OKHUCHIAKA 45

Yosefu yeribul'la abaana babwe

1Yosefu yamala naramwa okhwesimilisia imbeli wabakholibe, ma nalaka mbu barule. Omundu undi wosi siyaliho olwa Yosefu yeribul'la abasiani babwe tawe.#Ebikh. 7:13 2Yalakaya nende omwoyo omukali okhusila ma Abaamisiri nibahul'la, ne amang'ana yaka kamala nikool'la abomunyumba yomuruchi. 3Yosefu nabool'la abasiani babwe, “Ise nise Yosefu. Papa asili mwoyo?” Olwabaana babwe bahul'la yako baria okhusila ma kata sibali abanyala okhukalusia tawe. 4Ma Yosefu nababool'la “Esute ahembi.” Nabo nibesunda, ma nababool'la, “Ise nise omwana wenywe Yosefu owamwali okhukusia Emisiri. 5Ne murabelela kata okhwetula sichila mwangusia yino tawe. Yali Nyasaye owaaruma ise okhwiitsa imbeli wenywe okhuhonia obulamu bwabandu. 6Kuno nomuhika kwakhabili inzala okhuba musibala, emihika chindi chirano chisili echiomundu arakhanyale okhulima nohomba okhuchesa tawe. 7Nyasaye yanyemesia imbeli wenywe khulwa okhumuhonia munjila yokhuchenya nende okhulola mbu inywe nende abetsinzibulo tsienywe muli mwoyo. 8Khe simwali inywe abandeera yino tawe, ni Nyasaye. Niye owakhola ise okhuba omukhongo womuruchi. Nise osinjiliye esibala siosi, ma nise omukhongo we Misiri yosi. 9Luno rule mutsie khu papa mumubool'le mbu kano niko akomwanawe Yosefu aboolanga, ‘Nyasaye waikhola okhuba omwami we Misiri, yitsa yino sila okhucheleba.#Ebikh. 7:14 10Nomenye musibala sia Kosheni khe nobetsenje ahembi n'nase, ibe mwene, abaanabo abetsukhulubo, amakondiko, tsimbusitsio tsing'ombetsio nende ebindu bindi biosi ebioli n'nabio. 11Noli mu Kosheni, ise nakhulindenje. Nachibe nichisikaye emihika chirano echieinzala, ne sindakhenya ibe, abeinyumbayo nende emirukochio okhufwa khulweinzala tawe.’ ”

12Yosefu yatsilil'la okhuboola mbu, “Luno inywe mwesi muluutsi, kata khandi Benjameni, mbu ise nise Yosefu. 13Mubool'le papa singa ndi nobunyali musibala sie Misiri sino ma m'mubool'le kosi akamuluutsi. Mwanguhe mumuleere hano.”

14Nakwaka Benjameni ma nachaaka okhulakaya, Benjameni naye khandi nalakaya olwa bakwakana. 15Ma natsunzuuna abaana babwe bosi nasilakaya. Olweinyuma abaana babwe bamala nibakhupa n'naye imbakha.

16Olwa mang'ana koola munyumba yomuruchi mbu abasiani banga Yusufu betsele, omuruchi nende abakholibe basangaala. 17Omuruchi nabool'la Yosefu mbu, “Bool'la abasiani benywe batuukhe etsipunda tsiabwe ebindu ma bakalukhe musibala sia Kanaani. 18Batsie babukule samwana nende abeekho babwe bosi ma bakalukhe yino. Nambahelesie liloba lilahi mu Misiri ma nabalie khubunolu bwesibala. 19Obabool'le khandi babukule amakaari okhurula Emisiri batsie n'nako khulwokhuchinga abakhasi babwe nende abaana babwe abatitiiti ma khandi beetse nende samwana. 20Barakhahendel'lakhwo okhulekha emiandu chiabwe ingo tawe, ebindu ebilahi ebili musibala sie Misiri nabibe ebiabwe.”

21Abaana ba Yakobo bakhola singa babool'lwa. Yosefu yabaheelesia amakaari singa omuruchi yali nalachile, ma nende ebiakhulia ebiokhuliila khunjila. 22Khandi nahelesia buli mulala khubo tsingubo tsiokhwekalukhania, nebutswa yahelesia Benjameni ebitonye etsimia tsitaru ebiefetsa nende tsingubo tsiokhwekalukhania tsirano. 23Narumila samwana etsipunda likhumi nitsituukhilwe ebindu ebilahi bie Misiri nende etsipunda tsindi likhumi nitsilikhwo obuswache, emikaati, nende ebiakhulia bindi khulwoluchendo. 24Nasebula abaana babwe ne olwa bali nibarulanga nababool'la mbu, “Murasoolan'na khunjila tawe.”

25Barula Emisiri nibakalukha ingo wabwe Kanaani khusamwana wabwe Yakobo. 26Nibamubool'la, “Yosefu asili mwoyo. Niye omuruchi we Misiri.” Yakobo yang'ang'aala butswa ne siyabasubila tawe.

27Ne olwa bamubool'la kosi aka Yosefu yali nababooleye, ma olwa yalola amakaari aka Yosefu yali narumile khulwokhumuhila Emisiri, omwoyokwe nikukalukha. 28Naboola, “Omwana wanje Yosefu asili mwoyo! Yaka kahel'le. Okhwola nzie okhumulolakhwo nisili okhufwa.”

Currently Selected:

OKHUCHIAKA 45: EBAIBO

Highlight

Copy