OBUBALI 8
8
Haruni yarenjekha etsitaya
1OMWAMI nabool'la Musa mbu,#Okhur. 25:31-40; 37:17-24 2“Bool'la Haruni mbu olwa oba norenjekha etsitaya tsine natsitaru khusihani; atsirenjekhe khulwo khuhengia abulafu bwatsio okhwakha nibuhengele imbeli wesihani.” 3Haruni nakhola singa mbwo; yarenjekha etsitaya tsiasio okhuhaana obulafu imbeli wesihani, singa obwo MWAMI yali nalachile Musa. 4Esihani sietsitaya sialombwa singa mbu: Sialombwa khutsahabu eyatuywa okhurula hasi wasio okhwola ikulu. Esihani sietsitaya yisio sialombwa singa OMWAMI yamanyia Musa.
Omulukha kwokhusiiywa nende okhwahulwa khwa Balawi khu mulimo kwo MWAMI
5OMWAMI yabool'la Musa mbu, 6“Hiinia Abalawi mubaana ba Isiraeli ma obasiiye. 7Obasiiye munjila yino mbu obanyul'lusiekhwo amaatsi akokhubasiiya, ma obabool'le babeke emibili chiabwe chiosi nolumwo khandi basaabe tsingubo tsiabwe. Ne munjila iyio betsa okhuba abasiyikhu. 8Ma babukule ehunwa halala nomusango kwayo kwobuswache okwobusie obunyukhe obutsokanibubwemwo amafura; nawe obukule echulukhi yindi khulwa omusango kwetsimbi. 9Oleere Abalawi imbeli we Liheema liokhubaho khwo MWAMI; nobunjelesia omukanda kwosi okwabandu ba Isiraeli. 10Oleere Abalawi imbeli wo MWAMI; ne abandu ba Isiraeli nabo bare amakhono kabwe khu Balawi; 11Ma Haruni yetsa okhubahaana Abalawi khu ise, singa esihanwa esichomekhe okhurula khu Baisiraeli, kho babe abanyala okhukhola Omulimo kwanje. 12Ne Abalawi nabo bare amakhono kabwe khumirwe tsietsichulukhi tsana; ndala ebe omusango omusambe khu ise, ne eyindi ebe omusango kwetsimbi khulwo okhubasiya.
13“Ma ore Abalawi imbeli wa Haruni khandi obahaane khu ise singa esihanwa esichomekhe ma babe mubulindi bwa Haruni halala nabasianibe. 14Munjila yiyi witsa okhwahula Abalawi okhurula khu Baisiraeli mbu babetsenje abanje. 15Nomal'le okhusiiya nende okhubahaana khu ise, kho nilwo olwa banyala okhwinjila nende okhukhola emilimo Mwiheema. 16Ise mbabukulanga okhuba abanje musilenje siabaana ba mbeli abasiani bosi mu Baisiraeli bosi. 17Okhuba abaana ba mbeli bosi abomubandu Baisiraeli nabanje, yabo ababaana babandu nende abemiruko. Khwitukhu yilio olwa ndeera abaana ba mbeli bosi musibala sie Misiri, ndabahula babe abanje.#Okhur. 13:2 18Ne mal'le okhubukula Abalawi musilenje siabekulanda bosi mubaana ba Baisiraeli. 19Ndahan'ne Abalawi khu Haruni nabaanabe mbu babe esihanwa siabwe mubaana ba Baisiraeli, khulwo khukhol'la Abaisiraeli emilimo Mwiheema liokhubaho khwo MWAMI nende khulwo okhusinga Abaisiraeli khwikhupako liosi eliakhabasalisia nibakhesunda ahembi nende Habundu Hatsienukhu.”
20Kho nimbwo Musa na Haruni nomukanda kwosi kwabaana Baisiraeli bakhol'la Abalawi singa OMWAMI yalaka Musa. 21Ne Abalawi nabo nibesiya khubwoni, nibasaaba tsingubo tsiabwe; Haruni nabahaana khu MWAMI singa esihanwa esichomekhe. Khandi yakhola omusango kwokhubasiya. 22Ma olunyumakhwo Abalawi nibenjila okhukhola omulimo kwabwe Mwiheema nibali hasi hobulindi bwa Haruni nende abaana baabe. Ne abandu bakhol'la Abalawi singa OMWAMI yali nalachile Musa mbu bakhol'lwe.
23OMWAMI nabool'la Musa mbu, 24“Kano niko akenya kakholekhe khu Balawi; mbu buli olwo Omulawi yoola emihika amakhumi kabili nachirano, yenjilenje mukhukhola emilimo Mwiheema Liokhubaho khwo MWAMI, 25ne olwa yoola emihika amakhumi karano, alekhenje okhukhola emilimo yichio, ne aratiya khandi tawe. 26Nebutswa inyuma we yaho anyala khukhonyel'la abaana babwe Mwiheema, okhulinda ebia balekhelwa; ne arakhola emilimo mwo khandi tawe. Nimbwo Abalawi benyekhanga bakhole emilimo chiabwe.”
Currently Selected:
OBUBALI 8: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
