2 Vakorintho 12
12
1Ga ndukira kwiidzominya, navutswa si ki veye kindu ki nkonya; navutswa nda duka ku malola noku lilang'aminywa lyo Mwami. 2Mmanya mundu mulala mu Kristo, gyi duki kalunu imihiga likumi na gyine (mbula ya li mu mubiri si mmanya; mbula ya li na a twula mu mubiri, si mmanya; Nyasaye a manya), yetsumbwa kuduka migulu lya kavaka. 3Na inze mmanya mundu zana (mbula ya li mu mubiri mbula ya li ihale nomubiri, si mmanya; Nyasaye a manya), 4kuli yetsumbwa na a vikwa mu Paradisi, kandi ya hulira amakuva aga ta nyalika kuvolwa, aga veye mugyiru mundu kuvola. 5Kigira mundu kuli uyu ndiidzominya: navutswa kigira inze mwene si nziidzominya, bugira ni ntiidzominya mu budede kere bwange. 6Kigira ni nyenya kwiidzominya, si nda va musiru mba; kiglra nda vola ageligali: navutswa ndeki gase mundu kali mulala a la ganagana inze kuvita aga a lola ku inze, kinga aga a hulira ku inze. 7Kandi kigira ubunene bwelilang'aminywa yilyo gase nda nenehidzwa kuvita kigero kyange, nda hebwa lifwa mu mubiri, mutumwa wa Setani a duke kunkupidza kivi, mbula kunenehidzwa kuvita kigero. 8Ku kindu yiki nda saala Mwami hali kavaka, ki twule ku inze. 9Naye ya mbolera, Tsimba basi tsyange tsi ku duki: kigira tsingulu tsyange tsi dukidzeywi mu budedekere. Kunangwa ndiidzominya mu budedekere bwange nobuyanzi ligali, tsingulu tsya Kristo tsi menye ku inze. 10Kunangwa nyanzi mu budedekere, mu busaliri, mu budaka, mu lidambidzwa, mu kivi, kigira Kristo: kigira inyinga mbeye mudedekere, nilwo lwa mbeye ne tsingulu.
11Mmali kugwa nobusiru: mwi nye mwa nniga; kigira ga ndukira mwinye mu nzidzominya: kigira si nda li mke ku vanene vavatumwa, kali ni nda vula kuva kindu 12Ligali vilolekidzu vyavatumwa vya kolwa mu mwinye mu bwekudziri bwosi, ku vilolekidzu noku vyokugenya noku miyinzi gyetsingulu 13Kigira ni kindu ki kya mwa gehi dzwa kuvita mavugano gandi, ni li ta li likuva yili, inze mwene si nda li muliduhu ku mwinye? Mu nsamehe ubudamano yibu.
14Henzi, i veye hali kavaka inyinga yiyi ya nzetegeki kuduka ku mwinye; kandi si nyala kuva muliduhu ku mwinye: kigira si nyenya vindu vyenyu, navutswa nyenya mwinye: kigira si ga dukira avana kuvikira avivuli vindu, navutswa navivuli ava vikira avana. 15Na inze nda salannya vyange kandi inze mwene nda salannywa nobuyanzi bwosi kigira livamwoyo lyenyu. Ni mba ni mu yanza kuvita, ngehidzeywi liyanzwa? 16Navutswa nu bulahi ga ve ndiyo, inze mwene si nda mina mwinye; navutswa, kigira nda li nobugeeri, nda mu gumira nobu geeri. 17Nda mu nyaga kindu nomukono gwomundu mulala ku yava nda tuma kuudza ku mwinye? 18Nda tsuuva Tito, kandi nda tuma amitu wetu halala naye. Tito ya mu nyaga kindu naho? Si kwa genda ku roho mulala? Si kwa genda netsinduvatiru yitsyo?
19Mu ganagana kutwula inyinga yeyo kwevera ku mwinye. Navutswa ku vola imbiri wa Nyasaye mu Kristo. Navutswa vindu vyosi vi veye kigira lyombakwa lyenyu, avayanze vange. 20Kigira ntidza gase ku gosi, lwa ndidza ku mwinye nda mu lola si mu veye neliva lya nyenya, na inze mwene nda loleka ku mwinye neliva lya mu ta yanza; gase ku gosi ga la va amahangali, nembodoka, nobutima, nelyavukana, nelihuudziridza, nelimonyana, nobwigingiri, nekivihiri; 21gase lwa nzidza kandi Nyasaye wange a la ngehidza imbiri wenyu, kandi inze nda vererera avanyingi ava tanga kukola ubwoni ava vula kweganira ubudamano nokutsia mbakana, nobuheyi bwa va kola.
Currently Selected:
2 Vakorintho 12: MBE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1967
