ABALAWI 24
24
Obwokhulinda Etsitaya
(Okhur. 27:20-21)
1OMWAMI yabool'la Musa 2ahaane amalako kano khubandu ba Isiraeli. Muleere amafura komuseituni akaratsokelwekhwo mwo esindu, amalahi kene khulwe tsitaya tsio Mwiheema, kho mbu obulafu bwakhenjemwo khasotso. 3Buli khumukolooba Haruni nahambienje etsitaya ma alekhe tsiatukhe okhwola olwa busia, yaho imbeli wo MWAMI esioba wepasia eli imbeli we Lisanduku lie Indakano elili Habundu Hatsienukhu Okhusila. Lilako yili lilondwe amatukhu kosi aketsanga. 4Haruni nahengelesienje etsitaya etsili khusihani siatsio esietsahabu isiyikhu ne okhwola alole mbu tsiatukhanga khasotso imbeli wo MWAMI.
Omukaati okuhanwanga khu Nyasaye
5Mubukule obusie etsikilo likhumi nende tsibili ma mutekhekhwo emihayila likhumi nachibili echiemukaati.#Okhur. 25:30 6Mure emikaati mutsinyaali tsibili, buli chisasaba mulunyaali l'lala khumesa eyalwakhwo netsahabu isiyikhu eli imbeli wokhubaho khwo MWAMI. 7Mure obwali obusiiyikhu khubuli lunyaali, singa esifwanani siomusango kwebiokhulia okuhanwanga khu MWAMI okhubukula obukono bwemikaati. 8Sie Sabato, amatukhu kosi aketsanga, okhwola emikaati chirebwe imbeli wokhubaho khwo MWAMI. Yiku nomulimo kwa Isiraeli inziayo. 9Emikaati yitsio netsia Haruni nende abolwibulo lulwe ne bachilile habundu hatsienukhu, sichila yisi nesitonye esitsienukhu okhusila khubiokhulia ebihanwanga khu MWAMI khulwa abesaalisi.#Mat. 12:4; Mk. 2:26; Lk. 6:4
Esinyasio khukhunyeka Nyasaye nende khubwira
10Yaliho omundu owali nasamwana Omumisiri ne nyinawe yali Omuisiraeli. Omundu uyo yasoolana nende Omuisiraeli. 11Mubusoolo yibwo, omundu uyo yanyeka eliira lia Nyasaye, ma nahilwa khu Musa. Eliira lianyinawe liali Shelomitsi omukhaana wa Debiri owomulwibulo lwa Dani. 12Yarebwa mumakhono kabalindi ma nibalindil'la OMWAMI ababool'le esia bamukhol'la.
13OMWAMI nabool'la Musa mbu, 14“Hinia omundu uyu esioba wekambi. Omundu wosi owahul'lakhwo omundu uyu nanyekanga Nyasaye are amakhono kaake khumurwe kwomundu uyo okhumanyia mbu ali nesikha ma nilwo olwabandu bosi balamulasa namachina nibamwira. 15Ma obool'le abandu ba Isiraeli mbu omundu wosi owakhanyeka Nyasaye okhwola anyoole esinyasio khulwa akene yako 16ma yerwe. Omuisiraeli wosi kata omucheni wamenyibwa mu Isiraeli owakhanyeka OMWAMI okhwola alaswe namachina ma yerwe nabandu bosi.
17“Omundu wosi owiranga okhwola naye yerwe,#Okhur. 21:12 18ne wosi owiranga omuruko kwowasie okhwola akusilanie nende okuli mwoyo. Lichoomo lili mbu obulamu khubulamu.
19“Omundu wosi niyakhasalisia owasie, siosi esia yakhaba nakhol'le okhwola sikholwe khuye khandi mbwo. 20Naba nafunaka likumba, elala khumakumba kaake lifunakwe. Naba namubofusia imoni ndala, naye imoni yiye ndala ebofusibwe. Naba natuya eliino ma lirule, elala khumeno kaake lituywe ma lirule. Liosi elia yakhaba nasalisisie owasio n'nalio likholwe khuye singa mbwo.#Okhur. 21:23-25; Okhuka. 19:21; Mat. 5:38 21Wosi owakheera omuruko okhwola akusilanie nende okuli mwoyo, nebutswa wosi owakheera omundu wasie okhwola naye yerwe. 22Lilako yili lili khwinywe mwesi, khu Baisiraeli nende khubacheni abamenyibwa mwinywe sichila Ise nise OMWAMI Nyasaye wenywe.”#Obub. 15:16
23Olwa Musa yali naribuye yaka khubandu ba Isiraeli, bahiinia omundu tsana esioba wekambi ma nibamulasa namachina nibamwira. Munjila yiyi abandu ba Isiraeli bakhola ako MWAMI yali nalachile Musa.
Currently Selected:
ABALAWI 24: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
