OBUBALI 9
9
Epasaka eyakhabili
1OMWAMI yal'loma na Musa nali musitsiimi sia Sinai, mumwesi kwokhuranga okwomuhika kwakhabili okhurula Abaisiraeli nibarula musibala sie Misiri. Yamubool'la mbu,#Okhur. 12:1-13 2“Abandu ba Isiraeli balombe epasaka munyinga yayo. 3Muchikhole khubwile bwelitukhu lielikhumi nakhane khumwesi kuno, munyinga yayo okhulondokhana namalako kosi akahanwa khuyo nende akakhalakwa khuyo kosi.” 4Kho Musa nabool'la abandu ba Isiraeli mbu balombe epasaka. 5Nabo nibalomba epasaka tsana mumwesi kwokhuranga, khwitukhu lilikhumi nakhane mumwesi kwokhuranga khubwile musitsiimi sia Sinai. Abandu ba Isiraeli bakhola kosi singa OMWAMI yali nalachile Musa.
6Ne baliho abasaatsa bandi abali nibali mumusilo sichila bali nibatil'le khumulambo kwomundu, nibaranyala okhulomba epasaka khwitukhu liene yilwo tawe. Nabo batsia imbeli wa Musa na Haruni khwitukhu liene yilio 7nibaboola, “Ifwe khuli mumusilo sichila khwali okhutiila khumulambo kwomundu, nebutswa nisina esiakhachila khwikal'lwe mbu khuraleera esihanwa sio MWAMI halala na Baisiraeli bandi bosi?”
8Ne Musa nabakalusia mbu “Linde mbelio okhwola olwa mbulila ako OMWAMI yetsa okhulaka khukenywe.”
9OMWAMI nabool'la Musa, 10abool'le abandu ba Isiraeli mbu, “Olwomundu wosi khwinywe nohomba owomutsinzibulo tsienywe, aba nali mumusilo khulwokhutiila khumulambo, nohomba naba khuluchendo lwehale, nebutswa naba niyenyanga okhunombela epasaka, 11ahuchil'lwanga okhuchilomba mumwesi kwakhabili, khwitukhu lielikhumi nakhane, khubwile. Ne achilie halala nemiro nende emikaati echiralimwo amamela. 12Aralekhakhwo esitonye siosi sisikale okhwola litukhu lilondakhwo nohomba kata okhufunaka likumba liayo tawe. Akhole epasaka okhulondokhana nende kosi akalakwa khuyo.#Okhur. 12:46; Yoh. 19:36 13Nebutswa omundu wosi owakhaba nali omusiiyikhu, narali khuluchendo lwehale tawe, ne naralomba epasaka tawe, omwene uyo salabalwa singa mulala khubandu banje tawe, sichila siyaleer're esihanwa sianje munyinga eyahuchil'lwa tawe. Omundu uyo okhwola anyoole esinyasio khulwo obwonibwe.
14“Omucheni omenyanga mwinywe, naba niyakhenya okhukhol'la OMWAMI epasaka, okhwola achilombe okhulondokhana namalako kosi akalakwa khuyo. Lilako yili lihesibwe nomundu wosi kata omucheni owamenyibwa nohomba omwibule.”
Lilumbesi elialinji ikulu we Liheema
(Okhur. 40:34-38)
15Khwitukhu olweliheema liokhubaho khwo MWAMI liasinjisibwa, lilumbesi lietsa nilifuunikha Liheema tsana. Ne mubutukhu, lilumbesi tsana liafwana singa omul'lo. 16Kho nimbwo kekholekhanga khasotso. Lilumbesi lialifuunikhanga mumubasu ne omul'lo nakwo kwalifuunikhanga mubutukhu. 17Ne buli lwosi olwelilumbesi liahinibwangakhwo hekulu we Liheema, abandu ba Isiraeli basimulanga ekambi yabwe; ne buli lwosi olwelilumbesi liekhanga hasi, nabo nibakhoma ekambi yabwe. 18Abandu ba Isiraeli basimulanga ekambi yabwe olwo MWAMI yalinji nalachile, khandi bakhomanga ekambi yabwe olwo MWAMI yalinji nalachile. Buli lwosi olwelilumbesi liekhalanga khu Liheema, bamenyangayo mukambi ndala. 19Kata olwelilumbesi liatsilil'la okhuba khu Liheema amatukhu amenji, abandu ba Isiraeli balindanga akabalakwa no MWAMI, nibarabuusia oluchendo tawe. 20Kata olundi lilumbesi liabetsanga Khwiheema amatukhu mat'ti; munjila tsiosi bamenyanga mukambi nohomba okhusimula oluchendo okhulondokhana nelilako lio MWAMI. 21Olundi lilumbesi liasinjilanga butswa okhurula khumukolooba okhwola mukamba tsuli, ne bachiakanga oluchendo olwa lialinji nilihinibubweho. Buli lwosi olwelilumbesi liahinibwaho, nabo nibachaaka oluchendo. 22Kata nikalinji amatukhu kabili, nohomba omwesi, nohomba kata omuhika nohomba okhubira yaho, buli lwosi olwelilumbesi liali nilili hekulu we Liheema niliikhayekhwo, abandu ba Isiraeli bamenyanga mukambi ndala, ne sibachiakanga oluchendo tawe; nebutswa olwelilumbesi liahinibwangakhwo ne nibachaaka oluchendo. 23Bakhomanga ekambi, khandi bachisimula khwilako elio MWAMI yali nabaheye okhubir'ra khu Musa.
Currently Selected:
OBUBALI 9: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
