OBUBALI 34
34
Tsinzakho tsieliloba lia Kanaani
1OMWAMI yahelesia Musa 2amalako kano khulwabandu ba Isiraeli okhulonda. “Olwa namwinjile musibala sia Kanaani esia muhelesianga sibe obulaame bwenywe, etsinzakho tsiasio tsibe singa mbu, 3olubeka lwenywe lwenandete lulabukulakhwo ebitonye bilala khusitsiimi sia Sini nilulonda khundulo khwa Edomu, khandi olwakho lwenywe lwenandete lulaba okhurula khusihesi siebukwe esie Inyanza Yechumbi. 4Ma olwakho lwenywe lulakotola ndutsia elubeka wenandete wes'sia sia Akarabimu, nilutsilil'la okhwola Sini, ne esihesi sialwo silaba elubeka lwenandete wa Kadeshi Barinea; khandi lularula ndutsia Hasari Adari, nilutsilil'la okhwola Asimoni. 5Ma olwakho lulakotola okhurula Asimoni okhwola khumuchelakwe Misiri, ne esihesi sialwo silaba hanyanza ya Mediterenia.
6“Ne olwakho lwemasaba lulaba Inyanza ya Mediterenia.
7“Ne olwakho lwenywe lwesinyolu ndwoluno; mbu lularula khu Nyanza ya Mediterenia okhwola khusikulu sia Hori; 8ne okhurula khusikulu sia Hori, mware olwakho okhwola khulung'anyi lwa Hamatsi. Lutsie okhwola Sedadi, 9nende okhutsia Sifironi, ne esihesi sialwo sibe Hasa Enani.
10“Ma mware olwakho lwenywe lwebukwe, lurule Hasari Enani nilwola Shefamu. 11Ma lukongome okhurula Sefamu okhwola Haribeli khulubeka lwebukwe wa Aini; ma khandi lukongome nilwola khubikulu ebili ebukwe we Inyanza ya Galilaya. 12Okhurula yaho lukongome enandete okhwola khumuchela kwa Yorodani, ne esihesi sialwo sibe Inyanza Yechumbi.
“Yitsio tsilaba tsimbeka tsine etsietsinzakho tsiesibala sienywe.”
13Kho Musa yalaka abandu ba Isiraeli naboola mbu: “Yisio nisio esibala esia mulalaamilwa munjila yokhukhupa imbulu; nisio esio MWAMI yalaka mbu alahelesia tsinzibulo tsirano natsine nende enusu.#Yosh. 14:1-5 14Abandu bolwibulo lwa Rubeni, nende abolwibulo lwa Gadi, nende enusu yolwibulo lwa Manase bamal'le okhunyoola obulaame bwabwe. 15Tsinzibulo yitsio tsibili nende enusu yolwibulo bamal'le okhunyoola obulaame bwabwe injelekha wa Yorodani mu Yeriko, elubeka lwebukwe, oluchomananga nende aheliuba lirul'langa.”
Abemeli bokhusinjil'la okhukabulwa khwesibala
16Ma OMWAMI nabool'la Musa mbu, 17“Eliasa omwesaalisi nende Yoshwa omusiani wa Nuni nibo abalakabul'la abandu esibala sibe obulaame bwabwe. 18Khandi obukule buli omukhulundu mulala khubuli olwibulo, babakhonye okhukabula esibala.” 19Ne amera kabandu yabo ngakano: mbu khubolwibulo lwa Yuda, Kalebu omusiani wa Yefune. 20Ne khulwibulo lwabaana ba Simioni, Shemweli omwana wa Amihudi. 21Khulwibulo lwa Benjameni, Elidadi omwana wa Kisiloni. 22Ne khulwibulo lwa Dani, Buki omwana wa Yokili. 23Khubaana ba Yosefu; khulwibulo lwa Manase, Hanieli omwana wa Efodi. 24Ne khulwibulo lwa Efuraimu, Kemueli omwana wa Shifitani. 25Ne khulwibulo lwa Sabuloni, Elisafani omwana wa Paranaki. 26Ne khulwibulo lwa Isakari, Palitieli omwana wa Sasani. 27Ne khulwibulo lwa Asheri, Ahihudi omwana wa Shelomi. 28Ne khulwibulo lwa Nafutali, Pedaheli omwana wa Amihudi. 29Yabo nibo abandu abo MWAMI yalaka okhukabul'la abaana ba Isiraeli obulaame musibala sia Kanaani.
Currently Selected:
OBUBALI 34: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
