1 Vakorintho 7
7
1Kalunu ku vindu vya mwa ng'odera: Nu bulahi mundu a ta dira mukali. 2Navutswa kuhona ku litsia mbakana, mundu sa mulala a ve nomukali wewe, kandi mukali sa mulala a ve nomusatsa wewe. 3Uyu musatsa a kolere mukali kuli ga mu dukira: nomukali a kole ndiyo ku musatsa wewe. 4Mukali si a ve ye netsingulu ku mubiri gwigwe mwene, navutswa musatsa: kandi ndiyo musatsa si a veye netsingulu ku mubiri gwigwe mwene, navutswa mukali. 5Mu ta sulana avene navene bugira ni mu ta lagani inyinga, mu duke kuva nobwiyangu bwokusaala, ma mu ve halala kandi; Setani a ta duka kumugeridza kigira ku livula kwegaya lyenyu. 6Navutswa mbola yaga ku libugirira, si ga veye agokulaga. 7Navutswa nkano avandu vosi va veye kuli inze. Navutswa vosi sa mulala a veye nekihaanwa kikye ki twula ku Nyasaye, mulala ndi nowundi ndi.
8Navutswa mbolera yavo ava kikiri kuhilana kandi avakunzakali, Nu bulahi kuvo va menye kuli inze mbeye. 9Navutswa niva va menya ni va ta nyala kwegaya, va hilane: kigira nu bulahi kuhilana kuvita kwaaduka muliru. 10Navutswa yava ava mali kuhilana, mba laga, kandi si a li inze, navutswa nu Mwami, Mukali a ta leka musatsa wewe 11(navutswa na a va na a twula ata hilwa kandi mba, naho yirane ku musatsa wewe); kandi musatsa a ta kunga mukali wewe. 12Navutswa ku vandi inze mbola, si a li Mwami: Ku vamitu vosi, mulala na a veye nomukali u ta suuvira, naye na a yanza kumenya naye, a ta mu kunga mba. 13Kandi mukali u veye nomusatsa u ta suuvira, naye na a yanza kumenya naye, a ta leka musatsa wewe mba. 14Kigira musatsa u ta suuvira a takasangwa kigira mukali wewe, kandi mukali u ta suuvira a takasangwa kigira musatsa. Ni ga ta li ndiyo, nkano avana venyu navadamano; navutswa kalunu va veye avalungi. 15Navutswa u ta suuvira na a lalira kutwula, a twule: amwavo wetu musatsa, kinga amwavo wetu mukali si a li mu butugwa mu vindu kuli yivi; navutswa Nyasaye u mali kukulanga mu mirembe. 16Kigira u manyi ndi, ive mukali, mbula u la honnya musatsa wowo? Kinga u manyi ndi, ive musatsa, mbula u la honnya mukali wowo? 17Navutswa kuli Mwami a gavulira avandu sa mulala, kandi kuli Nyasaye ya langa mundu sa mulala, a gende ndiyo. Na inze ndaganga ndiyo mu mavugano gosi. 18Mundu na a va ni ya langwa na a veye wa kevwa? A ta va u ta kevwa. Mundu na a va ni ya langwa na a kikiri kukevwa? A ta kevwa mba. 19Likevwa si ki veye kindu, kandi livula kukevwa si ki veye kindu; navutswa kulonda malago ga Nyasaye. 20Mundu sa mulala a menye mu ga ya li nago lwa ya langwa. 21Ive nu u va ni wa langwa nu u veye mu butugwa? U ta lola bu veye budamano: navutswa ni ga duka kunyalika ku ive kuva nelibohololwa nu bulahi u li tumekire. 22Kigira uyu mutugwa wa langwa mu Mwami a veye muboholole wo Mwami: kandi ndiyo uyu wa langwa a veye muboholole, a veye mutugwa wa Kristo. 23Mwa gulwa ubuguli; mu ta gwa avatugwa va vandu. 24Avamitu, mundu sa mulala ku ga ya li nago lwa ya langwa, a menye mugo halala na Nyasaye.
25Ku kivune kyavakana vagyima, si mbeye namalago go Mwami: navutswa mmu voleranga liganagani lyange, kuli mundu wo Mwami a vereye tsimbabasi kuva musuuvirifu. 26Ndola inkuva yiyi ni indahi kigira kivi kya ku veye nakyo yiki, nayo ni yiyi, nu bulahi mundu kuva kuli a veye. 27U boheywi ku mukali? U tenya kwavukanywa. Wavukannyeywi ku mukali? Utenya mukali. 28Navutswa ive nu u va nu u hilana nomukali, si u koli ubwoni mba; kandi mukana na a hilwa si a koli ubwoni mba. Navutswa ku yava va la va nekivi ku mubiri: inze nyenya kumugayira kivi. 29Navutswa mbola yaga, avamitu, tsinyinga tsimbihidzeywi, ava veye navakali va duke kuva kuli va ta veye navo; 30na yava ava liranga ve ve kuli ava ta liranga; nava sangalanga, va ve kuli ava ta sangalanga; nava gulanga va ve kuli ava ta li nekindu; 31navo ava tumekira lirova va ve kuli ava ta li tumekira ligali: kigira vindu vyelirova yili vi vitanga. 32Navutswa nyenya mwinye mu vule kunyankana. Uyu u kikiri kuserererwa a nyankanira vindu vyo Mwami, kuli a duke kuyanzidza Mwami: 33navutswa u mali kuserererwa a nyankanira vindu vyelirova kuli a duke kuyanzidza mukali wewe. 34Kandi ha veye nelyavukana mukali nomukana. Uyu u kikiri kusererwa a nyankanira vindu vyo Mwami, a duke kuva mutakatifu ku mubiri kandi mu roho: navutswa uyu wa sererwa a nyankanira vindu vyelirova kuli a duke kuyanzidza musatsa wewe. 35Kandi mbola yaga kumukonya; si nkola ndi kumugenda, navutswa kumukonya ku vindu vi dukani, kandi mu duke kulindirira Mwami bugira kugaywa. 36Navutswa ku vosi mundu na a lola si a nyala kukolera mukana wewe kuli vi mu dukira, na a va na a vita bulahi bwolukana lwilwe, kandi na a va na a veye nelyenya, a kole kuli yenya; si a kola ubwoni; u leke va sererane. 37Navutswa uyu u dinya mu mwoyo gwigwe, kandi si a li nelyenya, navutswa a veye netsingulu mu bulaliri bwibwe kandi u laliye inkuva yiyi mu mwoyo gwigwe kugaya mukana wewe, a kola bulahi. 38Kunangwa u sereranga mukana wewe a kola bulahi; kandi uyu u ta serera a kola bulahi kuvita. 39Mukali a bohangwa inyinga yomusatsa a veye mwoyo; navutswa musatsa na a kudzi a veye nomunwa kusererwa ku uyu wa yenya; navutswa ku vandu vo Mwami veng'ine. 40Navutswa a veye nobugasu kuvita na a menya vutswa ndiyo, kuli inze ndola; kandi mbola mbeye na Roho wa Nyasaye.
Currently Selected:
1 Vakorintho 7: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
