OBUBALI 18

Emilimo chiabesaalisi nende echia Abalawi

1OMWAMI yabool'la Haruni mbu, “Ibe nabasianibo nende Balawi mwesi okhwola munyoole esinyasio khulwo obubi bwosi obwakhanyoolekha khulwo khukhola omulimo Mwiheema litsienukhu. Nebutswa obubi nibwakhanyoolekha khulwo okhukhola omulimo kwobwesaalisi ibe wenyene nabasianibo ninywe abakhanyoola esinyasio. 2Oleere abaana benywe bosi, abolwibulo lwa Lawi, oluli olwibulo lwa papawo, bahambane n'nawe nibakhukhonya okhukhola emilimo olwe ibe nende abasianibo muba nimukholanga emilimo Mwiheema. 3Balindenje aka balekhelwa okhukhola, nende akabalekhelwa khuke Liheema liosi; nebutswa barahambakhwo khubindu ebitsienukhu ebili khulusambwa oluli Habundu Hatsienukhu tawe. Nibakhola mbwo, kho ibe halala n'nabo mulerwe. 4Bahambane n'nawe, nibalinda Liheema liokhubaho khwanje, nibakhola emilimo chiosi echili khwiheema, nebutswa omundu wosi arakhetsakhwo ahembi okhukhola emilimo n'nawe tawe. 5Ibe nende abasianibo mukholenje emilimo chia Habundu Hatsienukhu nende etsio khulusambwa, kho oburima bwanje bulekhe okhubukhila Abaisiraeli khandi. 6Nase, lola, mbukuuye abaana benywe Abalawi okhurula mubandu ba Isiraeli babe esihanwa khwinywe. Bo bahaanwa khu ise kho bakholenje omulimo Mwiheema. 7Nebutswa ibe nabasianibo mwesi mukholenje emilimo chiosi chiobwesaalisi bwenywe khukosi akali khulusambwa, nende akali Habundu Hatsienukhu Okhusila. Muhelesianga omulimo kwobwesaalisi okhuba esihanwa siemilimo chienywe. Oundi wosi owakhesunda ahembi nebindu ebitsienukhu okhwola yerwe.”

Omukabwa kwabesaalisi

8OMWAMI yabool'la Haruni mbu, “Witsul'le mbu khuhelesianga ibe ebihanwa biosi ebichoomekhe ebihanwanga khu ise ebirasambwanga singa emisango. Khuhelesianga ibe nende abolwibulo lulwo bibe omukabwa kwenywe amatukhu kosi. 9Bino bibe ebibio khubindu ebili ebitsienukhu okhusila, ebibiikhwa nibirasambwa tawe okhurula khu bihanwa biosi ebiabander'ranga ebili ebitsienukhu okhusila: ebiobuswache, ebiomusango kwetsimbi nende ebiomusango kwokhurunga ebirarungwa yibio biosi nebibio nende abasianibo. 10Obiliile habundu ahali ahatsienukhu okhusila, abasiani bonyene nibo abanyala khubilia. Obibukule okhuba ebitsienukhu okhusila.

11“Khandi bino nebibio, mbu ebihanwa ebiemisango chiosi echihanwa nende Abaisiraeli, khu ise nechichio. Njihaananga khubaanabo abasiani nabakhaana bosi halala n'nawe, bibe ebimukhoyele amatukhu kosi; buli mundu oba omusiiyikhu munzuyo abiliitsenjekhwo.

12“Khuhelesianga amafura amalahi okhusila nende ewaini indahi okhusila nende ebiobuswache yibio, ebiokhuranga khubirongole biabandu ba Isiraeli bamban'nanga. 13Ebiamo biosi ebiranjil'langa okhwenga khubiosi ebili musibala siabwe, ebia baleeranga khu ise, bibe ebibio; buli mundu oba omusiiyikhu munyumbayo aliitsenjekhwo.

14“Buli esindu esihanwa khu ise khulwo okhwehaana nesisio.#Abal. 27:28

15“Buli esindu esiokhwikula inda khubiemibili biosi ebia baleeranga khu ise, khubiabandu nebiemiruko biosi, bibe ebienywe. Nebutswa abasiani bambeli babandu okhwola banunulwe khandi esibulwa sies'saatsa esiambeli siomuruko kwomusilo osinunule. 16Ne khumurungo kwobununuli bwabio, obinunule nibiakhahela omwesi mulala, abaana banunulwe khubukusi obwahuchilwa obwebitonye birano bietsahabu. 17Nebutswa esiibulwa esiokhuranga sieing'ombe nohomba esielikondi, nohomba esieimbusi, orabikula tawe; yibio nebianje kupu ne okhwola bikholwe omusango. Amatsahi kabio kasundulwe khulusambwa ne esinya yabio esambwe okhuba omusango kwebiokhulia, ne okhuhunya khwakwo khunyanzisianga. 18Ne inyama yabio neyiyo; singa inyama yokhusilifu nende esinama sieinyuma siemukhono musaatsa nebibio.

19“Ne ebihanwa biebindu ebitsienukhu ebia abaana ba Isiraeli bahaananga khu ise, khuhelesisie ibe nende abaanabo abasiani nabakhaana bosi, bibe ebimukhonya amatukhu kosi. Ino neindakano erakhafunakwekhwo tawe, eya nombele n'nawe nende abolwibulo lulwo.”

20OMWAMI nabool'la Haruni mbu, “Ibe siolabeetsanga nobulaame bwosi musibala siabwe, kata siolaba nomukabwa kwosi mubo tawe. Ise nise omukabwa kukwo khandi obulaamebwo mubaana ba Isiraeli.”

Omukabwa kwa Abalawi

21OMWAMI naboola mbu, “Ndamala okhuhelesia Abalawi esitonye sielikhumi khubiosi ebia Abaisiraeli bambanilanga. Kuno nikwo omurungo kwabwe khulwo khukhola emilimo Mwiheema liokhubaho khwanje.#Abal. 27:30-33; Okhuka. 14:22-29 22Ne okhurula olwaleelo abandu ba Isiraeli barakhesundakhwo ahembi Khwiheema Liokhubaho khwanje tawe, khase balakwa mutsimbi ma bafwe. 23Ne Abalawi bonyene bakholenje emilimo Mwiheema liokhubaho khwanje ma betuukhe obubi bwosi obwakhakholwa khwiheema. Lino nelilako liokhulindwa netsinzibulo tsiosi etsitsanga. Sibakhanyoolekhwo obulaame bwosi mubandu ba Isiraeli tawe. 24Musilenje yisio, mbetsanga Abalawi omukabwa kwobulaame bwabwe esitonye sielikhumi esia Abaisiraeli bahaananga khu ise singa esihanwa esichomekhe. Niko akachila nimboola khu Abalawi mbu, ‘Sibakhanyoolekhwo omukabwa kwobulaame mu Baukan'na mwo no MWAMI ma betukhe obubi bwosi obwakholwa khwiheema. Lino nelilako liokhulindwa netsinzibulo tsiosi etsitsanga. Sibakhanyoolekhwo obulaame bwosi mubaana ba Isiraeli tawe.’ ”

Esitonye sielikhumi esia Abalawi

25OMWAMI yabool'la Musa 26abool'le Abalawi mbu, “Buli olwa mubukula esitonye sielikhumi esia ndamuhelesisie okhurula khubandu ba Isiraeli sibe obulaame bwenywe, kho muhaanenje esihanwa okhurula khusio khu OMWAMI, muhaane esitonye sielikhumi okhurula khusitonye tsana. 27Ne esihanwa sienywe silabalwa khu inywe singa obwo obuswache bwokhulutse buli, kata singa ewaini imbia. 28Munjila yiyi mulahaana esihanwa khu OMWAMI okhurula mubitonye bielikhumi bienywe biosi ebia munyoolanga khubaana ba Isiraeli; khandi okhurula mubiene yibio muhaane khu Haruni omwesaalisi esitonye sio MWAMI yisi. 29Okhurula mubihanwa bienywe biosi muhaane esihanwa esili esilahi okhusila khu MWAMI. 30Nomal'le okhuhaana esitonye esilahi okhusila, onyala khubikha esisikaye singa, obwo omulimi abikhanga ebisikalanga namal'le okhuhaan'na OMWAMI. 31Ibe nende abeinyumba yiyo munyala okhuliila habundu hosi ebiba nibisikaye sichila yikwo nomurungo kwemilimo chienywe Mwiheema. 32Simulaba nesikha siosi nimwakhasilia oluhono lwamumal'le okhuhaan'na OMWAMI esili esilahi okhusila tawe. Nebutswa murakhafwabia ebihanwa ebitsienukhu bia Baisiraeli khulwo okhuliakhwo ebihanwa biabwe nimusili okhumuhanila OMWAMI esili esilahi okhusila tawe. Nimwakhakhola mbwo mwakherwa.”

Currently Selected:

OBUBALI 18: EBAIBO

Highlight

Copy

Compare