OBUBALI 4
4
Emilimo chia Balawi besilibwa sia Kohatsi
1OMWAMI yabool'la Musa nende Haruni 2babale abandu musilibwa sia Kohatsi okhurula mulwibulo lwa Lawi, okhulondokhana netsinyumba tsiabwe nende ebilibwa biabwe, 3okhurula khubemihika amakhumi kataru okhutsia ikulu, okhwola khubemihika amakhumi karano, bosi abahel'le okhukhola emilimo Mwiheema liokhubaho liokhubaho khwo MWAMI. 4Emilimo chiabwe nechiokhukhola nende ebindu ebitsienukhu okhusila.
5Olwe esaa yokhwiha Liheema yoolanga; Haruni nende abaanabe benjile Mwiheema mukari ma bahiinie ekatani eli imbeli we Lisanduku lie Indakano ma bafuunikhe Lisanduku lie Indakano n'nayo; 6ma bafuunikhekhwo esifuunikho siamaseelo amanyukhe, ma barekhwo ingubo yabuluu, ma babiikhe emisaala chialio mubifuuli.
7Ma baale ingubo yabuluu khumesa yomukaati okuhaanwangwa khu MWAMI, ma barekhwo tsinjio, netsindaabo tsiobwali, netsindaabo tsiokhuhaana omusango nende etsichupa tsiomusango kwewaini, etsiokhutsukhiil'la. Omukaati kubetsenga khumesa khasotso. 8Khubindu yibio baalekhwo ingubo inzakhanyu, nibafuunikhakhwo esifuunikho siamaseelo amanyukhe ma benjisiamwo emisaala tsiokhuchikinga. 9Babukule ingubo yabuluu, nibafuunikha esihani sietsitaya tsiobulafu, nende etsitaya tsiasio, namaana kasio, netsindelu, nebichinjilo biamafura komuseituni biosi ebiabarumikhilanga nibasikhalaban'na. 10Beetsa okhufuunikha esihani yisio nende ebilikhwo biosi musifuunikho siamaseelo amanyukhe, nibasira khumisaala chiokhusichinga.
11Ma baale ingubo yabuluu khulusambwa lwetsahabu, nibafuunikhakhwo esifuunikho siamaseelo amanyukhe, ma benjisiemwo emisaala chiokhusichinga. 12Babukule ebindu biosi, ebia barumikhilanga Habundu Hatsienukhu, nibabifuuma mungubo yabuluu, nibafuunikhakhwo esifuunikho siamaseelo amanyukhe, nibabira mumisaala chiokhusichinga. 13Bahinieho likokhe okhurula khulusambwa, nibaalakhwo ingubo isembe. 14Barekhwo ebindu biosi, ebia barumikhilanga khulwo okhukhalabanila khulusambwa, mbu tsindaabo tsiomul'lo, ebikwasi ebichiko nende etsibeseni, ma beetsa okhurakhwo esifuunikho siamaseelo amanyukhe, nibenjisiamwo emisaala chiokhusichinga. 15Ma olwa Haruni nabaanabe baba nibamal'le okhufuunikha ebindu ebitsienukhu biosi ebie Liheema, nende ebimanulwa bialio biosi ekambi neli ahembi okhurula, olunyumakhwo abaana ba Kohatsi betse okhubichinga ebindu yibi; nebutswa balekhe okhutiilakhwo khubindu ebitsienukhu, khase, bakhafwa. Yibio nibio ebindu ebia abaana ba Kohatsi balachinga khubieliheema liokhubaho khwo MWAMI.
16Ne ebilekhelwa omwesaalisi Eliasa nabio nibio amafura ketsitaya, nobwali obuhunyanga obulahi, nomusango kwobuswache kwakhasotso, namafura akokhutsukhiil'lwa; nende ebibetsanga mwiheema eliatsienulwa khu MWAMI.
17OMWAMI nabool'la Musa nende Haruni mbu, 18“Muralekha abesilibwa sia Bakohatsi okhwirwa okhurula mu Balawi tawe. 19Khulwokhubalekha okhuba mwoyo nibarafwa olwabesunda ahembi khubindu yibio ebiahul'lwa elala, Haruni nabaanabe benjilemwo, nibabara buli mundu khubukhalabanibwe nomusiikokwe ma bamubool'le okwakinga. 20Nebutswa Abakohatsi nibakhenjilakhwo mwiheema ma balole abesaalisi nibaloosianga ebindu ebitsienukhu ebiokhusundwa, balafwa.”
Emilimo chia Abalawi besilibwa sia Gerishoni
21OMWAMI yabool'la Musa 22abale Abalawi besilibwa sia Gerishoni bosi, okhulondokhana nebilibwa biabwe khandi netsinyumba tsiabwe, 23khandi ahandike amera ke yabo okhurula khubemihika amakhumi kataru okhwola khubemihika amakhumi karano, abali nibahel'le okhukhola emilimo Mwiheema liokhubaho khwo MWAMI. 24Yibu nibwo obukhalabani bwebilibwa bia Gerishoni, mubukhalabani nende mukhuchinga ebindu 25mbu balachinga etsikatani tsiokhulusambwa, nende Liheema liokhubaho khwo MWAMI nesifuunikho sialio, nende esifuunikho siamaseelo amanyukhe esili ikulu wasio, nemikoye tsiomumuliango kweliheema liokhubaho khwo MWAMI, netsipasia etsiokhulusimbo, 26nolwichi lwomubwinjil'lo bwomusilibwa siesioba esiabotokhana olusambwa lwemisango, nemikoye chiatsio, nebindu biosi ebitiyilwangakhwo. Balakhalabana nibakhola kosi akatakhungwa okhutsikhol'lwa. 27Obukhalabani bwosi bwabaana ba Gerishoni bube singa obwa Haruni nabaanabe baba nibalaka, mubiosi ebiabachinga nende mukosi akabakhola, mubalache okhukhola ebiabahebwa okhuchinga. 28Buno nibwo obukhalabani bwabetsinyumba tsiabaana ba Gerishoni mukeliheema liokhubaho khwo MWAMI. Balakhola kosi hasi hobwemeli bwa Itsamari omwana womwesaalisi Haruni.
Emilimo chia Abalawi be inyumba ya Merari
29OMWAMI yabool'la Musa abale abeinyumba ya Merari, munyumba tsiabwe khandi mubilibwa biabwe, 30okhurula khubemihika amakhumi kataru okhwola khubemihika amakhumi karano; yabo abali nibahel'le okhukhola emilimo chio Mwiheema liokhubaho khwo MWAMI. 31Bino nibio ebia balekhelwa okhuchinga, mbu etsifuremu, tsisimbo, ebikhongo, emial'lo; 32netsisiilo, ebitil'lo biatsio, nebibambo biatsio, nemikoye chiolusimbo olwabotokhana liheema, nebindu biosi ebitiyilwangakhwo. Buli mundu khubo alekhelwe okhuchinga ebindu nalebe. 33Buno nibwo obukhalabani bwabetsinyumba tsiabaana ba Merari, mubukhalabani bwabwe Mwiheema. Balahesia obukhalabani yibwo hasi hobwemeli bwa Itsamari omwana womwesaalisi Haruni.
Okhubalwa khwa Balawi
34Kho Musa na Haruni nabemeli bomukanda nibabala abaana ba Bakohatsi, mutsinyumba tsiabwe khandi mubilibwa biabwe, 35okhurula khubemihika amakhumi kataru, okhwola khubemihika amakhumi karano. Yabo abali nibahel'le okhukhola emilimo Mwiheema liokhubaho khwo MWAMI. 36Ababalwa khubomutsinyumba tsiabwe bali etsielefu tsibili, tsimia tsine natsitaru namakhumi karano. 37Bano nibo ababalwa khubetsinyumba tsia Bakohatsi, bosi abanyala okhukhola emilimo Mwiheema liokhubaho khwo MWAMI aba Musa na Haruni babala singa obwo MWAMI yali nalachile Musa.
38Abaana ba Gerishoni mutsinyumba tsiabwe khandi mubilibwa biabwe babalwa, 39okhurula khubemihika amakhumi kataru, okhwola khubemihika amakhumi karano. Yabo abali nibahel'le okhukhola emilimo Mwiheema liokhubaho khwo MWAMI, 40bali etsielefu tsibili, tsimia tsisasaba namakhumi kataru. 41Bano nibo ababalwa khubetsinyumba tsiabaana ba Gerishoni, bosi abakhalabananga Mwiheema aba Musa na Haruni babala singa obwo MWAMI yali nalachile.
42Yabo abokhutsinyumba tsiabaana ba Merari, babalwa okhulondokhana nebilibwa biabwe, 43okhurula khubemihika amakhumi kataru, okhwola khubemihika amakhumi karano. Yabo abali nibahele'le okhukhola emilimo Mwiheema liokhubaho khwo MWAMI, 44bali etsielefu tsitaru netsimia tsibili. 45Bano nibo ababalwa khubetsinyumba tsiabaana ba Merari, aba Musa na Haruni babala singa obwo MWAMI yali nalachile.
46Musa nende Haruni nabemeli ba Isiraeli babala Abalawi okhulondokhana netsinyumba tsiabwe nende ebilibwa biabwe. 47Yabo abali abemihika amakhumi kataru okhwola khubemihika amakhumi karano, abali nibahel'le okhukhola emilimo Mwiheema liokhubaho khwo MWAMI, 48ababalwa khubo bali etsielefu munane, tsimia tsirano, namakhumi munane. 49Singa obwo MWAMI yali nalachile okhubir'ra mu Musa nimbwo barebwa buli mundu khubukhalabanibwe nokhubuchinji bwebindubie. Bababala singa obwo MWAMI yali nalachile Musa.
Currently Selected:
OBUBALI 4: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
