ABALAWI 27
27
Amalako khukokhuhesia ebiesuho ebikhol'lwanga OMWAMI
1OMWAMI yahelesia Musa 2amalako kano khulwa abandu ba Isiraeli okhurumikhila. Omundu naba nahaanwa khu MWAMI khulwokhuhesia esiesuho esichomekhe, omundu uyo alakhuulwe khulwo okhurunga amapesa kano, 3khusichelo esiahuchil'lwa, omusaatsa owemihika hakari wamakhumi kabili nende emihika amakhumi kasasaba arunge ebitonye amakhumi karano biefetsa. 4Ne naba nali omukhasi, arunge ebitonye biefetsa amakhumi kataru.
5Naba nali omusiani omuti owemihika chirano okhwola emihika amakhumi kabili, arunge ebitonye amakhumi kabili biefetsa; ne nali omukhaana arunge ebitonye likhumi biefetsa.
6Ne naba nali omusiani womwesi mulala okhwola khuwemihika chirano, arunge ebitonye birano biefetsa; ne nali omukhaana arunge ebitonye bitaru biefetsa.
7Naba nali omusakhulu owemihika amakhumi kasasaba nende okhuyomba yaho arunge ebitonye likhumi nabirano; ne naba nali omusiele arunge ebitonye likhumi biefetsa.
8Omundu owesuha esiesuho yisio naba nali omumanani okhusila oranyala okhurunga esichelo esiahuchil'lwa yisio, alaleera omundu owa yesuhilakhwo khumwesaalisi, ne omwesaalisi alatitiyiakhwo omurungo okhuhelana nende obwomundu uyo anyala okhurunga.
9Esiesuho yisio nisiba nisiakhol'lwa khumuruko okuhuchil'lwanga singa omusango khu MWAMI, siesihanwa siosi esileerwanga khu MWAMI nesitsienukhu, 10ne omundu owakhola esiesuho yisio arasilania omuruko yikwo nende okundi tawe. Niyakhakhola mbwo, kho emiruko chiombi nechio MWAMI. 11Nebutswa esiesuho tsana nisiba nisiakhol'lwa khumuruko kwomusilo, okurahuchil'lwanga singa omusango khu MWAMI, omundu owesuha uyo akuhile khumwesaalisi. 12Omwesaalisi alakurakhwo obukusi, okhuhelana nende liba liakwo lilahi nohomba liibi ne obukusi yibwo nibwo obwakharumikhilwa. 13Omundu uyo niyakhenya okhukununula, okhwola arunge obukusi yibwo khandi ameetekhwo esitonye siamukhumi kabili khumia ndala.
14Omundu niyakhahaana inzuye khu MWAMI, omwesaalisi alachela obukusi bwayo okhulondokhana neliuba liomwombokho kwayo omulahi nohomba omubi, ne obukusi obwa yakhahaana nibwo bwonyene obwakharumikhilwa. 15Ne uyo owali okhuchihaana khu MWAMI niyakhenya okhuchinunula, okhwola arunge obukusi yibwo ma ameetekhwo esitonye siamakhumi kabili khumia ndala.
16Omundu niyakhahaana esitonye silala khumukundakwe okwayalamilwa khu MWAMI, obukusi bwasio buchelwe okhuhelana nobwinji bwe imwo erakwangamwo, khusichelo siebitonye likhumi biefetsa khubuli eshayiri ehela etsikilo amakhumi kabili. 17Naba nahaana omukunda yikwo olwa Omuhika Kwa Amakhumi Karano kuba nikuhweyenje butswa, obukusi bwosi burungwe. 18Naba nakuhaana olunyumakhwo, omwesaalisi alachelania obukusi bwakwo okhuhelana nemihika echiba nichisikaye okhwola khu Muhika kundi kwokhukalusibwa khwemiandu; ma ahaane obukusi bwakwo hasi. 19Ne omundu owahaana omukunda, niyakhenya okhukununula, okhwola arunge obukusi bwakwo ma ameetekhwo esitonye siamakhumi kabili khumia ndala. 20Naba nakukusia khumundu undi ne narakununula mbelio okhurula khu MWAMI, alakosia obunyali bwokhukununula. 21Khu Muhika Kwa Amakhumi Karano okulondakhwo, omukunda yikwo kulaba omwandu kwa Nyasaye inziayo; nakubetsenje okwabesaalisi.
22Omundu niyakhahana khu MWAMI omukunda okwa yakhaba nakul'le, 23omwesaalisi alachelania obukusi bwakwo okhuhelana nemihika echiba nichisikaye okhwola khu Muhika Kwa Amakhumi Karano okulondakhwo, ne omundu uyo okhwola arunge obukusi litukhu liene yilio. Amapesa yako nako MWAMI. 24Khu Muhika kwokhukalusibwa khwemiandu, omukunda kulakalusibwa khu owali mwenekwo wokhuranga nohomba khubolwibulo lulwe.
25Obukusi bwosi buhanwe okhuhelana khusichelo esiahuchil'lwa muhekalu.
26Esibulwa siokhuranga khumiruko chiosi nende etsisolo nesio MWAMI, kho omundu wosi arasihanakhwo singa omusango kwokhwehaana tawe. Esimoosi, esimeme sielikondi nende esieimbusi nebio MWAMI; 27nebutswa ebibulwa biokhuranga ebietsisolo etsili etsiomusilo binyala okhununulwa khubukusi obwahuchil'lwa ma okhumeetakhwo esitonye siamakhumi kabili khumia ndala. Nibiranyala okhununulwa, binyala okhukusibwa khubukusi obwahuchil'lwa khumundu undi.
28Omundu wosi arakusia nohomba okhununula esia yahaana kupu khu MWAMI tawe, kata abe omundu, omuruko, nohomba omukunda. Isio nesio MWAMI inziayo.#Obub. 18:14 29Kata omundu owahanwa khu MWAMI kupu sanyala okhununulwa tawe. Okhwola yerwe.
30Esielikhumi khumia ndala khubiamo biosi biomumukunda nesio MWAMI kata bube obuswache nohomba kabe amatunde.#Obub. 18:21; Okhuka. 14:22-29 31Omundu niyakhenya okhununula silala khubio okhwola arunge obukusi bwahuchil'lwa ma ameetekhwo esitonye siamakhumi kabili khumia ndala. 32Mulala khubuli emiruko likhumi nokwo MWAMI. Olwe emiruko chiba nichibalwanga, siomuruko kwelikhumi nokwo MWAMI. 33Omwenechio araloosia emiruko kho mbu echili emibi nichio echiahulwa tawe, kata arakhasilaniakhwo echiahuywe tawe. Niyakhasilania omuruko mulala nende okundi, kho emiruko chiombi nechio MWAMI ne sichinyala okhununulwa tawe.
34Yaka niko amalako ako MWAMI yahelesia Musa nali khusikulu sia Sinai khulwokhukahaana khubandu ba Isiraeli.
Currently Selected:
ABALAWI 27: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
