Kohelethu 6
6
1Bu veye ho ubudamano bwa nda lola isi weliuva, nabwo bu minanga nobuliduhu ku avana vavandu: 2mundu wa Nyasaye ya ha ubutugi nobuhinda, nelidzominywa, wa luha wa vula kugehera mu vyosi kindu kyomwoyo gwigwe gu kayirwa nakyo, navutswa Nyasaye si ya mu ha tsingulu tsyokulilia, navutswa umugeni niye a litsanga; yaga ga veye ga vutswa, kandi ga veye ubulwaye budamano. 3Mundu na a va ni yivula avana mia nokuhindira mihiga minyingi, kuduka amadiku gemihiga gyigye kuva minyingi, navutswa si yigutanga ubulahi mu mwoyo gwigwe, kandi kuvita yaga si a nyola livikwa mu kilindwa; inze mbola, inda ya tadza, nobugasu kuvita mundu uyu: 4kigira liva kuli yili lidzanga mu vya vutswa, kandi li twulanga mu kisundi, na lieta lyeliva yili li kunikangwa nekisundi; 5kandi si li loli liuva kinga kulimanya; liva yili li nyolanga lisosa kuvita yilyo: 6yee, kali na a va mwoyo mihiga elfu nokumeda hali kaviri, na a vula kunyola kusangalira ubulahi, si va tsitsanga ha bugono bulala vosi?
7Lididikana lyosi lyomundu li veye kigira munwa gwigwe, navutswa inzala yeye si yiguta. 8Kigira wobugeeri a veye ne vyambeti ki kuvita wobusiru? Kinga umudaka a veye na ki, u manyanga kutsia imbiri wa va veye mwoyo? 9Kulola netsimoni nobulahi kuvita kuvoyavoya nelikayirwa: yaga kandi na ga vutswa nokudidikana ku imbuudza.
10Ku vyosi vya li ho, lieta lyavyo lya gulikwa kale, na la manyekana kuva a veye mundu; kandi si a nyala kuhing'ana na uyu wobunyali kumuvita. 11Kigira vi veye ho vindu vinyingi vi medanga ga vutswa, mundu a nyola vyambeta ki? 12Kigira ni bwaha u manya ni kindu ki ki konya mundu mu limenya lilye, madiku gosi gelimenya lilye lya vutswa ga a menyanga kuli kiriri vutswa? Kigira ni bwaha u nyala kuvolera mundu makuva ga li mu londa inyima isi weliuva?
©Bible Society of Kenya, 1967