OBUBALI 25

Abandu ba Isiraeli nibali Epeori

1Olwa Baisiraeli batsia okhumenya mwibanda lia Akasia, abandu bachiaka okhuheya nende abakhasi Abamoabu abalinjiho. 2Abakhasi yabo balanga abandu mumasabo akokhukhol'la abanyasaye babwe emisango. Kho Abaisiraeli balia halala n'nabo khandi nibekayakaya 3Baali wa Peori. Kho OMWAMI yabahambila oburima 4ma nabool'la Musa mbu, “Bukula abemeli ba Baisiraeli bosi obeer're habulafu om'basu nikubalanga, ma nase sindahambwa noburima khubandu khandi tawe.” 5Musa nabool'la abakhongo ba Isiraeli mbu, “Simulala khwinywe yeere abandu bomulwibulo lulwe abekayakayanga Baali wa Peori.”

6Ne lola, mulala khu Baisiraeli yabukula omukhasi Omumidiani, Musa halala nomukanda kwosi nibareyekhwo imoni olwa bali nibalakayilanga hamuliangokwe Liheema liokhubaho khwo MWAMI. 7Ne olwa Fenihasi omwana wa Eliasa omwitsukhulu wa Haruni omwesaalisi yakalola, yabuukha narula hakari womukanda natsia. Yabukula lifumo m'mukhono, 8nalonda inyuma womusaatsa wa Isiraeli tsana, niyenjila mwiheema mukari, nabafumira bombi putu. Nilwo olwo olumbe olwali nilumalanga Abaisiraeli lwalekha. 9Nebutswa abali nibafwiye khulwolumbe yilwo bali etsielefu amakhumi kane natsine.

10Ma OMWAMI nabool'la Musa mbu, 11“Khulwe yako aka Fenihasi omwana wa Eliasa omwitsukhulu wa Haruni omwesaalisi akhol'le, sinzia okhuba noburima khubandu Baisiraeli khandi tawe. Ye siyali okhuhuchil'la obwekayakayi bwabanyasaye bandi abarali ise tawe, ma niko akachil'le nirabbamala mwileko lianje.” 12Khulwe yako omubool'le mbu, nombanga indakano n'naye, nayo elabetsangaho khasotso. 13Ye halala nabolwibulolwe balabetsanga abasaalisi sila esiakamo sichila yali okhuhambwa neimbalikha khuyabo abafukulanga ise ma nachila abandu nibalekhelwa tsimbi.

14Ne omusaatsa owerwa halala nomukhasi Omumidiani, yalangwanga Simiri, omwana wa Salu, omwemeli wesilibwa silala mubandu ba Simioni. 15Ne eliira liomukhasi Omumidiani owerwa liali Kosibi, omukhaana wa Suri. Suri yali omwemeli wabandu besilibwa silala mu Midiani.

16Ma OMWAMI nabool'la Musa mbu, 17“Oseere Abaamidiani ma obamume, 18khulwamabi aka bamukhol'la inywe olwa bamukaata nimuli Peori, khandi khulwa Kosibi omukhaana womukhulundu wa Midiani, omukhaana wabwe, oweerwa khwitukhu liolumbe, nimuli Peori.”

Currently Selected:

OBUBALI 25: EBAIBO

Highlight

Copy

Compare