Kem Lingón 57
57
Lingón Dabid
1Hol knoduhem ou, Dwata, hol
knoduhem ou,
tek són uu gónów gel hofin.
Angate hebnos laan hafakem efet gotu mkó yóm tey lenos bong nii.
2Hole hkodu ebè yóm Dwata hol Dandónen Geta,
yóm Dwata angat hdohò du yóm kun kóyô béléu.
3Angat wen tóbóng hwiten gu bè longit mò lemwà dou,
anì lenwaen ou bè yó kem tau tô malu hmatay dou.
Hegfan Dwata béléu yóm là konol yóm kbong nawan dou
ne yóm tey kteneben béléu.
4Tódô snibut le ou yó kem hohonu,
hol lómó kmò le, lómón yó kem liyun alì bitil móyô msék tau.
Yóm ktelem yó kem nihi le,
hol lómón ktelem yó kem buyus ne yó kem hanak.
Tey telem kudél le,
hol lómón ktelem yó kem sudeng sbalà bak.
5Holi hegeta, Dwata, senta yó kem longit alì geta.
Hyu ke hol gfan bè klamangen benwu yóm tey keslinangem.
6Yó kem hohonu, wen holot nmò le mò alu le dou,
ne deng tey sidek klitegu lemwót bè yóm alì keglayamu.
Deng wen sol nokol le bè lanu mò gónó le hebtang dou,
okóm deng mom lu bud btang elemen.
7Tek sónen uu, Dwata, yóm gónón hol nô nawahu.
Lingónu yóm lingón dmóyón kóm.
8Yó hendemu, btike dé anì nunihu yó kem gel kenbitu.
Naw bentik kdaw mlan bè lingón.
9Angate slamat béléem, Dwata, bè solu yóm kdéen tau.
Angat lingónu bè yó kem dumu benwu hmilol yóm lingón dmóyón kóm.
10Yóm kbong nawam dou là monolen yó,
hol lómó kbongen longit.
Yóm ktenebem béléu,
botong gefet bè yó kem lobun.
11Holi hegeta, Dwata, senta yó kem longit alì geta.
Hyu ke hol gfan bè klamangen benwu yóm tey keslinangem.
Currently Selected:
Kem Lingón 57: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
