OBUBALI 28
28
Ebihanwa bia bulitukhu
(Okhur. 29:38-46)
1OMWAMI yalaka Musa 2yebaal'le abandu ba Isiraeli okhuhaana khu MWAMI munyinga yahuchil'lwa omusango kwebiokhulia okumuyanzisianga. 3Chino nichio emisango chiebiokhulia ebia mulahaananga khu MWAMI: ebimeme biamakondi b'bili ebiomuhika mulala ebiralikhwo nobulema bwosi khulwo omusango omusambe kwa bulitukhu. 4Muhaane esimeme sielikondi silala mukamba tsuli, ne esimeme sindi mukolooba, 5buli silala sihanwe halala nomusango kwobuswache okwobusie obunyukhe obuhela ekilo ndala obutsokanibubwemwo eliita ndala yamafura amalahi komuseituni. 6Yiku nomusango kwabulitukhu okusambwanga kwosi, okwahanwa olwokhuranga khusikulu sia Sinai, singa omusango kwebiokhulia okwo omwayo omulahi okuyanzisianga OMWAMI. 7Singa omusango kwewaini okuhanwanga halala nesimeme sielikondi siokhuranga, osundule halusambwa eliita ndala yewaini. 8Khumukolooba ohaane esimeme sielikondi liakhabili singa omusango kwamukamba tsuli halala nomusango kwewaini. Yikwo nomusango kwebiakhulia, omwayo kwabio kuyanzisianga OMWAMI.
Esihanwa siesabato
9Khwitukhu liesabato ohaane ebimeme biamakondi b'bili ebiomuhika mulala ebiralikhwo obulema, halala nobusie obunyukhe etsikilo tsibili nibutsokanibwemwo amafura singa omusango kwobuswache; nende omusango kwewaini. 10Omusango omusambe yiku kuhanwe buli litukhu liesabato okhumeeta khumusango omusambe kwa bulitukhu, nende omusango kwakwo kwewaini.
Esihanwa sielitukhu liokhuranga khumwesi
11Ne mukhuchaaka khwa buli mwesi mulombele OMWAMI omusango omusambe, mbu etsihunwa tsibili, nelimiiku elala, nebimeme ebisaatsa ebiomuhika mulala bine nabitaru ebiralikhwo obulema bwosi. 12Singa omusango kwobuswache, muhaane obusie obunyukhe obutsokan'nibwemwo amafura komuseituni: khubuli echulukhi ndala muhaane etsikilo tsitaru tsiobusie: ne khubuli likondi muhaane etsikilo tsibili tsiobusie: 13ne khubuli esimeme sielikondi, muhaane ekilo ndala yobusie. Emisango emisambe yichi nemisango chiebiokhulia ne omwayo kwachio kuyanzisianga OMWAMI. 14Ne emisango chiokhutsukhil'lwa chiabio chibe etsiliita tsibili khu buli echulukhi, eliita ndala nende enusu khubuli limiiku ne eliita ndala khubuli esimeme sielikondi. Lino nelilako khulwo omusango kwokhusambwa okuhanwanga khwitukhu liokhuranga khumwesi khumuhika kwosi. 15Okhumeeta khumisango chiabulitukhu nende omusango kwatsio kwewaini muhaane imbusi ekhole singa omusango kwetsimbi.
Ebihanwa biokhwisabo liomukaati okubulamwo amamela
(Abal. 23:5-14)
16Mumwesi kwokhuranga, nikuli likhumi nakhane, nelitukhu lie Lisabo lie Pasaka khulwokhuhaana oluyali khu MWAMI.#Okhur. 12:1-13; Okhuka. 16:1-2 17Ma omwesi yikwo nikuli likhumi nakharano, lisabo likholwe; olwomukaati okuralimwo amamela okulalibwa khulwamatukhu kane nakataru.#Okhur. 12:14-20; 23:15; 34:18; Okhuka. 16:3-8 18Khwitukhu liokhuranga lie Lisabo mubukaanenje halala khulwokhwekayakaya ne murakholakhwo omulimo kwosi tawe. 19Muhaane omusango omusambe singa omusango kwebiokhulia khu MWAMI mbu etsihunwa tsibili, nelimiiku elala, nende ebimeme bielikondi biomuhika mulala bine nabitaru ebisaatsa ebibula obulema bwosi tawe. 20Muhaane emisango chiobuswache, echiahuchil'lwa, echiobusie obunyukhe obutsokelemwo amafura: etsikilo tsitaru tsiobusie khubuli ehunwa, etsikilo tsibili khulwe limiiku; 21khandi ekilo ndala khulwa buli esimeme khubimeme bine nabitaru. 22Khandi muhaane ekhole ndala khulwomusango kwetsimbi, ne munjila iyi mukhole omulukha kwokhusiiya abandu. 23Muhaane yibio halala nende omusango omusambe okwamukamba tsuli, okubetsanga omusango kwakhasotso. 24Munjila indelwa iyo khulwamatukhu kane nakataru muhan'ne OMWAMI omusango kwebiokhulia okwomwayo kwabio kuyanzisianga OMWAMI. Muhaane yibi, halala nende omusango omusambe kwabulitukhu, nende omusango kweiwaini. 25Ma khwitukhu liakhane nakhataru mubukaane halala khulwo khwekayakaya, ne murakholakhwo omulimo kwosi tawe.
Ebihanwa Khwisabo Lielichesa
(Abal. 23:15-22)
26Khwitukhu liokhuranga Khwisabo lie Lichesa olwa muleer'ra OMWAMI omusango kwobuswache obuhia, okhwola mubukaane khulwo khwekayakaya OMWAMI ne murakholakhwo omulimo kwosi tawe.#Okhur. 23:16; 34:22; Okhuka. 16:9-12 27Muhaane omusango omusambe kube omwayo omulahi okhuyanzisianga MWAMI. Muhaane etsihunwa tsibili, nelimiiku elala, nende ebimeme biomuhika mulala bine nabitaru ebisaatsa sila obulema bwosi. 28Muhaane emisango echiahuchil'lwa chiobuswache, mbu obusie obunyukhe obutsokelemwo amafura, etsikilo tsitaru khubuli ehunwa, etsikilo tsibili khu buli limiiku elala, 29ne ekilo ndala khubuli esimeme silala. 30Khandi muhaane imbusi ekhole ndala khulwomusango kwetsimbi ne munjila iyo mukhole omulukha kwokhusiiya abandu. 31Muhaane yibi nende omusango kwewaini okhumeeta khumusango omusambe okwa bulitukhu nende omusango kwobuswache. Mulole mbu emiruko yitsio tsibulakhwo obulema bwosi.
Currently Selected:
OBUBALI 28: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
