OBUBALI 35

Amatookho akahanwa khu Balawi

1Ma OMWAMI nal'loma nende Musa musipaapi sia Moabu ahembi na Yorodani mu Yeriko namubool'la mbu,#Yosh. 21:1-42 2“Laka abandu ba Isiraeli mbu khubulaame obuli obwabwe bahelesie Abalawi amatookho akokhumenyamwo, khandi babahelesie obwayilo ahembi namatookho tsana. 3Amatookho yako kabe akabwe okhumenyamwo. Ne obwayilo bube obwemiruko chiabwe, nende ebiayo biabwe bindi biosi. 4Ne obwayilo bwamatookho yako, obwa bahelesia Abalawi, burule khumasisi kamatookho nibutsilil'la khuburambi obuhela etsimiita tsimia tsine namakhumi karano tsimbeka tsiosi. 5Muchele esioba welitookho, khulubeka lwebukwe etsimiita tsimia tsirano natsine, khulubeka lwenandete etsimiita tsimia tsirano natsine, khulubeka lwemasaba etsimiita tsimia tsirano natsine, khandi khulubeka lwesinyolu etsimiita tsimia tsirano natsine ma litookho liene libe hakari. Yibwo bulaba obwayilo bwamatookho yako. 6Ne amatookho aka bahelesia Abalawi kabe amatookho kasasaba kobwilukhilo, akomundu anyala okhwilukhilamwo olwaba niyetsukhila niyeer're owasie. Okhumeeta khu yako, babahelesie amatookho kandi amakhumi kane nakabili. 7Amatookho yako kosi aka balahelesia Abalawi kalaba amatookho amakhumi kane namunane, halala nende akobwayilo bwako. 8Obwinji bwamatookho ka Balawi mubuli lwibulo lwa Baisiraeli kalahanwa aha kali okhulondokhana nende obwinji bwamatookho kosi mulwibulo tsana; nikali amenji bahaane amenji ne nikali mati bahaane mati.”

Amatookho Kobwilukhilo

(Okhuka. 19:1-13; Yosh. 20:1-9)

9OMWAMI yabool'la Musa 10abool'le abandu ba Isiraeli mbu, “Olwa namwambukhe Yorodani nimwinjila musibala sia Kanaani, 11muleela amatookho kobwilukhilo; mbu omundu wosi oba niyetsukhan'na okhwira omundu yelukhileyo. 12Omundu uyo alaba mumulembe ebwene iyo sila okhurunjibwa es'salia nabekho bomundu owir'rwe. Omwiri uyo alekhe okhwirwa okhwola olwa asinjila imbeli wesiina okhuyaalwa. 13Mwahule amatookho kasasaba kobwilukhilo, 14kataru kabe injelekha wa Yorodani khulubeka lwebukwe, ne kataru kabe musibala sia Kanaani. 15Amatookho yako kalaba akobwilukhilo khu Baisiraeli nende khubacheni abamenyibwa mubo bosi. Omundu wosi oba niyetsukhila niyeera owasie yelukhilemwo.

16“Nebutswa naba namukhupa nesindu esialombwa khusibia siosi, ma omundu tsana nafwa, kho nomwiri. Ne okhwola omundu omwire yerwe. 17Nohomba naba namukhupa nelichina elia yaali n'nalio mumukhono, eliakhanyala okhuchila omundu uyo afwe, kho nomwiri. Ne okhwola omundu omwiri yerwe. 18Nohomba naba namukhupa neindabusi nohomba olusaala lwosi olwa yaali n'nalwo mumukhono, ma omundu tsana afwe, kho nomwiri. Ne okhwola omundu omwiri yerwe. 19Omwikho owahembi womundu owir'rwe uyo niye okwana okhwira omwiri uyo. Naba namunyoola okhwola amwire.

20“Omundu naba niyahamba owasie obusuku, ma amwire khulwa okhumulumba hasi nohomba okhumulasa nesindu siosi namukonekheye, 21nohomba naba namukhupa nomukhono ma afwe, kho omundu uyo ali nesikha siobwiri, ne okhwola yerwe. Omwikho wahembi womundu owir'rwe niye okwana okhwira omundu omwiri uyo. Naba namunyoola amwire.

22“Nebutswa omundu anyala okhwitsukhan'na niyeera owasie sila obusuku bwosi tawe, khulwo okhumulumba hasi nohomba okhumulasa nesindu siosi, ne naramukonekheye tawe. 23Nohomba anyala okhulasa lichina ne naralolanga omundu wosi tawe ma liire omundu owa ye arachomelenge okhwira khandi orali omusukuwe tawe. 24Mumang'ana singa yako omukanda kwa Baisiraeli bakhalake esiina nisimufwilanga omwikho womundu owir'rwe ne omwiri siramufwila tawe. 25Omukanda kwa Baisiraeli kusoole omwiri uyo okhurula khumwikho womundu owir'rwe orunanga okhurunjia es'sialia, ma bamukalusie mwitookho elia yali niyelukhilamwo. Okhwola amenyeyo okhwola olwa Omwesaalisi Omukhongo oba naliho olwene yilwo aba nafwiye. 26Nebutswa omwiri uyo naba narula mwitookho liobwilukhilobwe, aha yelukhila, 27ma omwikho womundu wafwa orunanga okhumala es'sialia uyo amunyoole, ma amwire, kho okhurunjia es'sialia singa yikhwo sikhubalwanga singa obwiri tawe. 28Omwiri yali nakwanile okhumenya mwitookho liobwilukhilobwe okhwola olwo Mwesaalisi Omukhongo oba naliho olwene yilwo aba nafwiye; nebutswa olunyuma lwo Mwesaalisi Omukhongo aba nafwiye, omwiri uyo akalukhe musibala esia yarulamwo. 29Ne amang'ana kano kalondwe nende inywe nende abetsinzibulo tsienywe tsiosi hosi aha muba nimwamenya.

30“Omundu oba nasitakwa khulwobwiri, esiina sinyala okhumufwila nikali baliho abakobokheli babili nohomba bataru. Obukobokheli bwomundu mulala sibunyala okhuchila omundu wosi abe nesikha siobwiri tawe.#Okhuka. 17:6; 19:15 31Omwiri okhwola yerwe. Sanyala okhubula okhwirwa khulwo khurunga amapesa tawe. 32Omundu naba niyelukha ma atsie mwitookho liobwilukhilo, muramuhuchil'la arunge amapesa ma akalukhe okhumenya musibala esiayarulamwo olwo Mwesaalisi Omukhongo aba nasili okhufwa tawe. 33Nimwakhakhola mbwo, mwakhafwabia esibala esiamumenyelemwo. Obwiri bwononinjia esibala; ne omwiri naranyala okhwirwa, ebulakhwoho injila yosi eyokhukhola omulukha kwokhusiiya esibala esiomundu yer'rwamwo. 34Kata murafwabia esibala esia mumenyangamwo tawe, sichila Ise nise OMWAMI ne menyanga hakari wabandu ba Isiraeli.”

Currently Selected:

OBUBALI 35: EBAIBO

Highlight

Copy

Compare