1 Vakorintho 3
3
1Na inze, avamitu, si nda nyala kuvolera mwinye kuli mu veye avaroho, navutswa nda mu volera kuli mu veye avomubiri, kuli avana vadoto mu Kristo. 2Nda mu nwehidza amaveere, si nda mu lagiridza ubukima mba; kigira mwa li ni mu ta nyala kulagira: y ee, kuduka kalunu si mu nyala; 3kigira mu kikiri avomubiri: kigira ndiyo mu veye nembodoka nelihing'ana mu mwinye, si mu veye avomubiri, kandi si mu genda kuli avandu? 4Kigira lwa mulala a vola, Inze mbeye wa Paulo, nowundi, Inze mbeye wa Apolo; si mu veye avandu? 5Kunangwa Apolo nibwaha? Na Paulo nibwaha? Va veye avatumwa ava mwa nyolira ku lisuuvira; sa mulala kuli Mwami ya mu ha. 6Inze nda simika, na Apolo ya sama amadzi; navutswa Nyasaye ya virukidza. 7Kunangwa uyu u simikanga si a li kindu, kandi uyu u samanga; navutswa Nyasaye u viru kidza a veye munene. 8Kalunu uyu u simikanga no uyu u samanga va veye mulala: navutswa sa mulala a la nyola madanyi gege mwene kuli miyinzi gyigye mwene. 9Kigira kwinye ku veye ava kolanga miyinzi halala na Nyasaye: mu veye mulimi gwa Nyasaye, lyombaka lya Nyasaye.
10Ku tsimbabasi tsya Nyasaye tsya nda hebwa, kuli munene wavombaki wobugeeri nda yava musenowundl a tsia kwombaka ku. Navutswa sa mulala yehenze kuli yombaka ku. 11Kivune si ha veye nomundu u nyala kuyava muse gundi gu vita yigu gwa yavwa, nagwo ni Yesu Kristo. 12Navutswa ku vosi mundu mulala ni yombaka mmuse yigu ithahabu, kinga fetha, kinga magina malahi, kinga misala, kinga bunyasi, kinga uluvuva; 13miyinzi gya vosi sa mulala gyi la lang'aminywa: kigira lidiku yilyo li la gyi lang'aminya, kigira gyi la lang'aminywa mu muliru; kandi muliru gwene gu la geridza miyinzi gya vosi sa mulala kuli wa gyi veye. 14Ku vosi wombaka mmuse yigu, ni i va miyinzi gyigye gyi tigala, a la nyola madanyi. 15Ku vosi wemiyinzi gyigye gyi la hya, a la yinga, navutswa mwene a la honnywa; navutswa ga veye kuli a vita mu muliru.
16Si mu manya mu veye litempeli lya Nyasaye, kandi Roho wa Nyasaye a menya mu mwinye? 17Ku vosi mundu ni yononnya litempeli lya Nyasaye, Nyasaye a la mwononnya; kigira litempeli lya Nyasaye li veye litakatifu, nalyo ni mwinye.
18Ku vosi mundu kali mulala a tegada. Ku vosi mundu na a va na a ganagana a veye mugeeri ku mwinye mu tsinyinga yitsi, a gwe musiru, a duke kugwa mugeeri. 19Kigira ubugeeri bwelirova yili bu veye ubusiru ku Nyasaye. Kigira ga ng'odwa, Uyu a gimira avageeri mu bugeeri bwavo, 20kandi, Mwami a manya tsiganagani tsyavageeri, tsi veye tsya vutswa. 21Kigira yaga ku vosi kali mulala a tiidzominya mu vandu. Kigira vyosi ni vyenyu; 22na a va na a veye Paulo, kinga Apolo, kinga Kefa, kinga lirova kinga livamwoyo, kinga likudza kinga vi veye ho, kinga vi ta veye ho; vyosi ni vyenyu; 23na mwinye mu veye ava Kristo; na Kristo a veye wa Nyasaye.
Currently Selected:
1 Vakorintho 3: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
