OBUBALI 30
30
Amalako khulwo khwesuha
1Musa yahelesia abemeli betsinzibulo tsiabandu ba Isiraeli, amalako kano. 2Olwa omundu yesuhanga okhuhaana esindu khu MWAMI nohomba okhwehwaba mbu sinakholekhwo esindu nalebe tawe arakhabula okhuhesia esiesuho sisie tawe, okhwola akhole kosi akayesuha okhukhola.#Okhuka. 23:21-23; Mat. 5:33
3Omukhaana omubuukha osimenyele munyumba ya papawe naba niyakhesuha okhuhaana esindu khu MWAMI nohomba niyehwaba mbu sinakholekhwo esindu nalebe tawe, 4okhwola ahesie buli siosi esiayesuha noho yalaka okhukhola, fwana papa uwe nafukula olwa ahulila esiesuho yisio. 5Nebutswa samwana naba namufukula khwitukhu elia ahulil'lakhwo, kho ebiesuho biosi, nebiesingo biosi ebia yeboheye, sibilalondwa tawe; ne OMWAMI alamubeela, sichila samwana yamufukula.
6Omukhaana osili okhutsia khumusaatsa naba niyesuha khulwo okhuchooma nohomba okhubula okhumanyilisia, kata naba niyehwaba, ma olunyuma ateesibwe, 7okhwola ahesie buli sindu esiayesuha nohomba esia yasubisia, fwana omusaatsawe naba nakafukula olwa akahul'lakhwo. 8Nebutswa omusaatsawe naba namwikal'la okhuhesia esiesuho olwaba nahuliye, kho sikamukhoya okhuhesia esiesuho yisio tawe. OMWAMI alamubeela.
9Nebutswa omukhasi omulekhwa, nohomba owabukhana nomusaatsawe, okhwola ahesie esiesuho siosi esiayesuha nende esindu siosi esiayehwaba.
10Ne omukhasi owateesibwa naba niyesuha esiesuho nohomba niyehwaba esindu, 11okhwola ahesie buli esindu siosi esiayesuha nohomba esiayehwaba, fwana omusaatsawe naba nafukula olwa aba nahuliye esiesuho yisio. 12Nebutswa omusaatsawe naba niyakhamwikal'la okhuhesia ebiesuho yibio khwitukhu olwa yabihulil'lakhwo, kho omukhasi uyo sakhoya okhusihesia tawe. OMWAMI alamubeela sichila omusaatsa yali okhumwikal'la okhusihesia.
13Omusaatsawe ali nobunyali okhuhuchil'la nohomba okhufukula esiesuho siosi esia aba niyesuha. 14Nebutswa omusaatsawe naba naramufukula khwitukhu eliaba nahuliliyekhwo akebiesuhobie okhwola ahesie ebiesuho biosi, nende akayehwaba kosi. Omusaatsa yahuchil'la khukebiesuho yibio sichila siyamufukula khwitukhu olwa yabihulil'lakhwo tawe. 15Nebutswa naba nabifukula olunyumakhwo, niyamala okhubihul'lakhwo khale, anyoole esinyasio esiesuho yisio nisirahesibubwe.
16Kano niko amalako ako MWAMI yahelesia Musa, khukomukhasi oraateesibwa omenyanga nasamwana nohomba omukhasi owateesibwa olwaba niyesuha nohomba niyehwaba.
Currently Selected:
OBUBALI 30: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
