ABALAWI 26

Tsikhabi khulwo okhuhulila Nyasaye

(Okhuka. 7:12-24; 28:1-14)

1OMWAMI yaboola mbu, “Muralomba ebiniini kata murasinjisia ebiniini ebiabaatswa, nohomba etsisiilo, nohomba amachina amabaatse khulwo okhubiekayakaye tawe. Ise nise OMWAMI Nyasaye wenywe.#Okhur. 20:4; Abal. 19:4; Okhuka. 5:8; 16:21-22; 27:1 2Mwitsul'le okhukhola amasabo kemilukha chiedini ma muhaane oluyali habundu aha ndekayakayilwanga. Nise OMWAMI.

3“Nimwakhamenya nimulondanga amalako kanje ne nimukhola akamubool'langa,#Okhuka. 11:13-15; 28:1-14 4naamurumile ifula munyinga indahi kho mbu liloba liaame ebiamo ne emisaala chiaame amatunde. 5Ebiamo bienywe biakhabe ebinji okhusila mbu mwakhatsilil'le okhubichesa kata munyinga yokhunoka emisabibu khandi namutsilil'le okhunoka emisabibu munyinga yokhuchesa obuswache. Namube nende biosi ebia mutakhanga okhulia, ma namumenye mumulembe musibala sienywe.

6“Namuler're omulembe musibala sienywe, ne namukonenje sila okhuria omundu wosi. Nambinie musibala sienywe etsisolo tsimbalaba ne obulwanisinabubemwo khandi tawe. 7Namulekenje abasuku benywe khasotso; 8barano khwinywe nababe abanyala okhuleka abandu emia ndala, ne emia ndala khwinywe nababe abanyala okhuleka abandu etsielefu likhumi; khandi namulekenje abasuku benywe bosi. 9Namulaamile ikhabi ma namuhe abaana abenji; nambesie indakano yanje eya ndalomba n'nenywe. 10Ebichese bienywe nabibe ebinji okhusila mbu nabimalenje omuhika mulala, kata olwene yilwo namufubenje ebia nabibetsenje nibisikaye mwichesa likhulu kho munyoole obweyangu ahokhura ebichese ebihia. 11Namenyenje n'nenywe mwiheema lianje litsienukhu; ne sinarulekhwo khwinywe tawe. 12Nambetsenje n'nenywe; nambetsenje Nyasaye wenywe, nenywe namubetsenje abandu banje.#2 Kor. 6:16 13Ise, OMWAMI Nyasaye wenywe ndamuhinia Emisiri mbu muratsilil'la okhuba abasumba khandi tawe. Ndafunaka obunyali obwali nibwamura hasi ma nimutikulusia emirwe nimuchenda nimukhulumamile.”

Esinyasio khulwokhukhol'la Nyasaye esikala marwi

(Okhuka. 28:15-68)

14OMWAMI yaboola mbu, “Nimuralonda amalako kanje, namunyoole esinyasio. 15Nimuba nimusuula okhulonda amalako kanje nende amang'ana kanje ma nimufunaka indakano eya ndalomba n'nenywe, 16namuhelesie esinyasio. Namuleer're likhupako; namuleer're obulwaye oburali neindesi nende emirengo etsia natsimukhole ababofu ma obulamu bwenywe nabuhwelel'le. Namuraake imwo yenywe nebutswa sinemukhonye tawe sichila abasuku benywe nabalie ebia namube nimukhusisie. 17Namukhupe omukongo ma namulekwe, ne yabo abali abasuku benywe nabamwamihe; namube neindenga ingali mbu namwilukhe olwo omundu wosi aramulondel'langa.

18“Ne kata inyuma weyaka kosi nimuba nimurakhalonda amalako kanje, nameete okhukaliyia esinyasio sienywe okhuba hali khane nakhataru. 19Nangalusia hasi omwekhonyo kwenywe; ifula sinekwekhwo tawe, ne esibala sienywe nasibe esiomu khandi esitinyu kakak'ka singa lichina. 20Emilimo echiamutiyanga butinyu sinachimukhonye tawe, sichila emikunda chienywe sinachiame ebiamo kata emisaala sinachiame amatunde tawe.

21“Nimuba nimutsilil'la okhuufukula ise nimusuula okhulonda amalako kanje, khandi nameete okhukaliyia esinyasio sienywe hali khane nakhataru. 22Namurumile etsisolo tsimbalaba, natsio natsire abaana benywe, natsimume tsing'ombe tsienywe ma natsilekhe batititi khwinywe kata tsinjila tsienywe sinatsichendwekhwo tawe.

23“Ne nikakhaba mbu inyuma wokhumukhol'la yaka kosi mulatsilil'la okhusuula okhumbulila, ne nimunjaaya, 24kho namukhupe omukongo ma namuhe esinyasio esitinyu hali khane nakhataru okhubira esiokhuranga. 25Narume obulwani khwinywe okhumuhelesia esinyasio khulwo okhufunaka indakano yanje n'nenywe, ne nimwakhebunjikha mumatookho okhwehonokosia, namurumile obulwaye oburahonanga, nenywe nakamuhachie okhuchinga amakhono nimwehaana khubasuku benywe. 26Nanditiyie ebiokhulia ebiamunyoolanga kho mbu obusuma obuhela butswa khubeinyumba ndala nabulachilwenje nende abetsinyumba likhumi. Nabukabulanibwe khusiamulala khwinywe ne kata olwa namubetsenje nimumal'le okhubulia bwosi, namubetsenje nimusili neinzala.

27“Ne nikakhaba mbu inyuma we yaka kosi mulatsilil'la okhunjaaya nimusuula okhulonda amalako kanje, 28kho mwirima lianje namusukhane ma nameete okhukaliyia esinyasio sienywe hali khane nakhataru okhubakhwo esibi okhuyomba ebiokhuranga. 29Inzala yenywe nebe ingali okhusila ma kata namulie abaana benywe bene. 30Nandikulile habundu henywe ahamwekayakayilanga khubikulu, nasambule tsisambwa tsienywe tsiobwali, ma nafuube emilambo chienywe khubiniini bienywe ebiakwa. Musibeela esikali 31nakhole amatookho kenywe nakakwe likunda, namulule obwekayakayilo bwenywe, ne nasuule okhuhuchil'la emisango chienywe. 32Namume esibala sienywe okhusila ma kata abasuku aba nabamenye musio nabachenye olwa nabalole okhumumwa yikhwo. 33Nandeere obulwani khwinywe ma namusalanie mubibala biebucheni. Esibala sienywe nasilekhwe sila omundu ne amatookho kenywe nakakwe amakunda. 34Ma liloba nalinyoole abuhuluukhi olwa nalibe nilikoneye olwa nenywe namube nimuli musibala siabasuku benywe. 35Ne oluhono lwosi olwa nalibe nilikoneye nalinyoole obuhuulukhu obwa murakhachiheye emihika eminji.

36“Narimule ikholo ye yabo khwinywe abali mubuhambe mbu kata okhutechela khwelisafu mubusindu nakhumwilusie. Namwilukhe ol'la abalondel'lwanga mwihe, ne namukwe hasi olwa omusuku arali ahembi. 37Namwesikar're omundu khuwasie nimwilukhanga mwihe olwa omundu aramulondel'langa, ne sinamunyale okhulwana omusuku wosi tawe. 38Namufwile mubuhambe, namumilwe nesibala siabasuku benywe. 39Bati khwinywe aba nabahonokokhe musibala siabasuku benywe nabahwetsekhel'le khulwe tsimbi tsiabwe abene nende tsimbi tsiabakuka benywe.

40“Nebutswa abolwibulo lwenywe nabeyame tsimbi tsiabwe nende tsimbi tsiabakuka babwe, abali okhufukula ise ma nibakhol'la indiri, 41nibachila nimbakhupa omukongo ma nimbahila mubuhambe musibala siabasuku babwe. Mukhumalila, olwa abolwibulo lwenywe nababe nibetutuyisie ma nibanyooye esinyasio khulwe tsimbi tsiabwe nende indiri yabwe, 42nanzitsul'le indakano yanje nende Yakobo, na Isaka nende Aburahamu, khandi nanzienule esiesuho sianje okhuha abandu banje esibala.#Okhuch. 17:7-8; 26:3-4; 28:13-14 43Ne okhuranga, okhwola esibala tsana sihinibwemwo abandu basio, kho sinyoole obuhuulukhi bwasio obwa kupu, ne okhwola banyoole esinyasio khulwo okhusuula amalako kanje nende amang'ana kanje. 44Nebutswa kata mbwo, olwa basili musibala siabasuku babwe, sinambakhupe omukongo kupu nohomba okhubamuma tawe. Yako kanyala okhuleera esihesi khu indakano yanje, ne nise OMWAMI Nyasaye wabwe. 45Nanzienule indakano eya ndakhola nabakuka babwe olwa ndamanyia obunyali bwanje khumahanga kosi khulwa okhuhiinia abandu banje okhurula Emisiri, kho mbu, Ise OMWAMI mbe Nyasaye wabwe.”

46Yaka kosi namalako nende amang'ana ako MWAMI yahelesia Musa nali khusikulu sia Sinai khulwokhukahaana khubandu ba Isiraeli.

Currently Selected:

ABALAWI 26: EBAIBO

Highlight

Copy

Compare