OBUBALI 23
23
1Balaamu nabool'la Balaki mbu, “Unyombokhele hano tsisambwa tsine natsitaru ma under're etsichulukhi tsine natsitaru nende amamiiku kane nakataru.”
2Balaki nakhola singa obwa Balaamu yaboola, ma ye nende Balaamu nibahaana omusango kwechulukhi nelimiiku khubuli olusambwa. 3Balaamu nabool'la Balaki mbu, “Sinjila hamisangochio emisambe, nase nzie okhulola nikali OMWAMI aleetsa okhunzakaan'na. Liosi elia yetsa okhumanyia ndakhubool'la.” Ma natsia yenyene habutenje bwesikulu, 4ma Nyasaye namwakaan'na. Balaamu namubool'la mbu “Mal'le okhurechekha tsisambwa tsine natsitaru ma mban'ne omusango kwechulukhi nelimiiku khubuli olusambwa.”
5Ma OMWAMI nabool'la Balaamu akaboola ma namuruma akalukhe khu Balaki, namang'ana tsana. 6Kho yakalukha ma nanyoola Balaki nasinjiiye hamisangochie emisambe, nali halala nabemeli ba Moabu.
7Kho Balaamu yaribula oburoobibwe, naboola mbu;
“Balaki omuruchi wa Moabu yambiinisie okhurula Siria mubikulu biebukwe;
abooye mbu, ‘Witse unaamile abandu ba Isiraeli esilaamo siobubi.’
8Nase ndakhanyala mbwena okhumulaka esilaamo siobubi,
owa Nyasaye aralachile esilaamo siobubi?
9Okhurula khubutenje biebikulu ndali okhumulola,
ne okhurula khubikulu ebit'ti ndali okhumuhenga.
Lola, nolwibuli lwabandu olumenyanga lwonyene,
bamanya mbu balaamilwa tsikhabi okhuyomba amahanga kandi.
10Abolwibulo lwa Isiraeli bali singa olukhuukhi.
Nabenji okhusila abarabbalikha.
Lekha male amatukhu kanje singa mulala khubandu ba Nyasaye.
Lekha fwe mumulembe singa abalunji.”
11Ma Balaki nabool'la Balaamu mbu, “Kho nisina esia ukholeye? Khuleer're hano mbu olache abasuku banje esilaamo siobubi, ne lola, ubasabiiye butswa ikhabi.” 12Balaamu nakalusia naboola mbu, “Ise nyala okhuboola butswa ako MWAMI yambool'langa mboole.”
Oburoobi bwa Balaamu obwakhabili
13Ma Balaki namubool'la mbu, “Yanza witse n'nase, khutsie habundu undi, aha wakhanyala okhubalola; olalola abali ahembi bonyene; siolabalola bosi tawe; ne okhurula yaho obandachile esilaamo siobubi.” 14Namuhila mumukunda kwa Sofimu, khubutenje bwa Pisiga. Ebwene y'yo yombokhakhwo tsisambwa tsine natsitaru, ma nahaana omusango kwechulukhi nende okwelimiiku khubuli olusambwa.
15Balaamu nabool'la Balaki mbu, “Sinjila hano hamisangochio emisambe, nisitsia okhubukaana no MWAMI hala.”
16Ne OMWAMI namwakaan'na Balaamu, namubool'la akanaboole, ma namuruma akalukhe khu Balaki namang'ana tsana. 17Balaamu nakalukha aha Balaki yali nali, nanyoola nasinjiiye hamisangochie emisambe, halala nabemeli ba Moabu. Balaki namureeba ako MWAMI yali nabooye.
18Kho Balaamu naribula oburoobi buno:
“Balaki omusiani wa Sipori, yitsa ohul'le amang'ana kanje.
19Nyasaye siali singa abandu ababehanga tawe.
Ye siali omundu owakhakalukha inyuma mumapaalo tawe.
Olwa yesuhanga, ahesianga ebiesuhobie;
kata olwa al'lomanga ne nikekhola.
20Lola, mal'le okhulakwa okhusaba ikhabi;
Nyasaye naba nahaan'ne ikhabi,
nase sinyala okhuchisukhania tawe.
21Mengele ma nduutsi mbu Isiraeli, sinabanyoole amanyakhano nende amasiila tawe.
OMWAMI Nyasaye wabwe ali n'nabo halala;
ye nomuruchi wabwe.
22Nyasaye wabahinisie Emisiri,
ali netsingufu etsili singa etsieimboko.
23Tooto mwene, bubulaho obufumu kata obufila, obunyala okhurumikhilwa khubandu ba Isiraeli tawe.
Luno kalaboolwanga khu Isiraeli mbu, ‘Lole esia Nyasaye akhol'le.’
24Olwibulo lwa Isiraeli luli singa esimba yetsingufu,
siehulukhanga tawe okhwola olwa erandul'la nende okhulia inyama
khandi okhwola olwa elaba nenyweeye khumatsahi keyabo abayir're.”
25Ma Balaki nabool'la Balaamu; “Noba noralakakhwo Abaisiraeli esilaamo siobubi, kho orabbasabilakhwo ikhabi tawe.” 26Ne Balaamu nakalusia namubool'la mbu, “Sindabeeye okhukhubool'la mbu kosi ako MWAMI aboola, khatimba ngakhole?”
Oburoobi bwa Balaamu obwakhataru
27Ma Balaki nabool'la Balaamu mbu, “Witse nase khuhile habundu undi. Haundi Nyasaye alayanza mbu okhurula yaho obandachile esilaka munwa.” 28Kho Balaki nahila Balaamu khubutenje bwa Peori, obuli ahembi musitsiimi. 29Balaamu nabool'la Balaki “Unyombokhele hano tsisambwa tsiemisango tsine natsitaru, niurechekhela etsichulukhi tsine natsitaru nende amamiiku kane nakataru.” 30Balaki nakhola singa obwa Balaamu yaboola, nahaana omusango kwechulukhi nende okwelimiiku khubuli olusambwa.
Currently Selected:
OBUBALI 23: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
