Amosi 7
7
1Mwami Nyasaye ya mbuulira yili: na, henza, ya lomba tsisigi mu litanga lyelisibuka lyenyima; na, henza, lya li limera inyima welitimula lyomwami. 2Na ga duka, lwa tsya mala kulia bunyasi bwekivala, hene yaho nda vola, O Mwami Nyasaye, nku saala ligali, u samehe: Yakobo a la singira ndi? Kigira a veye muke. 3Yahova yeganira mu inkuva yiyi: la vula kuva, Yahova a vola.
4Mwami Nyasaye ya mbuulira yili: na, henza, Mwami Nyasaye ya langa kuhing'ana nomuliru; nagwo gwa samba luliva lunene, kandi gwenya kusamba kivala kyumu. 5Hene yaho nda vola O Mwami Nyasaye, nku saala ligaii, leka: Yakobo a la singira ndi? Kigira a veye muke. 6Yahova yeganira mu inkuva yiyi: Yiyi kandi i la vula kuva, Mwami Nyasaye a vola.
7Mwami Nyasaye ya mbuulira yili: na, henza, Yahova ya singira ku lidigi lyombakwa neligera lyeplum, na ya li nomugoye gwe iplum mmukono gwigwe. 8Na Yahova ya mbolera, Amosi, u lola ki? Na nda vola, Ndola mugoye gwe iplum. Hene yaho Yal hova ya vola, Henza, nda vika mugoye gwe iplum mu avandu vange Israeli; si nda va leka kandi mba; 9na hadiguluku ha Isaka ha la va ahere, na hatakatifu ha Israeli ha la kolwa kyanyi; na nda singira nekivavi ku inyumba ya Jeroboam.
10Kunangwa Amazia musalisi wa Beth-eli ya tuma avandu ku Jeroboam mwami wa Israeli, na a vola, Amosi u ku koleye tsimbemba hagati ha inyumba ya Israeli: na kivala si ki nyala kuginga makuva gege gosi. 11Kigira Amosi u voye, Jeroboam a la kudza nekivavi, na Israeli ligali a la hilwa kutwula mkivala kikye kutsia mbuhambe. 12Kandi Amazia ya volera Amosi, O ive muloli, wiruke, u tsie mu kivala kya Yuda, u lie yo vyokulia, u profete yo: 13navutswa u ta profeta kandi ha Beth-eli; kigira ha veye hatakatifu homwami, nayo ni inyumba yobwami.
14Hene yaho Amosi ya tivulira Amazia na a mu volera, Inze si nda li muprofeti, kandi si nda li mwana womuprofeti; navutswa nda li mwayi wetsing'ombe, kandi nda li mulindi wemikuyu: 15na Yahova ya mbugula mu kyayo, na Yahova ya mbolera, Tsia, u profetere avandu vange Israeli. 16Kunangwa kalunu u hulire likuva lya Yahova: Ive u mboleranga, U ta profeta ku Israeli, kandi u ta haana likuva lilyo ku inyumba ya Isaka; 17kigira yaga Yahova a vola: Mukali wowo a la va wamalaya mu lidala, navayai vovo navakana vovo va la gwa ku kivavi, nekivala kikyo ki la gavulwa nomugoye; na ive mwene u la kudzira mu kivala kidamano, na Israeli ligali a ladikidzwa a twule mu kivala kikye.
Currently Selected:
Amosi 7: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
