OBUBALI 22
22
Omuruchi wa Moabu yarumana Balaamu alangwe
1Abandu ba Isiraeli batsilil'la noluchendo ma nibakhoma ekambi yabwe musipaapi sia Moabu ebukwe wa Yorodani ehengan'ne nende Yeriko. 2Ne olwa Balaki omwana wa Sipori omuruchi wa Moabu yahul'la kosi aka Baisiraeli bali nibakholeye Abaamori, khandi obwinji bwa Baisiraeli, 3ye halala nabandube bosi baria okhusila. 4Abandu ba Moabu nibabool'la abemeli ba Midiani mbu, “Omukanda kuno kwitsa okhukhomba ebindu biosi ebiamubotokhan'ne singa obwe echulukhi ekhombanga obunyasi bwomubwayilo.” Kho Balaki omuruchi wa Moabu, 5naruma abarume khu Balaamu omusiani wa Beori owali nali Petsori, ahembi nomuchela kwa Efurate musibala sia Amawu. Bamuleer'ra amang'ana kano okhurula khu Balaki: “Nyenyanga omanye mbu luliho olwibulo lwabandu olurul'le Emisiri; ne abandu balwo bamal'le okhulanda khusibala siosi, ne baboolanga nababukule esibala siefwe, ne bamenyele ahembi khuise.#Obub. 31:8; 2 Pet. 2:15-16; Yuda 11 6Bo nabenji okhuyomba ifwe, khulwe yako khusaayanga mbu witse unaamile abandu bano esilaamo siobubi. Haundi khwakhanyala okhubaleka, ma khubakhunge okhurula musibala. Manyile mbu omundu wosi owosabilanga ikhabi ahebwanga ikhabi, ne owa olaamanga esilaamo siobubi, abetsanga musilaamo siobubi singa mbwo.”
7Kho abemeli ba Moabu nende aba Midiani barulaho nibali nende emirungo chiokhuhaana khulwesilaamo, nibatsia khu Balaamu, nibamubool'la amang'ana ka Balaki. 8Balaamu naye nabakalusia mbu, “Mulakona hano obutukhu buno, ne namukalusia ling'ana singa obwo MWAMI nabe niyambooleye mukamba.” Kho abemeli ba Moabu nibakona owa Balaamu.
9Nyasaye yeetsa khu Balaamu namureeba mbu, “Nibandu sina bano aba oli n'nabo?”
10Balaamu namukalusia naboola mbu, “Balaki omwana wa Sipori, omuruchi wa Moabu, niye obarumile okhumbool'la 11mbu, olwibulo lwabandu olurul'le Emisiri lumal'le okhulanda khusibala siosi. Ne luno yenyanbga ise nzie okhumulakila esilaamo siobubi khubandu yabo, kho abe onyala okhubaseera nende okhubakhunga?”
12Ma Nyasaye nabool'la Balaamu mbu, “Oratsia n'nabo tawe khandi oralaama abandu ba Isiraeli esilaamo siobubi tawe; sichila ise ndamala okhubaamila ikhabi yanje.”
13Kho Balaamu yahachila okhubuukha, nabool'la abarume ba Balaki mbu, “Kalukhe musibala sienywe; OMWAMI yangayile mbu ratsia n'nenywe tawe.” 14Kho barula, nibatsia khu Balaki, nibaboola; “Balaamu yali okhusuula okhwitsa n'nefwe.”
15Ma Balaki naruma abemeli bandi abayombele abokhuranga mubwinji khandi muluyali. 16Nabo batsia khu Balaamu, nibamubool'la amang'ana kano okhurula khu Balaki, “Noyanza orahuchil'la ling'ana liosi elikhukaya okhwola aha ndi tawe! 17Nakhurunge esihanwa esikhongo okhusila, kata elia umbool'la liosi nakhukhol'le. Khulwe yako yanza witse undachile abandu bano esilaamo siobubi.”
18Balaamu naye nakalusia nabool'la abemeli ba Balaki mbu, “Kata Balaki niyakhamba efetsa yosi nende etsahabu yosi eli hangohe, sindakhanyala okhusiila khwilako lio MWAMI Nyasaye wanje, okhukhola amakali nohomba amatu tawe. 19Nebutswa musaayanga mbu nimuyanza mukone hano, singa obwa bandi babeye okhukona hano, kho nase nzia okhumanyilisia nimang'ana sina ako MWAMI yeetsa okhumbool'la khandi.”
20OMWAMI yeetsa khu Balaamu mubutukhu, namubool'la mbu, “Abandu yabo nibaba nibetsele okhukhulanga, rula otsie n'nabo; nebutswa ling'ana elia nakhubol'le nilio lionyene elia nokhole.”
21Kho nibusieye litukhu elialondakhwo Balaamu yabuukha, niyekhala khupundaye natsia nabemeli ba Moabu.
Balaamu nende epundaye
22Nyasaye yali okhuhambwa noburima khulwo okhutsia khwa Balaamu, ne olwa Balaamu yali niyelusianga epundaye nali halala nabarumikhilibe babili, Om'malaika wo MWAMI yasinjila hakari weinjila okhumwikal'la okhubira. 23Olwe epunda yalola om'malaika wo MWAMI nasinjiiye khunjila narechekhele olukangalwe nalutiil'le mumukhono; yeebera okhurula khunjila niyinjila mumukunda. Balaamu yakhupa epunda iyo ma nachikalusia khunjila. 24Ma om'malaika wo MWAMI nasinjila aheinjila yali inyelele hakari wemikunda chibili chiemisabibu, echili namasisi kamachina elubeka nende elubeka. 25Ne olwe epunda yalola om'malaika wo MWAMI yanin'na khwisisi, nekhuluul'la esilenje sia Balaamu khwisisi. Balaamu nachikhupa khandi. 26Khandi om'malaika wo MWAMI niyesunda hambeli, nasinjila habundu weinjila yali inyelele, ahobweyangu bwabula obwokhusukhana okhutsia khumukhono musaatsa nohomba khumukhono mukhasi tawe. 27Luno olwe epunda yalola om'malaika wo MWAMI, yakona hasi, Balaamu nali khuyo. Balaamu yamala asinyikhe khandi ma nakhupa epunda nomutiichilokwe. 28Ma OMWAMI yakhola epunda okhul'loma, nayo nebool'la Balaamu mbu, “Nisina esia khukholeye esichilanga niukhupa hali khataru khosi?”
29Balaamu nakalusia nabool'la epunda mbu, “Sichila ukhol'langakhwo omusino; ndaba nindi nolukaka mumukhono kwanje luno, khane ndakhakhwira.” 30Epunda nebool'la Balaamu mbu, “Ise sindi nise epundayo, eya wachendelangakhwo amatukhu kosi akobulamubwo? Mbula ndakhukhol'lakhwo singa mbu litukhu liosi?”
Naye naboola “Tawe.”
31Ma OMWAMI niyekula tsimoni tsia Balaamu, naye nalola om'malaika wo MWAMI nasinjiiye khunjila niyerechekhele nolukangalwe nalutiil'le mumukhono; ma Balaamu nakwa hasi mafungama. 32Om'malaika wo MWAMI namureeba; “Nisina esichil'le nokhupa epundayo hali khataru khosi? Nzitsile okhukhwikal'la, sichila sinyenyele otsie oluchendo yilu tawe. 33Nebutswa epundayo yali okhundola, niyebera imbeli wanje hali khataru khosi. Elaba neereber're okhurulakhwo, khane ndakhakhwir're, nayo ndakhachihonokosisie ebe mwoyo.”
34Kho Balaamu nabool'la om'malaika wo MWAMI mbu, “Khol'le obwoni, simanyilenje mbu usinjiye khunjila okhunzikal'la tawe. Ne luno noba nololanga nobubi okhutsilil'la noluchendo yilu, ndakalukha aharul'le.” 35Nebutswa om'malaika wo MWAMI nabool'la Balaamu mbu, “Otsie nabandu bano; nebutswa ling'ana elia nakhubool'le, nilio elia noboole lionyene.” Kho Balaamu natsilil'la halala nabemeli ba Balaki.
Balaki yenjisia Balaamu
36Ne olwa Balaki yahul'la mbu Balaamu yetsanga, yarula natsia okhumwakan'na mwitookho elilangwanga Ari, litookho eliombokhwa khuluchinga lwomuchela kwa Arinoni, khundulo khwesibala sia Moabu. 37Balaki nabool'la Balaamu mbu, “Busina orayitsa olwa ndarumania amang'ana olwokhuranga mbu witse? Wapaalanga sindi onyala okhukhurunga bulahi tawe?”
38Balaamu nakalusia, namubool'la mbu, “Lola nzitsile. Ne luno ndi nabunyali sina? Nyala okhuboola yako aka Nyasaye yambool'la mboole.” 39Ma Balaamu natsia nende Balaki, mwitookho lia Kiriatsi Husotsi. 40Ma Balaki nakhola emisango chetsing'ombe, namakondi, ne nahaana etsindi khu Balaamu nende khubemeli aba yali n'nabo.
Oburoobi bwa Balaamu obwokhuranga
41Ma mukamba tsuli kwelitukhu elialondakhwo Balaki nabukula Balaamu, ma namuhila Bamotsi Baali; ne habwene yaho Balaamu yalola abandu ba Isiraeli abali ahembikhwo.
Currently Selected:
OBUBALI 22: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
