1 Vakorintho 6
6
1Mulala ku mwinye na a veye V nelikuva ku wakye, a lema mwoyo kutsia kumuyala imbiri wavadamano, si a tsia imbiri wavatakatifu? 2Naho si mu manya avatakatifu va la kalagira avomulirova? Kunangwa mwinye ni mu va ni mu kalagira avomulirova, si mu dukani kukalaga likalaga likekeke? 3Si mu manya ku la kalagira tsingelosi? Nasindi amakuva gelivamwoyo lya kalunu? 4Kunangwa ni mu va ni mu veye nelikalaga lyamakuva gelivamwoyo yili, mu vika mu livugana ava ta li kindu va kalage, naho? 5Mbola ndi kumulegannya. Ni ndiyo ga veye, si ha li nomulala ku mwinye, mundu mugeeri u nyala kukalagira avamwavo veve, 6navutswa amwavo a tsia kuyala amwavo, kandi ni imbiri wa va ta li avasuuviri? 7Auwa, ga mali kugwa lyoneka ku mwinye, kigira mu veye neliyalana avene navene. Kigira si bu li bulahi kwikudzira ku ga veye madamano? Kandi si bu li bulahi kunuulwa? 8Yee, navutswa mwinye avene mu kola ubudamano, kandi mu nuu la, kandi ni vya vamwavo venyu. 9Naho si mu manya avadamano si va li nyola ubwami bwa Nyasaye? Mu ta gadwa: ava tsia mbakana, kinga ava londanga misambwa, kinga avaheyi, kinga ava gwa avakali, kinga vafiraji, 10kinga avivi, kinga avakayirwa vyavene, kinga avahambiki, kinga avanyegi, kinga avanuuli, si va nyala kunyola ubwami bwa Nyasaye. 11Kandi ku mwinye avalala va li kuli yava, navutswa mwogidzeywi, kandi mwa takaseywi, navutswa mwa volwa kuva avalungi ku lieta lyo Mwami Yesu Kristo, noku Roho wa Nyasaye wetu.
12Vindu vyosi vi nyalika ku inze; navutswa si vi li vyosi vi konyanga. Vyosi vi nyalika ku inze; navutswa si nyala kubugirira kindu kali kilala kwameha ku inze. 13Vyokulia vi veye vyenda, na inda i veye yevyokulia: navutswa Nyasaye a lononnya vyombi. Navutswa mubiri si gu veye gwokutsia mbakana, navutswa gu beye gwo Mwami; kandi Mwami veye womubiri: 14Kandi Nyasaye ya simugukidza Mwami, kandi a la simugukidza kwinye netsingulu tsitsye. 15Si mu manya mibiri gyenyu gyi veye vivero vya Kristo? Kunangwa nyala kuvugula vivero vya Kristo mbi kole vi gwe vivero vyowa malaya? Ga ta va ndiyo. 16Naho si mu manya uyu u hambanywa nowamalaya a veye mubiri mulala naye? Kigira a vola, Vaviri va la gwa mubiri mulala. 17Navutswa uyu u ha mbanywa no Mwami a veye roho mulala naye. 18Mwiruke litsia mbakana. Ubwoni bwosi bwomundu a kolanga bu veye ku mubiri igulu, navutswa uyu u tsitsanga mbakana a kolanga ubwoni ku mubiri gwigwe mwene. 19Naho si mu manya mubiri gu veye litempeli lya Roho Mutakatifu u veye mu mwinye, wa mu veye naye kutwula ku Nyasaye? Kandi mibiri si gyi veye gyenyu; 20kigira mwa gulwa ubuguli; kunangwa mwidzominye Nyasaye mu mibiri gyenyu.
Currently Selected:
1 Vakorintho 6: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
