1 Vatesalonike 5
5
1Navutswa ku makuva getsinyinga nagemihiga, avamitu, si mu veye nelyenya kung'oderwa likuva. 2Kigira mwinye avene mu manya ligali lidiku lyo Mwami lidzanga kuli mwivi yadzanga ubudiku. 3Lwa va volanga, Gyi veye mirembe kandi lyelemeridza, hene yaho ubwoneku bu la va nyola bwangu, kuli lilumwa lyelivula li dukiranga u veyenda, navo ligali si va la hona mba. 4Navutswa mwinye, avamitu, si mu veye mu kisundi, lidiku yilyo li mu nyole kuli mwivi: 5kigira mwinye mwosi mu veye avana vobulavu navomu mbasu; kwinye si ku veye avobudiku kinga avekisundi; 6kunangwa ku ta gona kuli avandi, navutswa ku linde ku ve nobugeeri. 7Kigira yavo ava gonanga va gona ubudi ku, navo va hambikanga va hambika ubudiku. 8Navutswa kwinye kigira ku veye avombasu, ku ve nobu geeri bwetu, kwivike isalamba yomu kiritu yelisuuvira neyobuyanzi; negu dwa yekivya yelisuuvira lyobuhonnyi. 9Kigira Nyasaye si ya ku vika ku ve avobutima, navutswa ku nyole ubuhonnyi ku Mwami wetu Yesu Kristo, 10wa ku kudzera ni ku va ni ku linda, kinga ni ku va ni ku gona, ku ve mwoyo halala naye. 11Kunangwa mu tsuvane mwinye avene navene nokwombakirana mundu sa mulala nowakye, kuli mu kolanga.
12Navutswa ku goonya mwinye, avamitu, mu manye yavo avanyankanira mu miyinzi hagati henyu, nokuva avanene venyu mu Mwami, nokuva avagerehidzi venyu; 13mu va bugirire ligali mu buyanzi kigira miyinzi gyavo. Mu ve nemirembe mwinye avene navene. 14Ku tsuva mwinye, avamitu, mu gerehidze yavo avekivihiri, mu luviridze ave myoyo midedekere, mu vike avadedekere tsingulu, mwikudzire ku vandu vosi. 15Mu henze mundu kali mulala a ta tunga wundi kali mulala ubudamano ku budamano; navutswa mu londe kazozo ki veye kilahi mwinye avene navene, kandi ku vosi. 16Mu sangale kazozo; 17mu saale Nyasaye bugira kuleka; 18mu santidze ku vindu vyosi: kigira yibu bu veye ubulaliri bwa Nyasaye mu Kristo Yesu ku luvega lwenyu. 19Mu ta siminya Roho; 20mu ta lega ubuprofeti; 21mu henzeridze vindu vyosi; mu gumire ligali ki veye kilahi; 22mwiyahule ku budamano tsing'ano tsyosi.
23Nyasaye mwene wemirembe a mu takase ligali; na mwinye mu sidzwe roho nomwoyo nomubiri bugira kindu kidamano, mu lidza lyo Mwami wetu Yesu Kristo. 24A veye musuuvirifu u langa mwinye, naye a la kola ndiyo.
25Avamitu, mu ku saalire.
26Mu chelidze avamitu vosi nelibusa litakatifu. 27Nzeganehidza mwinye ku Mwami, ibaruwa yiyi i somerwe avamitu vosi.
28Tsimbabasi tsyo Mwami wetu Yesu Kristo tsi ve nemwinye.
©Bible Society of Kenya, 1967