Vikolwa 24
24
1Inyima yamadiku gatanu musalisi munene, Anania ya sulunguta halala navakulundu valala nomwilwadzi mulala wa langwa Tertulo; ni va lungika govuna ku amakuva ga Paulo. 2Kandi Tertulo lwa ya langwa ya tanga kumuyalira, na a vola.
Kigira kwinye kwa nyola mirembe minene ku ive, kandi ku lihenza lilyo ubudamano bunyingi bu ta kolwa mu ihiri yiyi, 3kwinye ku ga bugirira mudiku gosi nomu tsimbega tsyosi nelisantidza lyosi, Felike mulahi. 4Navutswa nta ku sinya kandi, nku saala, u ku hulire amakuva makekeke ku buhoma bubwo. 5Kigira kwinye ku mali kulola mundu uyu kuva mundu mudamano ligali, nu mugemehidzi mu Vayuda vosi mu vivala vyosi mu lirova, kandi nu munene ku lyahuka lya Vanazareti: 6kandi ya geridza kwononnya litempeli: wa kwa gumira: nokwenya kumukalagira kuli amalago getu. 7Navutswa Lusia, munyapala munene, yaduka, na a ku nyaga mu mikono gyetu netsingulu tsinene, 8na a laga ava mu yala kuudza ku ive. Lwa u mu teva u la nyala kumanya kuye amakuva gosi ga ku mu yalira. 9Kandi Avayuda va bugirira, ni va vola vindu yivi ni ndiyo vya li.
10Govuna lwa ya mu sima a vole amakuva, Paulo ya tivula.
Kigira mmanya ive u veye mukalagi wehiri yiyi imihiga minyingi, ntivula nobuyanzi: 11kandi kigira ive u nyala kumanya ligali madiku si ga viti likumi na gaviri kutwula inyinga ndanegira Yerusalemi kusigama: 12kandi si va nyola ni mbangalidza mundu kali mulala mu litempeli, kandi si va nyola ni ngemehidza kiduma kinga mu masomero kinga mu lidala. 13Kandi si va nyala kulungikidza ku ive amakuva ga va nzalira. 14Navutswa yaga nziyama ku ive, ku Inzira ya va langa lyahuka nsigamira Nyasaye wa vaguga vetu, nsuuvira vindu vyosi vya hambana nelilaga, kandi vya ng'odwa mu vaprofeti; 15mbeye nelisuuvira ku Nyasaye lya yava kandi va linda, li la va lisimugukidzwa lyavalungi navo ava ta li valungi. 16Ku yaga nzidinyiridza kazozo nduke kuva nomwoyo gu ta li nekindu kidamano imbiri wa Nyasaye kandi imbiri wavandu. 17Kalunu inyima yemihiga minyingi nda duka kuletera ihiri yange tsisadaka nevihaanwa: 18ku yivi va nyola ni ntakaswa mu litempeli, si nda li nekiduma kandi si nda li neliyoga: navutswa va li ho Avayuda valala va Asia 19ava ga dukira va ve hano kunzalira imbiri wowo, ni va veye namakuva ku inze. 20Kinga avandu yava avene va vole ubwoni bwa va lola lwa nda singira imbiri wekyina, 21navutswa kigira likuva lilala yili lya nda gamba imbiri wavo, Nzalirwa iinbiri wenyu lero kigira lisimugukidzwa lyavakudzi.
22Navutswa Felike, inyinga ya manya bulahi miima gye Nzira yiyi, ya va lindidza na a va volera, Lusia munyampara munene lwa a duka nda kalaga likuva lyenyu. 23Ya ha munyampara munwa Paulo a lindwe, navutswa a ve nobwiyangu; kandi a tigalira avalina veve kali mulala va mu tumekire.
24Navutswa inyima yamadiku makekeke Felike yadza halala nomukali wewe, Dirusila wa li Muyuda, na a langa Paulo, na a mu hulira ku makuva gelisuuvira Yesu Kristo. 25Paulo lwa yilwadza ku bulungi, kandi ku kwelinda bulahi, nelikalaga lidzanga, ubutii bunyingi bwa gumira Felike, kandi ya tivula na a vola, Kalunu u tsie; na inze lwa na ndole ubwiyangu na nku lange. 26Ya lindirira Paulo a mu he tsishilling: kigira yiki ya hongera kumulanga na a volerana naye. 27Navutswa lwa gya vita imihiga gyiviri Porikio Festo ya hila ubwami bwa Felike; na Felike kigira yenya kukolera Avayuda kindu kya va mu yanzira, ya leka Paulo mu libofwa.
Currently Selected:
Vikolwa 24: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
