OKHUCHIAKA 44

Esikombe esiakora

1Yosefu yalaka omukholi owali omusinjil'li weinyumbaye mbu, “Yitsusia amakunia kabandu yaba ebiakhulia ebinji ebiabanyala okhuchinga, ma ore amapesa kabuli mulala khwikulu khwelikunialie. 2Ore esikombe sianje esiomukasa mwikunia liomwana wabwe omukhokosi, halala nende amapesa kobuswachebwe.” Naye nakhola singa yabool'lwa. 3Olwa bwasia, abasiani yabo nibaseebulwa nende etsipunda tsiabwe. 4Olwabali nibasili okhutsia ehale muno okhurula mwitookho, Yosefu nabool'la omukholi owali omusinjil'li weinyumbaye, “Tsia bwangu, olonde abandu bala. Olwanobanyoole nobareeba, ‘Esichil'le nimurunga obubi khubulahi nisina? 5Nisina esichil'le nimwiiba esikombe siomwami wanje esiomukasa? Nisio esia anywelangamwo, khandi esiakhol'langamwo obulakulibwe. Mukhol'le obubi okhusila.’ ”

6Olwomukholi uyo yabanyoola, nababool'la amang'ana kene yako. 7Nibamukalusia mbu, “Omwami, oli nasifune sina, okhuboola yaka? 8Ibe umanyile mbu khwakhukaluchisiye amapesa akakhwanyoola mumakunia kefwe okhurula Kanaani, esiakhachila khuibe omukasa nohomba etsahabu okhurula munyumba yomwamiwo nisina? 9Omwami, mulala khu ifwe niyakhanyoolekha nali n'nasio, yerwe, ne ifwe abandi fwesi nakhube abasumba baabo.”

10Naye naboola mbu, “Mbuchiliye, nebutswa owanonyoolekhe nende esikombe yenyene niye owanobe omusumba wanje, ne abandi bosi muba abalakhuule okhutsia.” 11Ma nibaruula amakunia kabwe bwangu, ne buli mulala niyekula likunialie. 12Omukholi wa Yosefu nakhaaba, nachiakila khumukhulundu ma namaliil'la khumukhokosi, ne esikombe nisinyoolekha mwikunia lia Benjameni. 13Abaana babwe nibarandula tsingubo tsiabwe musibeela, nibatuukha etsipunda tsiabwe ma nibakalukha mwitookho.

14Olwa Yuda nende abaana babwe boola munyumba ya Yosefu, banyoola nasilimwo. Nibamwinamila, 15ma Yosefu nababool'la mbu, “Mukhol'le sina yisi? Simumanyilenje omundu singa ise nyala okhukhola oburoobi mamanye akamukhol'le tawe?”

16Yuda nakalusia mbu, “Khwakhakhubool'la sina, omwami, khwakhakhanuukha mbwena? Khwakhabisa mbwena obubi bwefwe? Nyasaye ubisuuye obubi bwefwe. Fwesi khe luno khuli abasumbabo halala nende owesikombe sinyolekhele mwikunialie.”

17Yosefu naboola, “Tawe, sindakhakholambwo tawe! Uyo owali nende esikombe yenyene niye owanobe omusumba wanje. Abandi murule mukalukhe khu senywe nomulembe.”

Yuda yasaaya khulwa Benjameni.

18Yuda yatsia khu Yosefu ma naboola, “Omwami, noyanza ohuchiil'le n'nome n'nawe nobulakhuule. Orasinyikhila tawe, ibe ofwana singa omuruchi mwene. 19Omwami, wakhureeba mbu, ‘Muli nende senywe nohomba omusiani wenywe undi?’ 20Khwakhukalusia mbu, ‘Khuli nende papa owasaakhula ma khandi khuli nende omusiani wefwe omukhokosi owayebula nali omusakhulu. Omusiani wanga omwana uyu wafwa, ma niye osilikhwo omulamu yenyene khubaana ba nyina. Samwana wamuyanza okhusila.’ 21Omwami, wakhubool'la khumuleere, omulole, 22nefwe nikhukhukalusia mbu omwana uyo sali olekha samwana tawe, narulaho ne samwana yakhafwa. 23Ma noboola mbu, ‘Sinambuchil'le okhumulolakhwo m'moni mwanje nimuretsele nende omwana wenywe omukhokosi tawe.’

24“Olwa khwakalukha khu papa, khwamubool'la akawali nobooye. 25Ma nakhubool'la khukalukhe khukule ebiakhulia bindi. 26Nefwe nikhumukalusia mbu, ‘Sikhunyala okhwitsa tawe, sinakhuhuchil'lwe okhulola omusaatsa uyo nikhurali nende omwana wefwe omukhokosi tawe. Khunyala okhutsia nikali omwana wefwe omukhokosi atsia halala n'nefwe.’ 27Papa wefwe nakhubool'la mbu, ‘Mumanyile bulahi mbu omukhasi wanje Raheli yanzibul'la abaana babili bonyene. 28Mulala yaarulakhwo. Okhwola abe niyaliibwa nende etsisolo tsiom'bulimo sichila sili okhumulolakhwo okhurula olwene yilwo. 29Nimwakhabukula uno lunondi ma esindu nisiekhola khuye, esibeela siamwakhandekhela siakhanzira obwandi omusakhulu mbu.’

30“Luno, nindakhatsia khu papa wanje nirali nende omwana uyo tawe, olwa nayandole nirali n'naye Ise nafwe. 31Obulamubwe bwahambaana nende obwomusiani uno ne nomusakhulu okhusila, esibeela siakhamwiira. 32Okhuyomba yako ise ndasinga obulamu bwanje khulwomwana uyu. Ndabool'la papa mbu nimbula okhukalusia omwana uyu, mbe owokhutulwa mubulamu bwanje bwosi. 33Khe luno khusaayanga mbu olekhe ise sikale hano singa omusumbawo musilenje siomwana uyu, olekhe akalukhe ingo nende abasiani babwe. 34Ndakhakalukha mbwena khu papa nikhurali nende omwana uyu? Sindakhefwila okhulola amabi nikamukwiila Papa tawe.”

Currently Selected:

OKHUCHIAKA 44: EBAIBO

Highlight

Copy