2 Samweli 11
11
1Na ga duka, ku muhiga gwa londa, inyinga yavami va twula kutsia mbulu ani, Daudi ya tuma Joabu, navatumekiri veve, halala na Israeli vosi; na va dividza avana va Amon, nokukumbiridza Raba. Navutswa Daudi mwene ya menya ha Yerusalemi.
2Na ga duka inyinga ya mgolova Daudi ya vuka ku kitali kikye, na a genda ku igulu wenyumba yobwami: na lwa ya li igulu ya lola mukali ni yisinganga: nomukali zana ya li weligondo lilahi. 3Na Daudi ya hila kuteva makuva gomukali uyu. No mundu mulala ya vola, Uyu si a veye Bathsheba, mwana wa Eliam, muka Uria Muhiti? 4Ma Daudi ya tuma vatumwa, na a mu vugula; naye yadza kuye, na a gona naye (kigira mukali zana ya li na a veye munifu ku litsia mu mweli lilye); na yirana mu inyumba yeye. 5Nomukali zana ya vereka; naye ya tuma kuvolera Daudi, na a vola, Inze mbeye inda.
6Na Daudi ya hila makuva ku Joabu, na a vola, Tuma Uria Muhiti ku inze. Na Joabu ya tuma Uria ku Daudi. 7Na lwa Uria ya duka kuye, Daudi ya mu teva makuva ga Joabu a veye ndi, namakuva gavandu va veye ndi, na kuli ubulwani bu veye. 8Na Daudi ya volera Uria, U tsie mu inyumba yoyo, wisinge vire nge vivyo. Na Uria ya twula mu inyumba yomwami, nekihaanwa kyevyokulia kya mu londa kutwula ku mwami. 9Navutswa Uria ya gona ha kiliango kyenyumba yomwami halala navatumekiri vosi womunene wewe na ya vula kusulunguta ku inyumba yeye. 10Lwa va volera Daudi, na va vola, Uria ya vula kutsia mu inyumba yeye, Daudi ya teva Uria, Ive si wa li kutwula mu lugendo? Kigira ki u vuli kutsia mu inyumba yoyo? 11Na Uria ya volera Daudi, Lisanduku, na Israeli, na Yuda, va menya mmasa; nomunene wange Joabu, navatumekiri vomunene wange, va menyanga mwigendanyama kulwang'amira; ga ndukira inze kutsia mu inyumba yange, nokulia, nokunwa, nokugona nomukali wange? Kuli ive u veye mwoyo, na kuli mwoyo gugwo gu veye mwoyo, inze si nda kola yaga. 12Na Daudi ya volera Uria, Menya hano lero kandi, nomu gamba nda ku leka u tsie. Ma Uria yikala mu Yerusalemi lidiku yilyo nelidiku lindi li londa. 13Na lwa Daudi ya mu langa, ya lia na a nwa imbiri wewe; na ya mu hambikidza: na inyinga ya mgolova ya twula na a gone ku kitali kikye halala navatumekiri vomunene wewe, navutswa ya vula kutsia mu inyumba yeye.
14Na ga duka mugamba, Daudi ya ng'odera Joabu ibaruwa, na a gi hilira mmukono gwa Uria. 15Na ya ng'oda mwibaruwa, na a vola, U vike Uria imbiri mu bulwani bu veye bululu ligali, na mu twule na mmu leke, a duke kukuywa, a kudze. 16Na ga duka, lwa Joabu ya henza lidala, ya vika Uria ha ya manya avaluviriri va veye ho. 17Navandu velidala va twula, kulwana na Joabu: navandu valala kuvo, kuli avatumekiri va Daudi, va gwa; na Uria Muhiti ya kudza kandi. 18Hene yaho Joabu ya hila makuva kuvolera Daudi makuva gosi gobulwani; 19naye ya li laga mutumwa, na a vola, Lwa u mali kuvolera mwami makuva gevindu vyosi vyobulwani, 20ga la va, umwami na a va na a vihirirwa, na a ku volera, Kigira ki mwisunda himbi ku lidala kulwana? Si mu manya va la lasa mibano kutwula ku lidigi? 21Ibwaha wa kuya Ahimeleku, mwana wa Jerubeshethu? Si a veye mukali wa sikisa isyu kuye kutwula ku lidigi, kuduka na a kudzira ha Thebezu? Kigira ki mwisunda himbi ku lidigi? Kene yaho u Ia vola, Mutumekiri wowo Uria Muhiti u kudzi kandi.
22Ma mutumwa ya tsia, na a duka na a mannya Daudi vindu vyosi vya Joabu ya mu tuma kumannya. 23Umutumwa ya volera Daudi, Avandu yavo va ku guuta, na va ku twulira kuduka mwigendanyama, na kwinye kwa li kuvo kuduka ha bwingiriru bwe kiribwa. 24Navalasi va lasa mibano ku kwinye avatumekiri vovo kutwula ku lidigi igulu; navandu valala ku vatumekiri vomwami va kudzi, na Uria Muhiti, kandi mutumekiri wowo u kudzi. 25Hene yaho Daudi ya volera mutumwa, U volere Joabu yaga, Inkuva yiyi i ta ku viririhidza mba, kigira kivavi ki litsanga mulala kuli ki litsanga wundi; u dase ubulwani bwelidala, u li guute: na u mu luviridze.
26Nomukali wa Uria lwa ya hulira musatsa wewe u kudzi, ya syomera musatsa wewe. 27Na lwa lisyoma lya vita, Daudi ya tuma mundu kuvugula mukali nokumbika mu inyumba yeye, na a va mukali wewe, ni yivula mwana muyai. Navutswa inkuva ya Daudi ya kola ya vihiriridza Yahova.
©Bible Society of Kenya, 1967