OBUBALI 31
31
Akelihe litsienukhu khu Midiani
1OMWAMI yabool'la Musa mbu, 2“Haana esinyasio khu Bamidiani khulwa amabi akabakhol'la abandu ba Isiraeli. Nomal'le okhukhola mbwo olafwa.” 3Kho Musa yabool'la abandu mbu, “Mwerechekhe okhulwana Abaamidiani ma mubahe esinyasio khulwamabi akabakhol'la OMWAMI. 4Okhurula mubuli olwibulo lwa Isiraeli mubukule abandu elefu ndala, ma mubarume mwihe.”
5Kho mubuli lwibulo babukula abandu elefu ndala ma bosi halala nibaba tsielefu likhumi natsibili aberechekhele okhutsia mwihe. 6Ma Musa nabaruma mwihe, khubuli olwibulo elefu ndala, hasi hobwemeli bwa Fenihasi omwana womwesaalisi Eliasa, owalindanga ebimanulwa ebiahabundu hatsienukhu nende etsitulumbete tsiokhukhupa. 7Baseera Midiani singa obwo MWAMI yalaka Musa, nibeera abasaatsa bosi pe, 8halala nende abaruchi ba Midiani barano! Ewi, Rekemu, Suri, Huri nende Reba, khandi beera Balaamu omwana wa Beori halala n'nabo.
9Abandu ba Isiraeli babukula abakhasi ba Midiani nibabara mubuhambe, halala nabaana babwe; khandi nibabukula tsing'ombe tsiabwe tsiosi, nebiayo biabwe biosi, ma nibayaaka emiandu chiabwe chiosi, 10nibasamba amataala kabwe kosi, nende amaheema kabwe kosi. 11Babukula ebindu biosi ebia bali nibayaakile halala nabandu nende khumiruko, 12Nibaleera abasumba yabo nende emiruko yitsio nende biosi ebia bali nibayaakile yibio khu Musa nende khu Eliasa nende khumukanda kwabandu ba Isiraeli, mukambi eyomusipaapi sia Moabu, ahembi nende Yorodani mu Yeriko.
Abelihe bachelela
13Kho Musa nende Eliasa omwesaalisi nabemeli bosi abomukanda nibarula nibatsia okhubaakan'na, esioba wekambi. 14Ne Musa yatiil'la abasinjil'li bamahe netsisawoni nende abelihe bosi oburima. 15Musa nabareeba mbu, “Kho esichil'le nimuhonokosia abakhasi bosi nisina? 16Lole, abakhasi nibo abachila abandu ba Isiraeli nibarabba abasubilwa khu MWAMI olwa bali Peori khulwo okhulonda obwibaali bwa Balaamu; ne niko akachila olumbe nilubaho khubandu bo MWAMI.#Obub. 25:1-9 17Kho luno mwire buli musiani mubaana abati, khandi mwire buli omukhasi owali omuchima, 18nebutswa abakhaana, abasili okhuheyakhwo nomusaatsa khandi abakhasi abasili nolukhaana mwebikhile abene. 19Nenywe mwesi aber'rekhwo omundu nohomba abatiil'lekhwo khumulambo, mukhome amaheema kenywe esioba wekambi khulwa amatukhu kane nakataru. Mwesiiye khwitukhu liakhataru khandi khwitukhu liakhane nakhataru, inywe abene nende abakhasi abamuhambile. 20Khandi musiiye buli ingubo yosi, nebindu biosi biamaseelo, nebindu biosi ebianabwa khubwoya bwetsimbusi, nende ebialombwa khumisaala.”
21Eliasa omwesaalisi nabool'la abasaatsa yabo abali nibarul'le mwihe mbu, “Kano niko amalako ako OMWAMI yalaka Musa. 22Ebindu biosi ebialombwa khutsahabu, nende khufetsa, nomukasa, nesibia, namabaati, namasaasi, 23mbu biosi ebiranyala okhuyia mumul'lo tawe, mubisiiye khulwo khubibisisia mumul'lo. Nebutswa bisiiyilwe khandi namaatsi kokhusiiya namanyaasi kabwe ne ebiakhanyala okhuyia mumul'lo, mubibisie mumaatsi. 24Khandi musaabe tsingubo tsienywe khwitukhu liakhane nakhataru, ma mube abasiiyikhu; ma olunyumakhwo mwinjile mukambi.”
Obukabuli bwebindu ebiyakilwe
25Ma OMWAMI nabool'la Musa mbu, 26“Ibe nende Eliasa nende abemeli mubale obwinji bwebindu ebiyaakilwe nende ebihambilwe halala nabandu nende emiruko. 27Mubikabule mubitonye bibili ebihelani; mbu esitonye silala sihebwa abandu abatsia mwihe ne esindi sihebwe abomukanda kwosi. 28Muhiinisie OMWAMI omurungo khubahambe belihe yabo, mbu mulala khubahambe tsimia tsirano, khandi khutsing'ombe, nokhutsipunda nokhubiayo mbwo. 29Obihaane khu Eliasa omwesaalisi, khulwe sihanwa esichomekhe khu MWAMI. 30Ne khusitonye esihan'nwe khubandu bandi bosi obukule silala khubuli amakhumi karano khubandu abasumba, khandi khutsing'ombe, nokhutsipunde, nende khumakondi mbwo. Obihaane khu Balawi abalindanga Liheema lio MWAMI eliabalekhelwa okhulinda.” 31Musa nende Eliasa omwesaalisi bakhola singa OMWAMI yali nalachile.
32Ne ebindu ebiabasikari bayaaka nibabibukula biali amakondi halala netsimbusi etsielefu tsimia tsisasaba namakhumi kane nakataru natsirano, 33tsing'ombe etsielefu amakhumi kane nakataru natsibili, 34netsipunda etsielefu amakhumi kasasaba nandala, 35nende abakhaana abasili nolukhaana etsielefu amakhumi kataru natsibili. 36Ne esitonye siabio, esiali omukabwa kweyabo abatsia mwihe, biali amakondi halala netsimbusi etsielefu etsimia. 37Ne omurungo kwo MWAMI khumakondi halala netsimbusi yitsio kwali etsimia tsisasaba namakhumi kane nakataru nakarano. 38Netsing'ombe natsio tsiali etsielefu amakhumi kataru natsisasaba ne omurungo kwo MWAMI khutsio kwali amakhumi kane nakataru natsibili.
39Etsipunda natsio tsiali etsielefu amakhumi kataru netsimia tsirano. Ne khutsio omurungo kwo MWAMI kwali amakhumi kasasaba nandala. 40Ne abandu nabo bali etsielefu likhumi natsisasaba; ne khubo omurungo kwo MWAMI kwali abandu amakhumi kataru nababili. 41Kho omurungo yikwo kwosi, nikwo okwali esihanwa esichomekhe khu MWAMI, ne Musa yakuhaana khu Eliasa omwesaalisi, singa OMWAMI yali namulachile.
42Ne esitonye siabio esiali siabandu ba Isiraeli bandi bosi esia Musa yara sibeka nahiinia khubandu yabo abatsia mwihe, 43siali amakondi etsielefu tsimia tsitaru namakhumi kataru natsine natsitaru netsimia tsirano. 44Tsing'ombe tsiali etsielefu amakhumi kataru natsisasaba, 45etsipunda etsielefu amakhumi kataru netsimia tsirano, 46nende abandu etsielefu likhumi natsisasaba. 47Musitonye yisio esiali siabandu ba Isiraeli, Musa yabukula esitonye silala mubuli amakhumi karano khubandu nende khumiruko, nasihaana khu Balawi abalindanga Liheema lio MWAMI eliabalekhelwa okhulinda, singa OMWAMI nalachile Musa.
48Ne etsisawoni etsiali ikulu wetsielefu tsielihe, mbu abakhongo betsielefu nende abakhongo betsimia, batsia khu Musa, 49nibamubool'la mbu, “Ifwe abarumikhilibo khubal'le obwinji bwabasaatsa belihe abali mubulindi bwefwe, ne sibalemelekhwo omundu kata mulala tawe. 50Kho khuleer're esihanwa khu MWAMI, khubindu ebia buli mundu anyooye, mbu ebimili bietsahabu, nemikotse, nemikasa, netsingaka tsiom'makosi, netsingaka etsiomubirwi.” Khubihaananga khu MWAMI singa omurungo kwobulamu bwefwe mbu ye alakhusoola. 51Musa nende Eliasa omwesaalisi nibabukula etsahabu yosi eya baleera, neeli ebimili ebiaranywa. 52Ne ebihanwa biosi ebie tsitswoni tsiahan'na OMWAMI, biali nobusiro obuhela etsikilo tsimia tsibili. 53Yabo abarali abakhongo belihe bali nibebikhila ebindu ebia bali nibayaakile. 54Ne Musa nende Eliasa omwesaalisi bahila etsahabu Mwiheema liokhubaho khwo MWAMI, kho OMWAMI abe onyala okhulindanga Abaisiraeli.
Currently Selected:
OBUBALI 31: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
