OBUBALI 24
24
1Ne olwa Balaamu yalola mbu OMWAMI uyanzile okhuhelesia Isiraeli ikhabi, siyatsia singa obwa yali nakhol'le amatukhu kandi okhukhaaba obulakuli tawe; nebutswa yachooma okhutsia musitsiimi. 2Ma Balaamu yachinguula tsimoni, nalola Isiraeli nibamenyanga mutsikambi okhulondokhana netsinzibulo tsiabwe. Omwoyo wa Nyasaye yenjila muye, 3ma naribula oburoobibwe, naboola mbu,
“Amang'ana ka Balaamu omwana wa Beori,
amang'ana komundu oweimoniye elolanga bulahi.
4Omundu onyala okhuhul'la aka Nyasaye aboolanga.
Tsimoni tsianje nitsirangal'le, ndolanga.
Ndolanga amabisulo okhurula khu Nyasaye Wokhunyala Biosi.
5Amaheema ka Isiraeli nakobukondo obulahi okhusila;
6singa tsinyaali tsiemisaala tsiamasindu,
khandi singa emikunda echili khumwalo,
singa ebikakha ebia OMWAMI yaraaka,
singa emisaala chiomusiita echili hamaatsi.
7Balanyoola ifula inyinji okhukwa;
ne balaraaka imwo yabwe mumikunda etsilimwo amaatsi akahela.
Omuruchi wabwe alaba omukhongo okhuyomba Akaki,
oburuchi bubwe bulalanda esibala siosi.
8Nyasaye yabahinia okhurula Emisiri,
abalwan'nanga singa imboko.
Balalumaka abasuku babwe,
nibafunaka amakumba kabwe mubitonye,
nibafunaka tsisele tsiabwe.
9Lihanga lifwana esimba yobunyali;
olweba nekonele hasi abulaho owakhateema khuchibusia.
Omundu wosi oreebela Isiraeli ikhabi naye alanyoola ikhabi.
Ne uyo olaamila Isiraeli obubi naye alalaamwa.”#Okhuch. 12:3; 49:9
10Ma Balaki niyelumaka amakhono khulwoburima obukali nabool'la Balaamu, “Khulanjile mbu olache abasuku banje esilaamo siobubi; nebutswa, ubasabiye ikhabi, hali khataru khosi. 11Khulwe yako luno wilukhe otsie ouwo; ndali nimbaalanga mbu ndakhakhuhelesia omurungo omukali; nebutswa OMWAMI ukhwikaliye okhunyoola omurungo tsana.”
12Ne Balaamu nabool'la Balaki mbu, “Ndabooleye abarumwabo abawarumila mbu, 13‘Kata Balaki niyakhamba efetsa yosi nende etsahabu yosi, eli hangohe, sindakhanyala okhusiila khwilako lio MWAMI, okhukhola amalahi kata amabi khubwanje tawe. Elio MWAMI yambool'la, nilio lionyene elia mboola.’ ”
Oburoobi bwa Balaamu obwokhumal'likha
14Balaamu nabool'la Balaki mbu, “Ne luno ngalukhanga khubandu banje. Nebutswa nisili okhutsia khuchetsiyianga akabandu yabo balakhol'la abandubo mumatukhu ketsanga.” 15Kho yaribula oburoobi bubwe naboola mbu,
“Amang'ana ka Balaamu omusiani wa Boeri,
amang'ana komundu oweimoniye elolanga bulahi.
16Omundu onyala okhuhul'la aka Nyasaye aboolanga
nanyoola obumanyi oburulanga khu Nyasaye oli ikulu okhusila,
tsimoni tsianje nitsirangal'le ndolanga. Ndolanga amabisulo ake Uyo Owokhunyala Biosi.
17Ise menganga khu ketsanga;
ne ndolanga lihanga lia Isiraeli.
Omuruchi ofwana inyininyini yobulafu obukali yakhabukhe okhurula mwihanga yilio.
Singa inyininyini ekwitsanga yakharuke Isiraeli,
yakhatubule abemeli ba Moabu bosi,
ne nekoka abandu ba Setsi bosi hasi.
18Alaleka abasuku baabe mu Edomu,
ma abukule liloba liabwe okhuba omwandu kukwe;
ne abandu balatsilil'la okhuba nobulechi.
19Lihanga lia Isiraeli lilabasen'na hasi,
ndimalilanga okhumulula ababa nibasikalangamwo.”
20Ne mwibisulolie, Balaamu yalola Abaamaleki ma naribula amang'ana koburoobi kano:
“Amaleki liali lihanga lietsingufu okhuyomba kosi.
Nebutswa mukhumal'likha liakhakore inziayo.”
21Khandi mwibisulolie yalola Abakeni ma naribula amang'ana koburoobi kano:
“Habundu ahomenyele halindwa bulahi,
nahomulembe singa esitsu siarebwa khwichina lirambi.
22Nebutswa inywe Abakeni mulamumwa.
Ne Asiria elamubukula okhuba abasumba.”
23Ma Balaamu naribula amang'ana koburoobi kano:
“Nibandu sina bano abebunjikha elubeka lwesinyolu?
24Abasuku bakhetsele mumaaro okhurula Kupuro,
nibaleka Asiria nende Eberi,
Nabo mukhumal'likha bakhatibe inziayo.”
25Ma Balaamu narula, nakalukha ingowe; ne Balaki naye khandi natsia owuwe.
Currently Selected:
OBUBALI 24: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
