OBUBALI 3
3
Abasiani ba Haruni
1Tsino nitsio tsinzibulo tsia Haruni na Musa olwene yilwo olwo MWAMI yal'loma nende Musa, nali khusikulu sia Sinai. 2Kano niko amera kabaana ba Haruni; owokhuranga ni Nadabu, ma Abihu, Eliasa na Itsamari.#Obub. 26:60 3Kano niko amera kabaana ba Haruni, abesaalisi abatsukhiil'lwa amafura, aba yahula okhukhalabanilanga mubwesaalisi. 4Nebutswa Nadabu nende Abihu bafwa olwa baleera omul'lo okurali omutsienukhu imbeli wo MWAMI, musitsiimi sia Sinai; ne Sibalikhwo nabaana tawe, nabo Eliasa na Itsamari barumikha singa abesaalisi olwa Haruni yali nasili mwoyo.#Abal. 10:1-2; Obub. 26:61
Abalawi bahulwa okhurumikhila abesaalisi
5OMWAMI nabool'la Musa mbu, 6“Sunda olwibulo lwa Lawi ahembi, ma abahule okhurumikhila omwesaalisi Haruni. 7Balakholanga emilimo chiokhulinda Liheema liokhubaho khwo MWAMI ma barumikhile abesaalisi nende abomukanda kwosi. 8Khandi balalindanga ebindu biosi bie Liheema nende akabatakhungwa okhukhol'la Abaisiraeli bosi. 9Omulimo kwa Abalawi bali n'nakwo, nokhurumikhila Haruni nende abasianibe. 10Khandi wahule Haruni nabasianibe okhuhesia omulimo kwobwesaalisi bwabwe; nebutswa oundi wosi niyakhakukhola aleerwa.”
11OMWAMI khandi nabool'la Musa mbu, 12“Luno musilenje siabebulwa bokhuranga mubaana ba Baisiraeli, mbukuye Abalawi; nababetsenge abanje. 13Olwa ndali okhwira abaana bokhuranga aba Bamisiri, ndali okhweyahul'la abebulwa bokhuranga musieinyumba ya Baisiraeli nende ebibulwa biokhuranga mumiruko chiabwe chiosi. Ise nise OMWAMI.”#Okhur. 13:2
Okhubalwa khwa Balawi
14Olwa Musa yali nali musitsiimi sia Sinai, OMWAMI yalaka Musa 15okhuhandika amera ka Balawi okhulondokhana nebilibwa biabwe khandi netsinyumba tsiabwe, buli musaatsa wosi okhurula khubomwesi mulala nende abayomba yaho. 16Kho Musa yababala singa obwo MWAMI yali namulachile. 17Lawi yali nabaana bataru, nabo bali mbu: Gerishoni. Kohatsi nende Merari. 18Ne kano niko amera kebilibwa bia Gerishoni: Libini nende Shimei. 19Ebilibwa bia Kohatsi nabio biali Amuramu, Isari, Heburoni nende Usieli. 20Ne ebilibwa bia Merari nabio biali: Mahali nende Mushi. Yabo nibo abakuka babwe khumera kabwe okhulondokhana netsinyumba tsiabwe.
21Musilibwa sia Gerishoni, baliho abeinyumba ya Libini, nende abeinyumba ya Shemei. 22Abes'saatsa ababalwa khubo abomwesi mulala nende abayomba yaho bali abandu etsielefu tsine natsitaru netsimia tsirano. 23Abetsinyumba tsia Gerishoni balakwa okhukhoma ekambi yabwe indangu we Liheema khulubeka lwemasaba, 24ne Elisafu omwana wa Laeli yali omwemeli wabwe. 25Ne abesilibwa sia Gerishoni bahebwa okhulinda ebindu bino: Liheema nesifuunikho sialio esiomukari, nende esifuunikho esieikulu, epasia yomubwinjil'lo bwalio, 26etsipasia etsie mumukitsi okwabotokhana Liheema nende olusambwa, nende epasia eyomubwinjil'lo bwokhwinjila mumukitsi tsana. Nibo abasinjil'langa emilimo chiosi echiokhukhalabana khubindu yibi biosi. 27Mubesilibwa sia Kohatsi baliho abeinyumba ya Amuramu, nende abeinyumba ya Isari, nende abeinyumba ya Heburoni, nende abeinyumba ya Usieli. 28Abes'saatsa ababalwa khubo okhurula khubomwesi mulala nende abayomba yaho, bali etsielefu munane netsimia tsisasaba. 29Abetsinyumba tsia Kohatsi balakwa okhukhoma ekambi yabwe khulubeka lwenandete lwe Liheema, 30ne Elisafani omusiani wa Usieli yali omwemeli wesilibwa siabwe. 31Ne ebia bahebwa okhulinda biali: Lisanduku lie Indakano, esihani sietsitaya, netsisambwa, nebibanulwa biabesaalisi barumikhilanga Hatsienukhu, nende epasia yomubwinjil'lo bwa Habundu Hatsienukhu Okhusila. Nibo abasinjil'la emilimo chiosi chiokhukhalabana khubindu yibio biosi. 32Omwemeli wa Balawi yali Eliasa omusiani womwesaalisi Haruni. Niye owali omusinjil'li we yabo abahebwa obulindi bwa Habundu Hatsienukhu. 33Musilibwa sia Merari, baliho abeinyumba ya Mahali, nende abeinyumba ya Mushi. 34Abes'saatsa ababalwa khubo, okhurula khubomwesi mulala nende abayomba yaho inamba abandu etsielefu tsisasaba netsimia tsibili. 35Omwemeli wesilibwa siabetsinyumba tsia Merari yali Surichi omwana wa Abihaili. Nabo balakwa okhukhoma ekambi yabwe khulubeka lwesinyolu lwe Liheema. 36Bahebwa okhulinda ebitiili bie Liheema netsisimbo tsialio netsisiilo tsiabio nebikuru bialio nende ebimanulwa bialio biosi. Nibo abasinjil'la emilimo chiosi echiokhukhalabana khubindu yibi biosi. 37Khandi basinjil'langa etsisiilo tsiesioba womuchitsi nende ebikuru biatsia, nebibambo biatsio, nende emikoye tsiatsio.
38Musa nende Haruni nabasianibe balakwa okhukhoma ekambi yabwe imbeli we Liheema khulubeka lwebukwe. Nabo bahebwa okhulinda emilimo echia Habundu Hatsienukhu khulwa abandu ba Isiraeli. Omundu wosi owakhateema okhukhola mbwo yakherwa. 39Bosi ababalwa khu Balawi, abali abes'saatsa abomwesi mulala nende abayomba yaho aba Musa yahandika amera okhulondokhana nebilibwa biabwe bali etsielefu amakhumi kabili natsibili.
Abalawi babukula obweyangu bwabeekulanda
40OMWAMI yabool'la Musa mbu “Obale abasiani abekulanda bosi aba Baisiraeli nabanje ma nahandika amera kabwe okhuchiakila khubomwesi mulala nende abayomba yaho. 41Abasiani abekulanda bosi ba Baisiraeli nabanje. Nebutswa musilenje siabwe mbukuye Abalawi okhuba abanje! Ise nise OMWAMI! Khandi mbukuye emiruko chia Balawi musilenje siemiruko echieimbeli okhwibulwa okhuba echianje.” 42Musa yakhola mbwo ma nahandika amera kabekulanda 43abomwesi mulala nende abayomba yaho. Bosi halala bali abandu etsielefu amakhumi kabili natsibili, etsimia tsibili namakhumi kane nakataru nende bataru.
44OMWAMI nabool'la Musa mbu, 45“Bukula Abalawi musilenje siabekulanda bosi ba Baisiraeli, obahaane khu ise, khandi obukule emiruko chia Balawi echieimbeli okhwibulwa ochihaane khu ise. 46Ne khulwa mbu abekulanda ba Baisiraeli bayombelanga Abalawi abandu etsimia tsibili namakhumi kane nakataru nende bataru, okhwola onunule abasiani abametekhanga okhuyomba obwinji bwa Balawi. 47Khu buli mulala khubo omurunjile ebitonye birano biefetsa okhuhelana nesichelo esiahuchil'lwa. 48Ma ohelesie Haruni nabasianibe amapesa yako.” 49Kho Musa yakhola mbwo ma nabukula 50ebitonye biefetsa ebihela elefu ndala tsimia tsitaru namakhumi kasasaba nabirano 51nabihaana khu Haruni nende khubasianibe.
Currently Selected:
OBUBALI 3: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
