1 Vatesalonike 4
4
1Inyima yaga, avamitu, ku mu goonya nokumweganehidza mu Mwami Yesu, kuli mwa vugula ku kwinye nu bulahi mu gendere nokuyanzidza Nyasaye, kuli mu gendanga, mu duke kukira ligali. 2Kigira mu manya lugano lwama lago ga kwa mu ha ku Mwami Yesu. 3Kigira kya Nyasaye ya lalira ki veye litakaswa lyenyu, mwinye mu vule kutsia mbakana; 4mundu sa mulala ku mwinye a duke kumanya kweyameha mwene mu butakatifu nomu bugoosi, 5si mu li mu lyegomba nomu likayirwa, kuli avandu yavo ave Tsihiri ava vula kumanya Nyasaye; 6mundu a ta ga manya nokugenderera amwavo wewe mu makuva yaga: kigira Mwami a veye mbanzi mu makuva yaga gosi; kuli kwa tanga kumumannya nokumulolekidzira. 7Kigira Nyasaye si ya ku langira kifwabwi, navutswa butakatifu. 8Kunangwa uyu u sulanga, si a sulanga mundu navutswa a sulanga Nyasaye u hedzanga mwinye Roho Mutakatifu wewe.
9Navutswa mu buyanzani bwavamwavo si mu veye nelyenya inze mmu ng'odere: kigira mwinye avene Nyasaye u mali kumwegidza kuyanzana avene navene; 10kigira mwinye mu kola likuva yili ligali ku vamwavo vosi va veye mu Makedonia. Navutswa kwinye ku mu tsuva mu kole kukira ligali; 11ka ndi mwiguluhidze kwehodzeridza, nokulonda ubutumiki bwenyu avene nokukola miyinzi namakono genyu avene, kuli wa kwa mu laga; 12mu duke kugenda nobugoosi imbiri wa yavo ava veye kyova, mu ta va nobu daka bwekindu kali kilala.
13Navutswa, avamitu, si kwenya mwinye mu vule kumanya amakuva ga yavo va gonanga; mu ta verera kuli avandi ava ta li nelisuuvira. 14Kigira ni ku va ni ku suuvira Yesu ya kudza ma na a simuguka, ga veye kandi ndiyo ava gonanga mu Yesu, Nyasaye a la va leta halala naye. 15Kigira ku mu volera yaga kigira likuva lyo Mwami, kwinye ava ku veye mwoyo, ava ku tigala kuduka ku lidza lyo Mwami, si ku liyimirira yava ava mali kugona. 16Kigira Mwami mwene a liika kutwula migulu nomwoyo munene, kandi nomwoyo gwengelosi munene kandi nogwekisiliva kya Nyasaye, na yavo va kudza mu Kristo va la simuguka imbiri; 17inyima kwinye ava ku veye mwoyo, ava ku li tigala, ku la hilwa mu malesi halala na yavo, ku duke kwaganira Mwami mu bwerefu: na ndiyo ku la va halala no Mwami mihiga nemihiga. 18Kunangwa mu leminyane myoyo mwinye avene navene ku makuva yaga.
©Bible Society of Kenya, 1967