OBUBALI 32

Tsinzibulo etsiamenya ebukwe wa Yorodani

(Okhuka. 3:12-22)

1Abolwibulo lwa Rubeni nende abolwibulo lwa Gadi bali nemiruko eminji. Balola esibala sia Yaseri, nende esibala sia Gileadi, nisili esilahi khulwo okhuruchilamwo tsing'ombe. 2Kho batsia khu Musa nende Eliasa omwesaalisi, nende khubemeli bomukanda nibaboola mbu; 3“Atarotsi, Diboni, Yaseri, Nimira, Eleale, Sebani, Nebo nende Beoni, 4nesibala esio MWAMI yakhonya Abaisiraeli okhuleka. Nesibala esilahi esiokhuruchila mwo emiruko; nefwe khuli nemiruko eminji. 5Nimuyanza mukhuhuchiil'le ifwe abasumba benywe khuhebwe esibala sino sibe esiefwe; murakhwambusia injelekha wa Yorodani tawe.”

6Naye Musa nabakalusia naboola mbu, “Mwenyanga mwikhale hano olwa Abaisiraeli basienywe batsia mwihe noho? 7Kho busina muteemanga okhwira emioyo chiabandu ba Isiraeli okhukhalania Yorodani nende okhwinjila musibala esio MWAMI yabahelesia? 8Nambwo abakuka benywe bakhola olwa ndabaruma okhulambuula Kadeshi Barinea khulwo khuhengelesia esibala yisio.#Obub. 13:17-33 9Batsia okhwola mwibanda lia Eshikoli, ne nibalola esibala yisio, nebutswa olwa bakalukha, beera emioyo chiabandu ba Isiraeli okhwinjila musibala esio MWAMI yali niyabahelesia. 10OMWAMI yali nelirima litukhu yilio ma niyesuha mbu:#Obub. 14:26-35 11‘Sichila sibatsilil'la okhuba abahulili khu ise tawe, abulaho omundu okhuchiachila khubemihika amakhumi kabili nende abayomba yaho abarula Emisiri, owakhenjile musibala esia ndesuha okhuha Aburahamu, Isaka nende Yakobo tawe.’ 12Yabo bali Abaisiraeli bosi narali Kalebu omwana wa Yefune Omukeni nende Yoshwa omwana wa Nuni; bo balonda OMWAMI nomwoyo kwosi. 13OMWAMI yatiil'la Abaisiraeli lirima nabatimatimia y'yi ney'yi musitsiimi khulwemihika amakhumi kane, okhwola olwolwibulo yilwo lwosi olwakhola obubi imbeli wo MWAMI lwali nilufwiye. 14Ne luno inywe mubukuye obukono bwabakuka benywe, olwibulo oluhia lwabandu aboni, aberechekhele okhuleeranga OMWAMI lirima lilulu khubandu ba Isiraeli. 15Nikakhaba mbu inywe abolwibulo lwa Rubeni nende Gadi mwakhasuula okhumulonda luno, alalekha abandu yaba bosi musitsiimi khandi, nenywe mulatulwa khulwo okhukhuywa khwabwe.”

16Nibesunda ahembi khu Musa nibaboola mbu, “Mbelio, okhuhuchil'le khwombokhele emiruko chiefwe liboma, khandi nende amataala akasirwa noluhinga khulwa abakhasi befwe nabaana befwe. 17Ma kho nefwe nilwo olwa khulaba nikhwerechekhele okhutsia mwihe na Baisiraeli basiefwe ma khube imbeli okhuseera abasuku okhwola olwa nakhube khubaheye esibala esianasibe esiabwe. Nabo abaana befwe nabakhasi befwe balamenya mumataala kasirwa namasisi. 18Sikhulakalukha munzu tsiefwe tawe okhwola olwa abandu ba Isiraeli balaba nibabukuye buli mundu obulaamebwe. 19Ifwe sikhulabukula obulaame halala n'nabo injelekha wa Yorodani tawe; sichila khunyooye obulaame bwefwe hano ebukwe wa Yorodani.”

20Ma Musa nababool'la mbu, “Nimuba nimuboolanga akatooto, kho hano imbeli wo MWAMI mwerechekhe okhutsia mwihe. 21Abasaatsa bokhulwana lihe abali mwinywe batsie injelekha wa Yorodani khandi hasi welilako lio MWAMI baseera abasuku befwe okhwola olwo MWAMI abaleka, 22ma babukule obulaame bwesibala. Nimumal'le okhukhola yako sichila mulaba nimuhesisie akamutakhwanga okhukhol'la Abaisiraeli basienywe nilwo olwa MWAMI alahuchil'la mbu esibala sino esili ebukwe wa Yorodani nesieywe. 23Nebutswa nimuba nimusuula okhukhola mbwo, muchetsiyianga mbu mwakhaba nimwoneye OMWAMI. Murakholakhwo obusiamu khwing'ana yili tawe, khase mulahebwa esinyasio. 24Ma kho mwombokhe amataala kabaana benywe nende abakhasi benywe namaboma ketsing'ombe namakondi kenywe, nebutswa mukhole kosi aka mubooye neminwa chienywe.”

25Ma abandu ba Gadi nende Rubeni nibabool'la Musa mbu, “Omwami, ifwe khulakhola singa obwa olakanga. 26Abaana befwe abatitiiti, nabakhasi befwe, nemiruko chiefwe balasikala mumataala ka Gileadi. 27Nebutswa ifwe khwerechekhele okhutsia mwihe hasi hobwemeli bwo MWAMI. Khwitsa okhwambukha Yorodani ma khulwane singa obwe ibe obooye.”

28Kho Musa yahaana lilako yili khumwesaalisi nende Yoshwa omusiani wa Nuni, nabemeli bebilibwa bietsimbia tsia Isiraeli naboola mbu, 29“Abandu ba Gadi nende aba Rubeni, nibaba nibambukha Yorodani niberechekhele okhulwana hasi hobwemeli bwo MWAMI, ma muleke esibala khulwo bukhonyi bwabwe; kho mubahelesie esibala sia Gileadi sibe obulaame bwabwe. 30Ne nibaba nibasuula okhwambukha ma nibatsia okhulwana lihe halala n'nenywe balanyoola omukabwa kwabwe musibala sia Kanaani singa inywe.”

31Kho abandu ba Gadi nende aba Rubeni nibakalusia nibaboola mbu, “Singa obwo MWAMI yakhubooleye ibe, nimbwo khulakhola. 32Khulaambukha hasi hobwemeli bubwo, ne khwitsa okhwinjila musibala sia Kanaani, nebutswa obulaame obulaba obwefwe khulasikala n'nabwo khu Yorodani injelekha yino.”#Yosh. 1:12-15

33Kho Musa yahelesia abolwibulo lwa Gadi, nende Rubeni ma nende enusu yolwibulo lwa Manase omusiani wa Yosefu, lihanga lia Sihoni omuruchi wa Amori, nende esibala sia Ogu omuruchi wa Bashani, halala namataala nende obwayilo obwalondokhana n'nasio. 34Ne olwibulo lwa Gadi niboombokha Diboni, Afarotsi, Aroeri, 35Atarotsishofani, Yaseri, Yokubeha, 36Betsinimira, nende Betsi Harani; mbu amataala kamasisi, nende maboma kamakondi. 37Abaana ba Rubeni nabo nibombokha Heshiboni, Eleale, Kiriatsaimu, 38Nebo, Baali Meoni (amera kaako kali khukalukhanibwa) nende Sibima.

39Ne abandu besilibwa sia Makiri omusiani wa Manase nibatsia Gileadi, nibalileka, nibakhungania Abaamori abali ebwene yiyo. 40Kho Musa nahelesia abesilibwa sia Makiri omwana wa Manase esibala sia Gileadi; nabo nibamenyayo. 41Ne Yairi omwana wa Manase natsia okhuseera amataala kebwene iyo ma nakahamba, ma nakalanga mbu, “Amataala ka Yairi.” 42Noba naye yali okhuseera Kenatsi namataala kalio, nalileka ma nalilanga mbu Noba, yalikulikha eliira lilie omwene.

Currently Selected:

OBUBALI 32: EBAIBO

Highlight

Copy

Compare