Kohelethu 5
5
1U linde kirenge kikyo lwa u tsitsanga mu inyumba ya Nyasaye; kigira kwisunda ku lihulira nobugasu kuvita vihaanwa vya vasiru: kigira si va manya va kola budamano. 2U ta gwirirana mu livola nomunwa gugwo, kandi mwoyo gugwo gu ta va umbitiriru mu livola kindu kali kilala imbiri wa Nyasaye; kigira Nyasaye a veye migulu, na ive u veye ku lirova: kigira yaga makuva gogo ga ve makekeke. 3Kigira maloto gadzanga halala nelididikana linyingi; nomwoyo gwomusiru gudzanga halala nobunyingi bwamakuva. 4Nu u va nu u vikira Nyasaye vya wa lagana, u ta lindagira ku litunga; kigira si a sangaliranga avasiru: u tunge vya wa lagana. 5Nobugasu u vule kulagana ligali, kuvita kulagana nokuvula kutunga. 6U ta leka munwa gugwo kwikigitalidza mubiri; kandi u ta vola imbiri wengelosi, nda li kuhyola: kigira ki Nyasaye a vihirirwa mwoyo gugwo, nokudividza miyinzi gyamakono gogo? 7Kigira ku bunyingi bwamaloto ga veye ga vutswa, na mmakuva manyingi: navutswa ive u tie Nyasaye.
8Nu u va nu u lola avadaka ni va dambidzangwa, nelikalaga nobulungi kutwulidzwa nekirage mu kivala, u ta genyira yaga: kigira mulala a veye igulu ligali kuvita yavo ava veye igulu a henzanga, kandi va veye ho ava veye igulu kuvita yava. 9Kandi halala na yaga vyambeti vyekivala vi veye ku vosi: na mwami muene a tumekirangwa nomulimi.
10Uyu u yanza ifetha si a liguta ifetha; kandi uyu u yanza bunyingi bwevindu, si a liguta limedeka: yaga kandi na ga vutswa. 11Lwa vindu vi medekanga, ava vi litsanga kandi va medekanga; kandi ha veye nevyambeti ki ku uyu u veye navyo, ni li ta li livilola netsimoni tsitsye? 12Tsindolo tsyomuyinziri tsi veye tsinolu, na a va na a liye vikekeke naho na a liye vinyingi: navutswa lihindahala lyomutugi si li mu leka a nyole tsindola mba.
13Bu veye ho ubudamano bu letanga bulwaye bwa nda lola isi weliuva, nabu o ni yibu, ubutugi bwomwene yevikira bu litsanga mwoyo gwigwe mwene: 14ubutugi yibu bu divanga ku ligwirwa nekindu kivi; na a va ni yivula mwana muyai, si a veye nekindu mmukono gwigwe. 15Kuli ya twula munda mwa mama wewe, a la tsia ndiyo kyahonyo kuli vadza, na si a la hila kindu kali kilala kyelididikana lilye, kya a nyala kuhila mmukono gwigwe. 16Yaga kandi ga veye ubudamano bululu, kuli yadza a la tsia ndiyo: kunangwa uyu u nyankananga ku imbuudza a nyolanga ki? 17Madiku gege gosi a litsanga mu kisundi, na a vereranga ligali, nokunyola ubulwaye nobudunyi.
18Henza, yaga aga ndola kuva malahi agokukonya mundu, a lie nokunwa, nokusangalira vindu vilahi mu lididikana lilye lyosi, lya a didikananga mu isi weliuva, madiku gosi gelivamwoyo lilye lya Nyasaye ya mu ha: kigira yiki ni kidieli kikye. 19Kandi mundu sa mulala wa Nyasaye ya ha ubutugi nobuhinda, nokumuha tsingulu a lie vindu zana, nokuvugula kidieli kikye nokusangalira lididikana lilyeyiki ni kihaa nwa kya Nyasaye. 20Kigira si a lidzulitsa ligali madiku gelivamwoyo lilye; kigira Nyasaye a mu tivulira mu ubusangali bwomwoyo gwigwe.
©Bible Society of Kenya, 1967