Vikolwa 23
23
1Ma Paulo yumika kyina na a vola, Avamitu, ng'endi imbiri wa Nyasaye nomwoyo mulahi kuduka lero. 2Musalisi munene Anania ya laga, ava singiye himbi naye, va mu duye mmunwa. 3Hene yaho Paulo ya mu volera, Nyasaye a la ku duya, ive lidigi lya homwa nobudohi bulavu: ive wikala kunkalagira kuli lilaga, navutswa u haana munwa nduyirwe ku mwima gu ta li kuli lilaga? 4Na yava ava singira himbi va vola, U nyega musalisi munene wa Nyasaye? 5Paulo ya vola, Avamitu, si nda manya a veye musalisi munene: kigira ga ng'odwa, U ta vola ubuda mano ku munene wavandu vovo. 6Navutswa Paulo lwa ya lola kidieli kilala nekya Vasadukayo nekindi nekya Vafarisayo, ya hanzuka mu kyina na a vola, Avamitu, inze mbeye Mufarisayo, kandi mbeye mwana wa Vafarisayo: ku lisuuvira nelisimugu kidzwa lyavakudzi, yiki ni kigira ndetwa mu kyina. 7Lwa ya mala kuvola ndi, amahangali ga tanga ku Vafarisayo na Vasadukayo; kiduma kyavukana. 8Kigira Avasadukaya va vola si ha veye nokusimugukidzwa, kinga ingelosi, kinga roho; navutswa Avafsrisayo veyama gosi. 9Lya twula liyoga linene: avang'odi avalala ku Vafarisayo va singira ni va hing'ana, ni va vola, Si ku lola ubudamano ku mundu uyu: kandi na a va roho kinga ingelosi a volerana naye, ni kindu ki? 10Lwa ga twula ama hangali manene, munyampara mu nene ya tia gase va la tandula Paulo, na a ha avasikari munwa vike va tsie kumutwulidza netsingulu hagati havo nokumuleta mu lugaga lwavasikari. 11Kandi ubudiku yibwo Mwami ya singira himbi naye, na a vola, U leme mwoyo: kidra kuli u lolekidzi ku inze mu Yerusalemi, u la lolekidza kandi ndiyo mu Romi.
12Lwa bwa kya Avayuda va hambana halala, ni visuha, ni va vola, si va nyala kulia, kandi si va nyala kunwa va kikiri kwiita Paulo.
13Avisuhirana va vita amakumi gane. 14Ni va tsia ku vasalisi vanene navakulundu, ni va vola, Ku mali kwisuha lisuha linene ku ta tsatsama kindu ni ku kikiri kwiita Paulo. 15Kunangwa mwinye, halala nekyina, mu volere munyampara munene, a mu lete hasi ku mwinye kuli mwenya kumanya ligali amakuva gege: na kwinye kwetegeki kumwiita na a kikiri kuduka himbi. 16Navutswa mwifwa wa Paulo ya hulira liseta lyavo, ni yadza ni yingira mu lugaga lwavasikari na a volera Paulo. 17Paulo ya langa mulala ku vanyampara na a mu volera, Hila muyai uyu ku munyampara munene; kigira a veye nelikuva kumuvolera. 18Kunangwa ya mu vugula na a mu hila ku munyampara munene, na a vola, Paulo muhambe ya nanga ni ya nyenya nku letere muyai uyu, a veye nelikuva kukuvolera. 19Mu nyampara munene ya mu gumira mukono, na a mu hila haluvega na a mu teva makiriri, I kindu ki kya we nya kumbolera? 20Kandi ya vola Avayuda va mali kulagana va ku save u lete Paulo imbiri wekyina mugamba, kuli venya kwizoza amakuva gege. 21Navutswa u ta bugirira amakuva gavo: kigira avandu va vita amakumi gane va mu setera, va mali kwisuha va ta lia, kandi va ta nwa va kikiri kumwiita: kalunu vetegeki, va linda lisuuviridza lilyo. 22Kunangwa munyampara munene ya leka muyai a tsie, na a mweganehidza, U ta volera mundu kali mulala, u mali kumbolera amakuva yaga. 23Ya langa avanyampara vaviri na a vola, Mu lombe avasikari tsimia tsiviri va tsie kuduka Kaisaria, navasikari ava nina ku tsiparasi amakumi gatanu na gaviri, navasikari avamatimu tsimia tsiviri, va tsie ubudiku tsisaa tsivaka. 24Kandi ya va voleva va lombe tsiparasi tsi ginge Paulo, ni va mu hila bulahi kuduka wa Felike govuna. 25Na a ng'oda ibaruwa kuli lugano yilu.
26Klaudio Lusia ku mwami mulahi, Felike govuna, mirembe. 27Mu ndu uyu, Avayuda va gumira, ni venya kumwiita, hene yaho inze nda duka kuvo navasikari ni mhonnya lwa nda hulira a veye Muromi. 28Ni nyenya kumanya kindu kya va mu yalira, nda mu leta imbiri wekyina kyavo: 29wa nda lola va mu yalira ku makuva gelilaga lyavo, navutswa si a li nekindu kuye kyokumwiitira kinga kyokumuboha. 30Kandi lwa nda hulira a la seterwa, nonoho nda mu leta ku ive, kandi nda volera avenya kumuyalira vadze kuvola amakuva imbiri wowo. 31Ku, avasikari va vugula Paulo, kuli va hebwa munwa, ni va muhila mu budiku kuduka Antipatiri. 32Navutswa mugamba va leka ava nina ku tsiparasi kutsia naye, ni virana mu lugaga lwavasikari. 33Navo lwa va duka Kaisaria va ha govuna ibaruwa ni va vika Paulo imbiri wewe. 34Kandi lwa ya mala kugisoma, ya teva a veye mundu wekivala ki; kandi lwa ya manya a veye mundu wa Kilikia, 35ya vola, Nda ku hulira ku gosi inyinga avenya kukuyalira vadza: na a haana munwa a lindwe mu inyumba ya Herodi.
Currently Selected:
Vikolwa 23: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
