2 Samweli 12
12
1Na Yahova ya tuma Nathan a tsie ku Daudi, Naye ya duka kuye, na a mu volera makuva yaga, Va li ho avandu vaviri mu lidala lilala; mulala ya li mutugi, nowundi mudaka. 2Mutugi ya li nevyayo vyamagondi netsing'ombe vinyingi ligali; 3navutswa mudaka si a veye nekindu, ni i ta li kimeme kyeligondi kilala kikekeke kisuveni, kya ya gula na a ki lera: nakyo kya li halala naye, nokuviruka halala navana veve; na kya lia ku vyokulia vivye, na kya nwa ku kikombe kikye, na kya gona mu kiritu kikye, nakyo kya li kuye kuli mukana wewe. 4Nomugeni yadza ku mutugi, naye ya sula kuvugula mutugu ku kyayo kikye kyamagondi nokyayo kikye kyetsing'ombe, kulombera mugeni u duki kuye, navutswa ya vugula kimeme kyeligondi kyomudaka, na a ki lombera mugeni u duki kuye. 5Ma ubutima bwa Daudi bwaaka ku mundu uyu; naye ya volera Nathan, Kuli Yahova a veye mwoyo, umundu uyu wa kola inkuva yiyi u dukani nelikudza: 6na a lirannya kimeme kyeligondi hali kane, kigira ya kola inkuva yiyi, kandi kigira ya vula kuva netsimbabasi.
7Na Nathan ya volera Daudi Ive niye mundu zana. Yahova Nyasaye wa Israeli a ku volera ndi, Inze nda ku vaka maguta u ve umwami ku Israeli, na nda ku honnya ku mukono gwa Saulo: 8na nda ku ha inyumba yomunene wowo, navakali vomunene wowo nda ku ha mkiritu kikyo, na nda ku ha inyumba ya Israeli na Yuda; na kandi yaga ni ga va ni ga li kugeha, nkano inze nda ka ku meda yivi na yivi. 9Kigira ki ive u legi likuva lya Yahova, nokukola agobudamano imbiri wewe? Ive u kuye Uria Muhiti nekivavi, na u vuguye mukali wewe kuva mukali wowo, na u mwiiti nekivavi kyavana va Amon 10Kunangwa kalunu kivavi si ki la twula mu inyumba yoyo mihiga nemihiga, kigira u legi inze, na u vuguye mukali wa Uria Muhiti a ve mukali wowo. 11Yahova a ku volera, Henza, nda vukidza budamano ku ive mu inyumba yoyo mwene; na nda vugula vakali vovo imbiri wetsimoni tsitsyo, nda va haana ku mutende wowo naye a la gona navakali vovo mu bulavu bweliuva yili. 12Kigira ive wa kola inkuva yiyi makiriri: navutswa nda kola yaga imbiri wa Israeli vosi, na imbiri weliuva. 13Na Daudi ya volera Nathan, Nkoleye Yahova ubwoni. Na Nathan ya volera Daudi, Yahova u twulidzi ubwoni bubwo; u la vula kukudza. 14Navutswa, kigira ive wa haana ku vasigu ubwiyangu bunene bwokunyega Nyasaye, ku likola yili umwana wivulwa ku ive ligali a la kudza. 15Na Nathan ya twula mu inyumba yeye.
Na Yahova ya kuya mwana wa muka Uria yivulira Daudi, na ya li mulwaye ligali. 16Kunangwa Daudi ya saala Nyasaye kigira mwana; na Daudi ya honga lilia, na yingira, na a gona hasi ubudiku bwosi. 17Navakulundu venyumba yeye va vuka, ni va singira himbi naye kumbukidza hasi: navutswa ya sula kandi si ya lagira halala navo. 18Na ga duka ku lidiku lya kola gatano na gaviri mwana ya kudza. Navatumekiri va Daudi va tia kumuvolera, Mwana u kudzi, kigira va vola, Henzi, lwa mwana ya li na a kikiri mwoyo, kwa mu volera, naye si a ku hulira mba: a lekupidza ndi kivi, ni ku va ni ku mu volera, Mwana u kudzi 19Navutswa Daudi lwa ya lola vatumekiri veve ni va monyananga halala, Daudi ya manya mwana u kudzi; ma Daudi ya teva vatumekiri veve, Mwana u kudzi? Navo va mu volera, Yee, u kudzi. 20Hene yaho Daudi ya vuka hasi, ni yesinga, ni yevaka maguta, nokwivika tsingubo tsindi; ni yingira mu inyumba ya Yahova, na a sigamira: ma ya tsia mu inyumba yeye mwene; na lwa ya laga, va mu lombera ubukima, na a lagira. 21Hene yaho vatumekiri veve va mu teva, Inkuva ki yiyi ya u koli? Wa honga lilia nokulilira mwana, lwa ya li mwoyo, navutswa lwa a kudzi, wa vuka no u lagira ubukima. 22Naye ya va volera, Lwa mwana ya li na a kikiri mwoyo, nda honga lilia nokusyoma: kigira nda vola, Ni bwaha u manya Yahova a la mbererera, ku mwana a hone? 23Navutswa kalunu u kudzi, kigira ki mbonge lilia? Nyala kumwirannya kandi? Inze nda tsia kuye, navutswa uyu si a lirana ku inze mba.
24Na Daudi ya leminya mwoyo gwa Bath-sheba mukali wewe, naye ya duka kuye, na a gona naye: ni yivula mwana muyai, na ya gulika lieta lilye Solomoni. Na Yahova ya mu yanza; 25naye ya tuma nomukono gwa Nathan muprofeti; naye ya mu gulika lieta lilye Jedidia, kigira Yahova.
26Na Joaou ya lwana na Raba lyavana lya Amon, na a vugula lidala lyobwami. 27Na Joabu ya tuma vatumwa ku Daudi, na a vola, Inze mali kulwana na Raba; yee, mbuguye lidala lyamadzi. 28Kunangwa kalunu u vungidze avandu va tigaye i halala, nokuvalohidza kulidala, nokulivugula; gase inze nda vugula lidala, na li la gulikwa lieta lyange. 29Na Daudi ya vungidza avandu vosi halela, na a tsia Raba, na a lwana nalyo, na a li vugula. 30Na ya vugula itaji yomwami ku mutwe gwigwe; bulidihu bwayo bwa duka italenta indala yethahabu, namagina agobuguli budinyu ga li muyo; nayo ya vikwa ku mutwe gwa Daudi. Na ya vugula vilanye vyelidala, vinyingi ligali. 31Na ya leta kyova avandu ava li mu lidala, na a va vika isi wemisameno, na isi wetsimbivu tsyevivya, na isi wetsimbadzi, na a va niga kuvita hagati ha kisambiru kyamatafali: na ya kola ndiyo ku madala gosi gavana va Amon. Na Daudi navandu vosi virana Yerusalemi.
©Bible Society of Kenya, 1967