OKHUCHIAKA 46

Yakobo nende abeinyumbaye batsia Emisiri

1Yakobo yaboha biosi ebiayali n'nabio ma natsia Berisheba, ahayakhol'la emisango khu Nyasaye wa papa uwe Isaka. 2Nyasaye nal'loma n'naye mwilooro butukhu, namulanga, “Yakobo, Yakobo!”

Naye nahuchil'la mbu, “Yee, ndi hano.”

3Naboola, “Ise nise Nyasaye, Nyasaye wa papawo. Orakharia okhutsia Emisiri tawe, ndakhalombe olwibulolwo okhuba esibala esikali. 4Ndakhatsie n'nawe Emisiri, ma khandi ndakhakalusie olwibulolwo musibala sino. Yosefu yakhabe n'nawe olwa wakhafwe.”

5Yakobo nachaaka oluchendo okhurula Berisheba. Abasianibe nibamura ye halala nabaana, nabakhasi babwe mumakaari akomuruchi we Misiri yali nahaan'ne. 6Babukula emiruko chiabwe nende biosi ebiabali nibanyoola Kanaani ma nibatsia Emisiri. Yakobo yabukula abolwibulolwe bosi,#Ebikh. 7:15 7abasianibe, abakhaanabe nende abetsukhulube.

8Abeinyumba ya Yakobo abayatsia n'nabo Emisiri bali omusianiwe omukhulundu Rubeni, 9nende abaana ba Rubeni, Hanoki, Palu, Hesironi nende Karimi. 10Simioni nende abasianibe: Yemweli, Yamini, Ohadi, Yakini, Sohari, nende Shauli, omwana womukhasi Omukanaani. 11Lawi nende abasianibe: Gerishoni, Kohatsi, nende Merari. 12Yuda nende abasianibe: Shela, Peresi, Sera. Abasiani bandi ba Yuda Eri nende Onani bali nibafwila Kanaani. Abasiani ba Peresi bali Hesironi nende Hamuli. 13Isakari nende abasianibe: Tola, Puwa, Yashubu nende Shimironi. 14Sabuloni nende abasianibe: Seredi, Eloni, nende Yaleeli. 15Bano nibo abasiani aba Lea yali niyebul'la Yakobo mu Mesopotamia, halala nende omwana omukhaana owalangwa Dina. Abolwibulolwe abayanyoola okhubir'ra mu Lea bosi bali amakhumi kataru nende bataru.

16Khandi yatsia nende Gadi nende abasianibe: Sefori, Hagi, Shuni, Eseboni, Eri, Arodi, nende Areli. 17Asheri nabasianibe: Imina, Ishiwa, Ishiwi nende Beria, ma nende omukhaana wabwe Sera. Abasiani ba Beria bali Heberi nende Malakhieli.

18Likhumi nende basasaba yaba nibo abolwibulo lwa Yakobo abayanyoola okhubir'ra mu Silipa, owali omukhaana omukholi owa Labani yahelesia omukhaanawe Lea.

19Omukhasi wa Yakobo owalangwa Raheli yamwibul'la abaana babili: Yosefu nende Benjameni. 20Yosefu yebul'la musibala sie Misiri abasiani babili, Manase nende Efuraimu okhurula mu Asenatsi omukhaana wa Potifera, omwesaalisi wa Oni.#Okhuch. 41:50-52 21Abaana ba Benjameni bali Bela, Bekeli, Ashibeli, Gera, Naamani, Eli, Roshi, Mupiimu, Hupimu, nende Aradi. 22Likhumi nende bane bano nibo aba Yakobo yanyoola okhubir'ra mu Raheli.

23Khandi yatsia nende Dani nende omusianiwe Hushimu. 24Nafutali nende abasianibe: Yaseeli, Guni, Yeseri, nende Shilemu. 25Bane nabataru bano nibo aba Yakobo yanyoola okhubir'ra mu Biliha, omukholi owa Labani yahelesia omukhaanawe Raheli.

26Abandu bosi abolwibulo lwa Yakobo abayenjila n'nabo Emisiri bali amakhumi kasasaba nende basasaba, nibaralimwo abakhasi babaanabe. 27Yosefu yebul'la Emisiri abaana babili ma abolwibulo lwa Yakobo abatsiayo niboola abandu amakhumi kane nakataru.#Ebikh. 7:14

Yakobo nende abeinyumbaye mu Misiri

28Yakobo yaruma Yuda okhwemela okhutsia okhubool'la Yosefu yeetse okhubakaan'na mu Kosheni. Olwaboola, 29Yosefu yaniina mwikaarilie ma natsia Kosheni okhwakaan'na samwana. Olwa bakaana, Yosefu yakwaka samwana ma nalakaya khulwa oluhono olurambi. 30Yakobo nabool'la Yosefu, “Ise nderechekhele okhufwa, sichila luno mal'le okhukhulolakhwo ma manyile osiliho mwoyo.”

31Ma Yosefu nabool'la abasiani babwe nende abandi bosi abolwibulo lwa samwana mbu, “Okhwola nzie okhubool'la omuruchi mbu abasiani befwe nende bosi abolwibulo lwa papa abamenyanga mu Kanaani, betsele khuise. 32Nzia okhumubool'la mbu inywe muli abaayi ma mulindanga ebiayo, khandi muleer're emiruko chienywe nende ebindu bienywe biosi. 33Olwomuruchi namulanje namureeba emilimo chienywe, 34namumubool'le mbu obulamu bwenywe bwosi mwalinji abaayi singa abakuka benywe bakholanga. Nimuboola mbwo ne nalekha namumenye Kosheni.” Yosefu yaboola mbwo sichila Abaamisiri sibahendelangakhwo abaayi tawe.

Currently Selected:

OKHUCHIAKA 46: EBAIBO

Highlight

Copy