Kem Lingón 58
58
Lingón Dabid
1Yu kem tau mogot benwu, tedeng kô
yóm kkukum ye?
Laen dù mtukul nfi ye kô bè yóm gel kkukum ye tau?
2Kaem là, sal sigol yóm gel kwit ye,
ne són hemsidek tau yóm gel nmò ye, laen kô dù tedeng du.
3Ni kem tau mò sidek ni, tódô mung bè ksut le gemsalà.
Kewóten bè ksut le yóm kmò le kéng.
4Wen tey alas le lómón alas ulal.
Mkél le bè sedof, là kô le móyô hmungol.
5Là kenmón le du yóm gel huni yó kem tau hembeyen ulal,
balù nô kehtilob kuni le du.
6Ó Dwata, tenfokem nihi le.
Gotu senfékem kakim le, Dwata, ni kem liyun ni.
7Hol heklanasem lu lómón kekti yóm él bè gónón mékéng tonok.
Ne lómón yóm bnes nô bè gónón gel mlan tau, sal gel menes.
8Hol le mkél bè yóm byukung,
són tonem danà iwolen.
Ne lómón ke mkél le bè yóm ngà sut hosot, là kô tonen du nóng kdaw.
9Angat gotu kó Dwata lu,
homongen yó kem lomi tau dalang se yó kem tuha.
Là kóen legen kmoen du,
lómón yóm kuleng nô ta ofi, là legenen deng sana kinì.
10Bong yó kem tau tedeng, angat tey kehligal le kul
ke ton le yóm kbeles Dwata kul yó kem tau là tedeng kwit le kukum.
Angat nolob le ti le bè litô yó kem tau gel mò sidek deng hnatay le.
11Yó angat mon yó kem tau, “Tahu se,
wen ofol blay Dwata kul yó kem tau tedeng kmò le.
Bè ktahuhen, Dwata se fen mit du yóm kukum tedeng
bè yó kem tau talak tonok.”
Currently Selected:
Kem Lingón 58: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
