu ta hambika iwaini i veye nekivihiri, navutswa mwizuye Roho. 19Mu volerane avene navene mu zaburi, nomu tsi nyimbu, nomu tsinyimbu tsyomu roho, mwimbe nornwoyo mulahi mu myoyo gyenyu ku Mwami; 20madiku gosi mu santidze Nyasaye, naye ni Dada kigira vyosi mu lieta lyo Mwami wetu Yesu Kristo; 21mwegehidzirane avene navene mu butii bwa Kristo.
22Mwinye avakali mwegehidze ku vasatsa venyu, kuli wa ga veye ku Mwami. 23Kigira musatsa a veye mutwe gwomukali kuli Kristo a veye mutwe gwelivugana, kandi mwene a veye muhonnyi womubiri. 24Navutswa kuli livugana lyegehidzira Kristo kandi ndiyo avakali vegehidze ku vasatsa vavo ku vyosi. 25Mwinye avasatsa, mu yanze avakali venyu kuli Kristo ya yanza livugana, ni yehaana kigira livugana; 26a duke kulitakasa lwa a mali kula vidza nelyogidza lyamadzi mu likuva, 27a duke kwenyolira livugana lyobukumi, li ta li nembala kinga makunya, kinga kindi kindu kuli yivi; navutswa li ve litakatifu li ta li nekindu. 28Na ndiyo kandi ga dukira avasatsa kuyanza avakali vavo kuli va yanzanga imibiri gyavo avene. U yanzanga mukali wewe mwene yeyanzanga: 29kigira ku vosi si ha veye nomulala wa vihirirwa inyama yomubiri gwigwe; navutswa a gu lagiridza nokugudenda, kuli Kristo a lindanga livugana; 30kigira kwinye ku veye vivero vyomubiri gwigwe. 31Kigira yaga mundu a la leka ise na nnya naye a la hambana nomukali wewe; yava navo vaviri va la gwa inyama indala. 32Agaviswa yaga ga veye manene: navutswa inze mbola amakuva ga Kristo nelivugana. 33Halala na yaga mwinye kandi sa mulala a yanze mukali wewe mwene kuli yeyanza; kandi mukali a henze a hulire musatsa wewe.
Currently Selected:
Vafeso 5: MBE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1967
