Kohelethu 7
7
1Lieta lilahi nobulahi kuvita maguta gobuguli budinyu; nelidiku lyelikudza, ni lilahi kuvita lidiku lyelivulwa lyomundu. 2Nobulahi kutsia ku inyumba ya va syomanga mu, kuvita kutsia ku ya va litsanga mu lisavo: kigira ni kyekiheri kyavandu vosi, uyu u veye mwoyo a la ganagana mmwoyo gwigwe. 3Livererera ne lilahi kuvita liseka: kigira mwoyo gu sangalitsangwa neli vererera lyommoni. 4Mwoyo gwo mugeeri gu veye mu inyumba ya va syomanga mu; navutswa mwoyo gwa vasiru gu veye mu inyumba yobukino.
5Nobulahi kuhulira ligondoka lyavageeri, kuvita mundu kuhulira lwi mbu lwavasiru. 6Kigira kuli liva lyomwoyo gwa mafwa ga twulikanga isi wenyingu, ni ndiyo liseka lyomu siru li veye: yaga kandi na ga vutswa. 7Ligali linyaga li kolanga umundu mugeeri kuva musiru; na vikukula vyi gotidzanga limanya. 8Kiheri kyekindu ni kilahi kuvita litanga lyakyo: na u veye mwekudziri mu mwoyo nomulahi kuvita u veye nomwoyo gwoluyai. 9U ta va nomwoyo gwokuhyuhyukana kuduka kuvihirirwa: kigira ubutima bu me nyanga mu viritu vyavasiru. 10U ta vola, Kigira ki madiku ga kale kuva malahi kuvita madiku ga ka lunu? Kigira si u tevanga nobugeeri mu inkuva yiyi.
11Ubugeeri nobulahi kuli miya ndu: yee, bu veye nobukonyi ku yavo ava lolanga liuva. 12Kigira ubugeeri bu veye lidigi, kuli ifetha i veye lidigi: navutswa ubulahi bweli manya bu veye ndi, ubugeeri bu veye lugaga lwelivamwoyo lya uyu u veye nabwo. 13Mu ganagana ligali mi yinzi gya Nyasaye: kigira ni bwaha u nyala kulungikidza kindu kya ya lomba bukyamu? 14Mu lidiku lyokugasidzwa u sangale, nomu lidiku lyekivi u ganagane: yee, Nyasaye ya lomba kilala kulindana ne kindi, kuduka mundu a vule kumanya ki li duka inyima wewe.
15Yaga gosi nda ga lola mu madiku gange ga vutswa: a veye ho mundu mulungi u divanga mu bulungi bwibwe, kandi a veye ho mundu mudamano u tsitsagil'langa mu livamwoyo lilye mu vikolwa vivye vyobukyamu. 16U ta va nobulungi ubu vitiriru; kandi u tekola kuva nobu geeri ubuvitiriru: wedividze kigira ki? 17U ta va mudamano ligali, kandi u ta va musiru: u kudze inyinga yoyo i kikiri kuduka, kigira ki? 18Nobu lahi u gumire likuva yili; yee, u ta twulidza mukono gugwo ku likuva yili: kigira uyu u tidzanga Nyasaye a la twula mu yaga gosi.
19Ubugeeri bu veye tsingulu ku uyu u veye nobugeeri kuvita avamehanga likumi va veye mu lidala. 20Ligali si ha veye nomundu wobu geeri mulala ku lirova, u kolanga bulahi, nokuvula kukola ubwoni. 21Kandi u ta linda makuva gosi aga volangwa, gase u la hulira mutugwa wowo na a ku nyeganga; 22kigira hali kanyingi mwoyo gugwo gu manya ive mwene kandi u nyegi avandi.
23Vindu yivi vyosi mmali kuvihenzeridza mu bugeeri: nda vola, Inze nda va nobugeeri; navutswa bwa li ihale ninze. 24Aga veye yo, i veye ihale ligali kandi ga veye noluliva ligali: ni bwaha u nyala kugavangula? 25Nda vodonkana, nomwoyo gwange gwa vikwa ku limanya nokuvangula, nokwenya ubugeeri na kivune kyevindu, nokumanya ubudamano ni bwobusiru, nobusiru nibwo ubulalu. 26Na ndola kindu kuvita litsunwa lyelikudza, ni uyu mukali womwoyo gwigwe gu veye mitego neviveto, na makono gege nevibohero: ku vosi u yanzidza Nyasaye a la nozoka ku mukali uyu; navutswa wobwoni a la gumirwa. 27Henza, ndoli yaga, Mwilwadzi a vola, ni neng'annya kindu yiki neyiki, kumanya livalidza; 28lyomwoyo gwange gwenyanga, navutswa si ndoli mba: musatsa mulala mu avandu elfu mmu loli; navutswa mukali mulala mu yavo vosi si mmu loli mba. 29Henza ndoli likuva yili; Nyasaye ya lomba mundu mulungi; navutswa venyanga vya va visaavira vinyingi.
©Bible Society of Kenya, 1967