OBUBALI 21
21
Abaisiraeli baleka Abakanaani
1Olwomuruchi Omukanaani owamihanga Aradi esili enandete wa Kanaani yahulila mbu Abaisiraeli bali nibetsanga khunjila ya Atsarimu, yabaseera ma nahamba abandi khubo.#Obub. 33:40 2Ma Abaisiraeli nibesuha khu MWAMI mbu; “Noba niwakhakhuha obulechi khubandu bano, kho khulabahaana kupu khuibe halala namatookho kabwe ma khubamume.” 3OMWAMI yahul'la omwoyo kwa Baisiraeli ma nabakhonya okhuleka Abakanaani. Kho Abaisiraeli babamuma nibabamulula bosi halala namatookho kabwe kosi ma nibakulikha habundu tsana Horima#21:3 Horima Eliira yili Muluheburania liboolanga okhumumwa..
Inzokha eyalombwa khumukasa
4Abaisiraeli barula musikulu sia Hori nibalonda khunjila yokhutsia khumukhonokwe Nyanza Inzakhanyu okulangwanga Agaba kho babotokhane esibala sia Edomu. Nebutswa abandu bamala nibasinyikhila khunjila,#Okhuka. 2:1 5ma nibamumuchil'la Nyasaye, kata nende Musa, nibaboola mbu, “Busina nimukhuhinia Emisiri, mbu khufwile musitsiimi muno ahamaatsi nende kata emikaati chibulaho? Sikhunyala okhutsilil'la okhwefwila ebiokhulia ebibi yibi tawe!”#1 Kor. 10:9 6Ma OMWAMI naruma tsinzokha tsiobusungu mubandu, natsio nitsiluma abandu, ma Abaisiraeli abenji nibafwa. 7Kho abandu nibatsia khu Musa nibaboola mbu, “Khwon'ne, sichila khwali okhumumuchil'la OMWAMI, kata nende ibe. Luno saaya OMWAMI mbu akhuhiiniekhwo tsinzokha tsino.” Ma Musa nasaayila abandu. 8Ma OMWAMI nabool'la Musa alombe inzokha yomukasa ma achire khumusaala kho mbu mundu wosi owakhalumwa netsinzokha yitsio, naaba niyakhachihengakhwo alaba omulamu. 9Kho Musa nalomba inzokha yomukasa, nachira khumisaala. Omundu wosi owe inzokha yali neelumile ahenge khu inzokha yomukasa yiyo, ma abe omulamu.#2 Abar. 18:4; Yoh. 3:14
Oluchendo lwokhurula khusikulu sia Hori okhutsia mwibanda lia Moabu
10Abandu ba Isiraeli bachenda, ma nibakhupa ekambi yabwe habundu ahalangwa mbu Obotsi. 11Nibachenda nibarula Obotsi nibakhupa ekambi yabwe mumukunda kwa Abarimu, musitsiimi esili ahembi Moabu, esiahenga ahe eliuba lirul'langa. 12Nibarulayo nibachenda nibakhupa ekambi mwibanda lia Seredi. 13Nibarulayo ma nibatsia okhukhupa ekambi injelekha wa Arinoni, omuchela okuli musitsiimi esipakananga munzakho nende esibala sia Amori (Arinoni nikwo olwakhwo lwa Moabu, hakari wa Moabu nende Amori). 14Niko akachila nikahandikwa musitapu sia Mahe ko MWAMI mbu,
litaala lia Wahebu elili mu Sufu,
nende amabanda nemichela chia Arinoni,
15nebikongomo biamabanda akoolanga khwitaala lia Ari,
nende khulwakho lwa Moabu.
16Nibarula yaho nibatsia khwiyabo lia Beeri; ne habwene yaho OMWAMI nabool'la Musa mbu, “Bunjelesia abandu, nase nambahelesie amaatsi.” 17Ma Isiraeli nibemba olwembo luno mbu:
Senukha, iwe liyabo!
Nefwe khulaliembele olwembo lwomulembe.
18Liyabo elia abakhulundu bayaba
khandi nende abemeli babandu,
eliayabwa neindabusi yobwami.
Nibarula musitsiimi nibatsia Matana. 19Ma nibarula Matana nibatsia Nahalieli; nibarula Nahalieli nibatsia Bamotsi; 20nibarula Bamotsi nibatsia mwibanda elili mutsingongo tsia Moabu, ahembi khubutenje bwa Pisiga, obuhenjele hasi musiyieyie.
Abaisiraeli baleka Sihoni nende Ogu
(Okhuka. 2:26—3:11)
21Ma abandu ba Isiraeli nibaruma abarume khu Sihoni omuruchi wa Amori nibaboola mbu, 22“Ohuchiil'le khubir're musibalasio. Ifwe halala nebiayo biefwe sikhulebera okhwinjila mumukunda kwosi, kata mumukunda kwemisabibu tawe, kata sikhulanywa khumaatsi akomumayabo kenywe tawe. Khulabir'ra khumuhanda kwomuruchi, okhwola olwa khulaba nikhubir're mulukongo lulwo.” 23Nebutswa sihoni siyahuchiil'la abandu ba Isiraeli okhubir'ra musibalasie tawe. Yabunjelesia abasikaribe bosi, natsia Yahasi khulwo okhuseera Abaisiraeli. 24Nebutswa Abaisiraeli beera abandu ba Sihoni abenji mwihe nibabukula esibala siabwe okhurula Arinoni okhwola Yaboku, khusibala sia Baamoni, okhuba olwakho lwa Baamoni lwali nilwalindwa butinyu. 25Abandu ba Isiraeli babukula amataala ka Baamori yako kosi; halala nende Heshiboni nende mumataala akali ahembi n'nalio kosi. 26Heshiboni liali litookho likali elia Sihoni omuruchi wa Amori, owali niyaseera uyo owalinji omuruchi wa Moabu, ma yali niyabukula esibalasie siosi okhwola khumuchela kwa Arinoni. 27Khulwe yako abarel'lesi betsinyembo bembanga nibaboola mbu:
“Mwitse Heshiboni, Litookho likali lia Sihoni
khulole niliombokhwa obuhia nilisinjisibwa.
28Litukhu lindi abasikari ba Sihoni barula mu Heshiboni singa omul'lo;
Bamuma litookho lia Ari mu Moabu,
nibalia bulia ebikulu bia Arinoni yemukulu.#Yer. 48:45-46
29Mulitsiboolelwa, inywe abandu ba Moabu!
Inywe abekayakayanga Kemoshi, mumal'lwe pe!
Nyasaye wenywe yalekha abandu okhuba abatiima musibala,
ne abakhasi benywe nibakwa abasumba ba Sihoni omuruchi wa Amori.
30Nebutswa luno abolwibulo lwabwe batibile,
okhurula Heshiboni okhwola Diboni;
okhurula Nashimu okhwola Nofa, ahembi Medeba.”
31Nimbwo abandu ba Isiraeli bamenya musibala sia Amori. 32Musa naruma abandu okhulambuula Yaseri. Abaisiraeli nibabibukula halala namataala akali ahembi n'nalio, nibakhunga Abaamori abali nibalimwo.
33Ma Abaisiraeli nibasuukhana nibalonda khunjila etsitsanga Bashani; ne Ogu omuruchi wa Bashani narula halala nende abasikaribe bosi, okhubaseer'ra Edirei. 34OMWAMI nabool'la Musa mbu, “Oramuria tawe. Nzia okhukhuha obulechi khuye nende khubasikaribe bosi halala nesibalasie. Nawe omukhol'le singa obwa wakhol'la Sihoni omuruchi wa Amori, owamihanga Heshiboni.” 35Kho Abaisiraeli nibeera Ogu halala nabaanabe, nende abandube bosi, sibalekhakhwo omundu wosi tawe. Bamala nibabukula esibalasie nibamenyamwo.
Currently Selected:
OBUBALI 21: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
