ABALAWI 25

Omuhika kwakhane nakhataru

(Okhuka. 15:1-11)

1OMWAMI yal'loma na Musa nali khusikulu sia Sinai namulaka#Okhur. 23:10-11 2mbu ahaane amalako kano khubandu ba Isiraeli. Olwa namwinjile musibala esio MWAMI amuhetsanga namuhanenje oluyali khu MWAMI khulwo okhubula okhulima emikunda khumuhika kwakhane nakhataru. 3Namurakenje emikunda chienywe nimwachila emikunda chiemisabibu, nimuchesa ebiraakwa bienywe khumihika chisasaba. 4Nebutswa omuhika kwakhane nakhataru nakubetsenje omuhika kwokhuhuulusia liloba, omuhika okwahanwa khu MWAMI. Muraraaka emikunda chienywe kata okhwachila emisabibu chienywe tawe. 5Kata murachesa obuswache obwemesianga obwene tawe, khandi muratobelesia emisabibu chiomumikunda chienywe echirakhalil'lwa tawe. Nomuhika kwokhuhuulusia liloba liosi. 6Kata nikali omukunda sikulalimwa omuhika yikwo tawe kulahaana ebiokhulia khwinywe, abasumba benywe, abandu aba mwahandika emilimo, abacheni abamenyibwa mwinywe, 7emiruko chienywe nende etsisolo etsili mumikunda chienywe. Ebiraakwa biosi ebirulanga mumukunda binyala okhulibwa.

Omuhika kwobununulwi

8Mubale emihika chine nachitaru esia khane nakhataru. Chiosi halala nemihika amakhumi kane nachirano nachine. 9Ma khwitukhu lielikhumi khumwesi kwakhane nakhataru, Litukhu Liokhununulwa, murume omundu atsie okhukhupa olwika musibala siosi. 10Munjila yiyi mwahule omuhika kwa amakhumi karano ma muhaane obulakhuule khubandu bosi abamenyanga musibala. Mumuhika yikwo, emianduchiosi echiali nichiakusibwa chikaluchisibwe mwenechio nohomba omwibule uwe, khandi omundu wosi owakusibwa singa omusumba akalukhe khubeinyumba yiye. 11Muraraakakhwo emikunda chienywe nohomba okhuchesakhwo obuswache obwemesianga obwene nohomba okhutobelesia emisabibu mumikunda chienywe echirayachilwa tawe. 12Omuhika kwosi kulaba omutsienukhu khwinywe; mulie butswa ebimelanga mumikunda ebiene.

13Mumuhika yikwo, emianduchiosi echiali nichiakusibwa chilakaluchisibwa mwenechio. 14Kho olwa omundu akusianga omukunda khu Muisiraeli wasie nohomba olwa akula okhurula khuye aramukhol'la obubi tawe. 15Obukusi bulalombwa okhulondokhana nemihika echiomukunda kunyala okhwama ebiamo omuhika kwamakhumi karano kundi nikusili okhwola. 16Nichiakhaba emihika eminji, obukusi bube hekulu, nebutswa nichiba nichisili emihika mitititi obukusi bube hasi, sichila esikusibwanga nobwinji bwebiraakwa ebiomukunda kunyala okhwaama. 17Murakaata Omuisiraeli wasienywe tawe, nebutswa murie OMWAMI Nyasaye wenywe.

Omunyakhano kwomuhika kwakhane nakhataru

18Mulonde amalako ko MWAMI kosi kho mumenye musibala nomulembe. 19Liloba lilaama ebiamo bialio, nenywe mulanyoola biosi ebia mwenyanga ma mumenye mumulembe.

20Nebutswa oundi yakhareeba mbu nisina esiakhalibwa khumuhika kwakhane nakhataru nikakhaba mbu emikunda sichirachilwe nohomba ebiamo sibicheselwe tawe. 21OMWAMI nalaamile liloba mumuhika kwa khasasaba ikhabi ma nakwaame ebiamo ma ebiokhulia nabinyoolekhe ebihela emihika chibili. 22Olwa muraakanga emikunda chienywe mumuhika kwamunane, namube nimusilitsanga ebia mwachesa mumuhika kwakhasasaba ne namube nende ebimuhela okhulia okhwola olwe biraakwa ebirachilwe omuhika kwamunane biba nibicheselwe.

Okhukalusibwa khwemiandu

23Omukunda kwenywe kurakusibwa ekali tawe, sichila sikuli okwenywe tawe; nokwa Nyasaye, nenywe muli butswa singa abamenyibwa abahuchil'lwa okhukurumikhila.

24Olwomukunda kukusibwanga, obunyali bwa owali mwenekwo okhukukalusia okhwola buhuchil'lwe. 25Omuisiraeli niyakhakwa omumanani ma kamuhachie okhukusia omukunda kukwe, omulwibulolwe owahembi okhwola akukule okhukuchelesia. 26Omundu orali nomwikho wokhukuchelesia anyala okhuhindihala olunyuma ma akuchelesie omwene olwa aba nanyooye emiandu eminji. 27Mwing'ana singa yili okhwola arunge khumundu owamukulakhwo amapesa akahelana nende emihika echisikalanga Omuhika kundi kwokhukalusibwa khwemiandu nikusili okhwola, olwa anyala okhuchelesisia omukunda kukwe munjila yosi. 28Nebutswa narali namapesa kokhurunga khulwokhuchelesia omukundakwe, omukunda kulaba mumakhono komundu owakukula okhwola Omuhika kundi kwokhukalusibwa khwemiandu. Mumuhika yikwo, omukunda kulakalusibubwa owali mwenekwo owokhuranga.

29Omundu niyakhakusia inyumba eli mwitookho eliabotokhanwa nelisisi, ali nobunyali bwokhuchikula khandi mumuhika kwokhuranga kwosi okhurula khwitukhu elia yachikusisiakhwo. 30Nebutswa naba narachikula khandi mumuhika yikwo, alakosia obunyali bwokhuchichelesia, ne inyumba iyo elaba omwandu kwomukuli nende olwibulo lulwe ekali. Selachelesibwa mu Muhika kwamakhumi karano tawe. 31Nebutswa tsinyumba etsili mumataala akarasirwa nelisisi tsinyala okhukhol'lwa amatelwa nende emikunda; omwene nyumba ali nobunyali bwokhuchikula khandi ne enyala okhukalusibubwa omweneyo mu Muhika kwamakhumi karano. 32Ne kata mbwo Abalawi bali nobunyali okhuchelesia esaa yosi emiandu echili mumatookho akahanwa khubo. 33Inyumba yosi mu elala khumatookho yaka niyakhakusibwa no Mulawi ne nerachelesibwa, okhwola ekalusibwe mu Muhika kwa Amakhumi Karano sichila tsinyumba tsia Abalawi bali n'natsio nemiandu tsiabwe ekali mubandu ba Isiraeli. 34Nebutswa emikunda chiobwayilo echiabotokhana amatookho ka Balawi chirakusibwa tawe sichila nemiandu chiabwe inziayo.

Okhuhambia esibere khubamanani

35Omuisiraeli wasio omenyanga ahembi n'nawe niyakhaba omumanani ma abule obwa yakhekhonya, okhwola omunyool'le kosi aka atakhanga singa wakhakholeye omundu owawahandika emilimo kho atsilil'le okhumenya ahembi n'nawe.#Okhuka. 15:7-8 36Oramurunjia obukhala tawe, nebutswa orie Nyasaye ma olekhe Omuisiraeli wasio amenye ahembi n'nawe. 37Oramusaba obukhala khumapesa komuhambisie esibere tawe, kata oranyoola inganga khubiokhulia ebiomukusianga tawe.#Okhur. 22:25; Okhuka. 23:19-20 38Yili nelilako lio MWAMI Nyasaye wenywe, owamuhinia Emisiri mbu amuhelesie esibala sia Kanaani nende okhuba Nyasaye wenywe.

Okhulakhulwa khwabasumba

39Omuisiraeli wasio omenyanga ahembi n'nawe niyakhaba omumanani ma yekusie omwene khuibe singa omusumba, oralekha akhole emilimo singa omusumba tawe.#Okhur. 21:2-6; Okhuka. 15:12-18 40Amenye n'nawe singa omundu owa wahandika emilimo ma akhurumikhile okhwola khu Muhika kwokhukalusibwa khwemiandu okulondakhwo. 41Olwene yilwo ye nende abaana baabe bakhurulekhwo ma bakalukhe khubeinyumba yabwe nende khumiandu chiabakuka babwe. 42Abandu ba Isiraeli nabasumba bo MWAMI, naye yabahinia Emisiri; barakusibwa singa abasumba tawe. 43Murabbalul'la tawe, nebutswa murie Nyasaye. 44Munyala kata okhukula abaana babandu abacheni abamenyibwa mwinywe. 45Abaana abafwana mbwo abebul'lwa musibala sienywe banyala okhuba omwandu kwenywe, 46ne munyala okhubalekhela abaana benywe bababukule singa omwandu nababarumikhilenje mubulamu bwabwe bwosi. Nebutswa muralul'lakhwo Omuisiraeli wasienywe wosi wosi tawe.

47Mupaalanga mbwena omucheni owamenyibwa mwinywe niyakhahindihala, olwa Omuisiraeli wasienywe akwa omumanani ma yekusie omwene khumucheni uyo nohomba khumulala khubekhobe. 48Olwa aba nakusibubwe asili nobunyali bwokhuchelesibwa. Mulala khubamwabobe, 49nohomba khotsa nyene nohomba mufiala nyene nohomba kata mulala khubekhobe abahembi anyala okhumuchelesia; nohomba ye omwene naba narungwanga amapesa akahela, anyala okhwerunjila obulakhuule omwene. 50Okhwola areebe omundu owamukula, ne okhwola babale emihika okhurula khunyinga yayekusisiakhwo okhwola khu Muhika kwa Amakhumi Karano okulondangakhwo, ne baloosie obukusi bwokhulakhuulwa khukhwe okhuhelana nomurungo okurungwanga omundu owahandikwa emilimo. 51Nikali chisili emihika eminji, alrunga esitonye siosi esiba nisisikalanga khubukusi bwokhwelakhuulakhwe. 52Nichiba nichisili eminji, arunge esitonye khubukusi bwa yekusisia okhuhelana nende emihika echiba nichisikalanga, 53singa ol'la yali niyahandikwa okhurungwanga khumuhika. Omwamiwe aramulul'la tawe. 54Naralakhul'lwakhwo munjila yosi mutsinjila yitsi tsiosi, ye nende abaana baabe okhwola balakhuulwe mu Muhika Kwa Amakhumi karano okulondakhwo. 55Omuisiraeli sanyala okhuba omusumba amatukhu kosi tawe, sichila abandu ba Isiraeli nabasumba bo MWAMI. Ye yabahinia Emisiri; ye niye OMWAMI Nyasaye wabwe.

Currently Selected:

ABALAWI 25: EBAIBO

Highlight

Copy

Compare