Kem Lingón 56
56
Lingón Dabid
1Ó Dwata, hol knoduhem ou,
abay se deng nundug le ou yó kem hohonu.
Knoyung le kdaw mundug dou.
2Knoyung le kdaw kemtes dou
yó kem tau gel sidek udél le etahu.
Tey le dê yóm heklabak mit dou sfatay.
3Okóm ke gele likò, són uu snaligu.
4Tey kdóyónu du yóm udélem, Dwata.
Són Dwata snaligu, yó gónów là likò.
Laen dù gmò le béléu yó kem tau tonok.
5Sónmò snigol yó kem hohonu ke wen monu.
Sónmò natul le yóm lan le hemsidek dou.
6Gel le stifun bè yóm gónón gebnos,
tendo tenngel le yóm kdê nmou,
sen-galu le ke hnatay le ou.
7Hol bnelesem lu bè yóm sidek nmò le.
Mlan bè kebutem, Dwata, hol genlaem lu.
8Deng gotu tngónem yóm kdê lenóngónu.
Deng tngónem se ke deng hilu duléken mosok lewoku.
Kaem deng listahem bè bokem.
9Bè yóm kdawu htóbóng béléem, Dwata,
gotu le beklil mulék yó kem hohonu.
Bè yó se gónóhu temngón du deng nfi Dwata ou.
10Ó Dwata, tey kdóyónu du yóm udélem.
Tahu se, Dwata, dóyónu yóm udélem.
11Són Dwata snaligu, yó gónów là likò.
Laen dù gmò le béléu yó kem tau tonok.
12Dnohou yóm deng fasadu kóm, Dwata.
Dsuu ebéléem yóm dsù gónóhu dmóyón kóm
lanu slamat bè yóm któbóngem dou.
13Yakà deng lenwaem ou lem hatay,
ne deng tnóbóngem ou anì là tlokobe.
Duhen ni, elese tendo nô bè soluhem, Dwata,
nóe bè yóm kóm layag tendo hlowil dou.
Currently Selected:
Kem Lingón 56: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
