1 Vakorintho 4
4
1Mundu a vole ku kwinye ku veye avatumwa va Kristo, kandi avalindi vagaviswa ga Nyasaye. 2Hano kandi genyangwa avalindi va lolwe kuva avasuuvirifu. 3Navutswa ku inze ki veye kindu kikekeke ligali mwinye mu nzidere, kinga mundu; yee, si nzidere inze mwene. 4Kigira si mmanya kindu ki veye ku inze navutswa ku yaga si mbolwa kuvz mulungi: navutswa u nzidere a veye Mwami. 5Kunangwa mu ta kalaga likuva inyinga i kikiri kuduka, Mwami a luhe a duke, u li lang'aminya vindu vya viswa vyekisundi kandi a la lang'aminya lisaavira lyomu myoyo; kunangwa mundu sa mulala a la va nelidzominya lilye li twula ku Nyasaye.
6Vindu yivi, avamitu, mmali kuvigirunkannya vi gwe lugano lwange nolwa Apolo kigira mwinye; mu duke kwega ku kwinye mu ta sira aga ng'odwa; ga ta va mundu mulala ku mwinye yigingira ku mulala kuvita wundi. 7Kigira nibwaha wavukannya ive? Kandi u veye na kindu ki kya wa vula kuhebwa? Navutswa ive nu u va ni wa hebwa wiidzominyira ki kuli wa vula kuhebwa? 8Mu mali kwiguta. Mu mali kugwa avatugi. Mu duki kwameha bugira kwinye. Yee, nkano mwamehi, kwinye ku duke kwameha halala nemwinye. 9Kigira ng'anagana Nyasaye u ku lang'aminyi kwinye avatumwa inyima wa vosi, kuli avandu va kalagirwa viitwe: kigira ku koleywi kyokugennya ku lirova, ku tsingelosi, noku vandu. 10Kwinye ku veye avasiru kigira Kristo, navutswa mwinye mu veye avageeri mu Kristo; kwinye ku veye avadedekere, navutswa mwinye mu veye netsingulu; mwinye mu veye nelidzominywa, navutswa kwinye ku veye nelilegwa. 11Kali kuduka inyinga yiyi ku veye nenzala, nobuluhu, kandi ku veye kyahonyo, kandi ku kuyangwa tsinzasaya, kandi si ku veye na hokumenya; 12kandi ku nyankana, ku kolanga miyinzi namakono getu avene. Kwinye ni ku nyegwa ku gasidzanga; ni ku dambidzwa kwikudziranga; 13ni ku hudziridzwa ku goonyanga: ku koleywi kuli ubudamano bwelirova, amandu gevindu vyosi kuduka kalunu.
14Si ng'odi vindu yivi kumulegannya, navutswa kumweganehidza kuli avana avayanze vange. 15Kigira kali ni mu veye navegidzi tsielfu likumi mu Kristo, navutswa si mu veye navadada avanyingi; kigira mu Kristo Yesu inze nda mwivula ku ivangeli. 16Kigira yaga ngoonya mwinye, mwege ku inze. 17Kigira yaga, mmali kutuma Timoteo ku mwinye, u veye mwana wange, mu yanze nomusuuvirifu mu Mwami, u li mwidzulitsa miima gyange gyi veye mu Kristo, kuli nzegidzanga hosi mu mavugano gosi. 18Kalunu valala vigingiranga kuli inze si nzidza ku mwinye. 19Navutswa ndadza ku mwinye bwangu, Mwami na a yanza; kandi si nda manya likuva lyavigingiri navutswa nda manya tsingulu tsyavo. 20Kigira ubwami bwa Nyasaye si bwa li mu likuva navutswa mu tsingulu. 21Mwenya ki? Nzidze ku mwinye nempimbo, naho nzidze mu buyanzi, nomu roho gwobuhooma?
Currently Selected:
1 Vakorintho 4: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
