OBUBALI 27
27
Abakhaana ba Selofehadi
1Mala, Noa, Hokila, Milika nende Tirisa bali abakhaana ba Selofehadi omwana wa Heferi, ne Heferi yali omusiani wa Gileadi, owali omusiani wa Makiri, owokhutsinyumba tsia Manase omusiani wa Yosefu. 2Nibasinjila imbeli wa Musa, nende imbeli wa Eliasa omwesaalisi, nende imbeli wabemeli nende imbeli womukanda kwosi, hamuliangokwe Liheema liokhubaho khwo MWAMI nibaboola mbu, 3“Papa wefwe yafwila musitsiimi naralikhwo nabaana abasiani. Siyali mulala khumukanda kwa Kora, okwali okhukhol'la OMWAMI indiri tawe. Yafwa khulwe tsimbi tsitsie omwene. 4Kho busina eliira lia papa wefwe lihiinibwe mu Baisiraeli, sichila siyali no mwana omusiani tawe? Mukhuhelesie emiandu mubekho banga papa wefwe.”
5Kho Musa naleera amang'ana kabwe imbeli wo MWAMI. 6Ne OMWAMI nabool'la Musa mbu, 7“Abakhaana ba Selofehadi bareebele ling'ana eliahabwene; obahelesie emiandu chiabwe echiobulaame mubekho banga samwana wabwe. Obahelesie obulaame bwasamwana wabwe.#Obub. 36:2 8Khandi obool'le abandu ba Isiraeli mbu, omundu wosi naba nafwa, ne naralikhwo no mwana omusiani tawe, kho muhelesie omwanawe omukhaana obulaamebwe. 9Ne naba naralikhwo no mwana omukhaana tawe, kho muhelesie abaana babwe obulaame. 10Ne naba naralikhwo nabaana babwe tawe, kho muhelesie abaana banga samwana obulaame. 11Ne kata samwana naba naralikhwo nabaana babwe tawe, kho muhelesie owomulwibulolwe oli ahembi n'naye munzu yabwe obulaamebwe, bube obubwe. Abandu ba Isiraeli bakhole ling'ana yili singa ling'ana eliahuchil'lwa mumalako singa OMWAMI yalaka Musa.”
Yoshwa yahulwa okhubukula obukono bwa Musa
(Okhuka. 31:1-8)
12OMWAMI yabool'la Musa mbu, “Niina otsie khusikulu sino esia Abarimu, ahenge olole esibala esia mbelesianga abandu ba Isiraeli.#Okhuka. 3:23-27; 32:48-52 13Ne olwoba nosiluutsi, ibe nawe olafwa singa obwa Haruni omwana wenywe yafwa; 14sichila ibe halala n'naye mwakhol'la ling'ana lianje indiri musitsiimi sia Sini. Olwomukanda kwa Baisiraeli bamumuchil'la ibe nimuli Meriba mwasuula okhubamanyia obunyali bwanje obutsienukhu.” (Meriba nesitaho esili Kadeshi musitsiimi sia Sini.)
15Ma Musa nasaaya OMWAMI naboola mbu, 16“OMWAMI Nyasaye ohaananga obulamu bwosi, khusaayanga mbu wahule omundu onyala okhwemel'la omukanda kuno, 17khandi owokhubalakanga okhutsia mwihe kho omukanda kulekhe okhuba singa amakondi akarali nomwayi.”#1 Abar. 22:17; Esek. 34:5; Mat. 9:36; Mk. 6:34
18OMWAMI nabool'la Musa mbu, “Bukula Yoshwa omusiani wa Nuni, omundu owomwoyo kwanje kuli muye, omurekhwo omukhono.#Okhur. 24:13 19Omure imbeli wa Eliasa omwesaalisi, khandi imbeli womukanda kwosi ma omwemekhe okhuba omwemeli musilenjesio nibalolanga. 20Ma olamukabul'lakhwo khubunyalibwo mbu abomukanda kwa Baisiraeli bosi bamuhulilenje. 21Nayeletenje khu Eliasa omwesaalisi owanomurebelenje obulalilo bwanje khulwo okhurumikhila Urimu nende Tsumimu#27:21 Urimu nende Tsumimu Ebindu b'bili ebiarumikhilwanga nomwesaalisi okhumanyilisia obulalilo bwa Nyasaye; sikamanyikhile bulahi singa biarumikhilwanga tawe.. Munjila iyo Eliasa alemel'la Yoshwa nende abandu ba Isiraeli bosi mumang'ana kabwe kosi.” #Okhur. 28:30; 1 Sam. 14:41; 28:6 22Kho Musa yakhola singa obwa OMWAMI yamulaka. Yabukula Yoshwa namura imbeli wa Eliasa omwesaalisi, khandi imbeli womukanda kwosi. 23Yamurakhwo amakhono, ma namumanyia imbeli wabandu singa omwemeli okalukhile musilenjesie singa obwo MWAMI yali nalachile Musa.#Okhuka. 31:23
Currently Selected:
OBUBALI 27: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
