Kohelethu 4
4
1Hene yaho ndirana nokulola vyosi vyekirage vi kolangwa isi weliuva: na, henza, amaliga ga yavo ava dambidzangwa, na si va veye nomundu kuvaleminya mwoyo; noku luvega lwa yavo ava va dambidzanga tsingulu tsya li ho; navutswa si va li nomundu kuvaleminya mwoyo. 2Kunangwa, kigira yaga ndidzominya avakudzu ava kudza kale, kuvita avelivamwoyo va kikiri mwoyo; 3yee, nobulahi kuvita yava vosi ndidzominya uyu u kikiri kuva ho, u kikiri kulola miyinzi midamano gyi kolangwa isi weliuva.
4Kandi nda lola mu makuva gelididikana lyosi nomu miyinzi gyosi gyobusidza, mundu a kendekerangwa na vakye veye kigira yaga. Yaga kandi ga veye ga vutswa, nokudidikana ku imbuudza. 5Musiru yeku mbereranga, na yelitsanga mwene. 6Luhe lulala, halala nemirembe, lu veye nobulahi kuvita tsimpi tsiviri halala nelinyankana nokudidikana ku imbuudza.
7Ma ndirana nokulola vya vutswa isi weliuva. 8A veye yo mulala muderwa na si a veye no wa kaviri; yee, si a veye nomwana kinga amwavo; navutswa lididikana lilye si li veye nekiheri, kandi tsimoni tsitsye si tsigutanga ku butugi bunyingi mba. A vola, Inze nyankana kigira bwaha, nokwima mwoyo gwange ubulahi? Yaga kandi na ga vutswa, yee, bu veye linyankana linene. 9Vaviri nobulahi kuvita mulala, kigira va nyolanga madanyi malahi ku linyankana lyavo. 10Kigira mulala na a gwa, wakye a la mbukidza; navutswa bayaye ku uyu u veye muderwa lwa a gwa, si a veye nowundi kumuvukidza. 11Kandi, vaviri ni va gona halala, va nyolanga uluya: navutswa mulala yeng'ine a nyala ndi kunyolauluya? 12Kandi ku vosi mundu na a guuta uyu muderwa, vaviri va la hing'ana naye; na mugoye gwemigoye gyivaka si gu nyala kukalika bwangu.
13Musoleli u veye mudaka wobugeeri a veye mulahi kuvita mwami musakulu wobusiru, u ta manyi ku bugirira lyegidzwa kandi. 14Kigira ya twula mbuhambe kuva mwami; yee, kali mbwami bwibwe yivulwa mudambi. 15Nda lola ava veye mwoyo vosi ava gendanga isi weliuva, va li halala nomusoleli uyu, wa kaviri, ya singira mbugono bwibwe. 16Avandu vosi si va li nekiheri, vosi ava ya li igulu kuvo: navutswa vosi ava lidza inyima wewe si va la sangala kuye mba. Ligali yaga kandi na ga vutswa, nokudidikana ku imbuudza.
©Bible Society of Kenya, 1967